– 29 تامىزدا سەمەي پوليگونىن جابۋ تۋرالى جارلىققا قول قويعانىما وتىز جىل تولادى. سودان بەرى ءبىز يادرولىق قارۋعا قارسى تالماي كۇرەس جۇرگىزىپ كەلەمىز. قازاقستان يادرولىق سىناقتاردىڭ اۋىرتپالىعىن باسىنان وتكەرگەن ەل: مەملەكەتىمىزدە بەس جۇزدەن استام جارىلىس بولىپ, كوپ ادام زارداپ شەكتى. ءبىز پوليگوندى جابۋمەن قاتار, كولەمى جاعىنان دۇنيە جۇزىندەگى ءتورتىنشى يادرولىق ارسەنالدان باس تارتتىق. مەن بيىل رەسەي مەن اقش اراسىنداعى ستراتەگيالىق شابۋىل قارۋلارىن قىسقارتۋ جانە شەكتەۋ جونىندەگى كەلىسىمنىڭ ۇزارتىلعانىنا قۋانىشتىمىن. وسى جىلى يادرولىق قارۋعا تىيىم سالۋ شارتى كۇشىنە ەندى. يادرولىق سىناقتارعا جاپپاي تىيىم سالۋ تۋرالى شارتقا قول قويىپ, راتيفيكاتسيالاعان ەلدەردىڭ قاتارى ارتىپ كەلەدى. بۇل جۇمىس جالعاسىن تابادى دەپ ۇمىتتەنەمىن, – دەدى قازاقستاننىڭ تۇڭعىش پرەزيدەنتى.
نۇرسۇلتان نازارباەۆ قازاقستاننىڭ انتيادرولىق باعىتتاعى كۇش-جىگەرىن جوعارى باعالاعانى ءۇشىن ريزاشىلىعىن ءبىلدىردى.
– ءبىز يادرولىق قارۋعا قارسى كۇرەسكە جانە يادرولىق سىناقتارعا تىيىم سالۋعا ارنالعان بارلىق ءىس-شاراعا اتسالىسىپ كەلەمىز. وسى جۇمىستى جوعارى باعالاعاندارىڭىز ءۇشىن العىسىم زور. ءبىزدىڭ ۇسىنىسىمىز بويىنشا بىرىككەن ۇلتتار ۇيىمى 29 تامىزدى حالىقارالىق يادرولىق سىناقتارعا قارسى ءىس-قيمىل كۇنى دەپ جاريالادى, – دەدى نۇرسۇلتان نازارباەۆ.
ءوز كەزەگىندە ر.فلويد يادرولىق قارۋسىزدانۋ, يادرولىق قارۋدى تاراتپاۋ, سونداي-اق اتوم ەنەرگياسىن بەيبىت ماقساتتا پايدالانۋ ىسىنە زور ۇلەس قوسقان كورنەكتى تۇلعامەن كەزدەسۋ مۇمكىندىگىنە يە بولعانى ءۇشىن العىسىن ءبىلدىردى.
– ءسىز يادرولىق سىناقتارعا جاپپاي تىيىم سالۋ تۋرالى شارتتى جۇزەگە اسىرۋعا ەرەكشە ىقپال ەتتىڭىز. ءسىزدىڭ قوسقان ۇلەسىڭىز زور, ونىڭ اسەرى دە مول, – دەدى ر.فلويد.
كەزدەسۋدە تاراپتار حالىقارالىق قاۋىپسىزدىك پەن تۇراقتىلىقتى قامتاماسىز ەتۋ سالاسىنداعى قازىرگى جاعداي تۋرالى پىكىر الىستى.
