پرەزيدەنت • 27 تامىز، 2021

مەملەكەت باسشىسى يادرولىق سىناقتارعا تولىق تىيىم سالۋ تۋرالى شارت ۇيىمىنىڭ باسشىسى روبەرت فلويدتى قابىلدادى

62 رەت كورسەتىلدى

قاسىم-جومارت توقاەۆ يادرولىق سىناقتارعا تولىق تىيىم سالۋ تۋرالى شارت ۇيىمىنىڭ باسشىسى روبەرت فلويدتى قابىلدادى، دەپ حابارلايدى Egemen.kz.

مەملەكەت باسشىسى اۆستراليالىق ماماندى يادرولىق سىناقتارعا تولىق تىيىم سالۋ تۋرالى شارت ۇيىمىنىڭ دايىندىق كوميسسياسىنىڭ اتقارۋشى حاتشىسى بولىپ سايلانۋىمەن قۇتتىقتاپ، اتالعان ۇيىمنىڭ جۇمىسى قازاقستان ءۇشىن اسا ماڭىزدى ەكەنىن اتاپ ءوتتى. 

ء«سىز وسى سالاداعى تاجىريبەلى، يادرولىق قارۋسىزدانۋ ماسەلەلەرى بويىنشا تانىمال ساراپشىسىز. ءبىز سىزدەرمەن تىعىز جۇمىس ىستەۋگە بەيىلدىمىز. قازاقستان بۇل ۇيىمنىڭ جاقىن ءارى سەنىمدى سەرىكتەسى بولىپ قالا بەرەدى. مەنىڭ اكىمشىلىگىم مەن ۇكىمەت ۇيىمنىڭ جۇمىسىن كۇشەيتۋ ماقساتىمەن تىعىز ءارى تۇراقتى بايلانىسىپ تۇرادى»، دەدى پرەزيدەنت.

قاسىم-جومارت توقاەۆ روبەرت فلويدتىڭ قازاقستانعا ساپارى حالىقارالىق يادرولىق سىناقتارعا قارسى ءىس-قيمىل كۇنى قارساڭىندا ءوتىپ جاتقانىن اتاپ ءوتتى. وسىدان 30 جىل بۇرىن سەمەي پوليگونى جابىلعان بولاتىن. بۇۇ باس حاتشىسىنىڭ ورىنباسارى رەتىندە جەنەۆاداعى جۇمىسىنىڭ تاجىريبەسىمەن بولىسكەن مەملەكەت باسشىسى الەمدىك قاۋىمداستىققا يادرولىق قارۋدى تاراتپاۋ جانە قارۋسىزدانۋ تۋرالى كەڭ اۋقىمدى ءتۇسىندىرۋ جۇمىستارىن جۇرگىزۋ ماڭىزدى دەدى.

روبەرت فلويد مەملەكەت باسشىسىنىڭ كورسەتكەن قۇرمەتىنە ريزاشىلىعىن ءبىلدىردى.

«ۇيىمنىڭ دايىندىق كوميسسياسىنىڭ حاتشىسى بولىپ سايلانعاننان كەيىن مەن كەزدەسكەن العاشقى مەملەكەت باسشىسى – قازاقستاننىڭ پرەزيدەنتى بولۋىنىڭ سيمۆولدىق ءمانى بار. سوندىقتان بۇل – مەن ءۇشىن ەرەكشە كۇن»، دەدى ديپلومات. 

روبەرت فلويد سەمەي پوليگونىنىڭ اۋماعى مەن كۋرچاتوۆتاعى قر ۇلتتىق يادرولىق ورتالىعىنان العان اسەرىمەن ءبولىستى. سونداي-اق جۇمىسىنىڭ باسىم باعىتتارى، سونىڭ ىشىندە جاستار مەن ۇيىمنىڭ كورنەكتى قايراتكەرلەرىنىڭ جۇمىستارىن ىلگەرىلەتۋ تۋرالى ايتتى.

كەزدەسۋ سوڭىندا تاراپتاردىڭ قازاقستاننىڭ يادرولىق قارۋعا قارسى باستامالارىن ىلگەرىلەتۋ مەن يادرولىق سىناقتارعا جاپپاي تىيىم سالۋ تۋرالى شارت بويىنشا تىعىز ىنتىماقتاستىققا دايىن ەكەندەرى ايتىلدى.

سوڭعى جاڭالىقتار

الماتىدا تروللەيبۋس ورتەندى

وقيعا • 24 ماۋسىم، 2022

تۇركپا-نىڭ اتاۋى وزگەرەدى

پارلامەنت • 24 ماۋسىم، 2022

ۇقساس جاڭالىقتار