ەندى الداعى ۋاقىتتا تەاتر ۇجىمى كەزەكتى ونەر دوداسىندا باق سىناماقشى. قازان ايىنىڭ 16-24 كۇندەرى ارالىعىندا تۇركيا ەلىنىڭ استاناسىندا VII حالىقارالىق «انكارا» قۋىرشاق تەاترلارىنىڭ فەستيۆالى وتەدى. وسى فەستيۆالعا تەاتر ۇجىمى «ماكبەت. يلليۋزيا» اتتى ەرەسەك كورەرمەنگە ارنالعان سپەكتاكلمەن قاتىسادى. اعىلشىن دراماتۋرگى ۋ.شەكسپيردىڭ پەساسى بويىنشا ساحنالانعان بۇل تۋىندى اقپان ايىندا كورەرمەن نازارىنا العاش رەت ۇسىنىلعان ەدى. رەجيسسەرى دينا جۇماباەۆا.
سونداي-اق قۋىرشاق تەاترى كوكشەتاۋ قالاسىندا قازان ايىنىڭ 4-8 ارالىعىندا وتەتىن «تەART-كوكشە» حالىقارالىق تەاتر فەستيۆالىنە ءوز رەپەرتۋارىنداعى «كاشتانكا» اتتى سپەكتاكلمەن قاتىسۋدى جوسپارلاپ وتىر. اتالعان قويىلىم – ورىستىڭ ايگىلى جازۋشىسى ا.چەحوۆتىڭ اڭگىمەسى بويىنشا ساحنالانعان بالدىرعاندار مەن ءجاسوسپىرىم بالالارعا ارنالعان ەكسپرەسسيۆتى سپەكتاكل. رەجيسسەر كۋبانىچبەك ادىلوۆتىڭ اتالعان قويىلىمدى ساحنالاۋ بارىسىندا ديالوگتاردى مۇمكىندىگىنشە از قولدانىپ, كوبىنە ميميكا, ءىس-قيمىل, دىبىس ۇشەۋىن پايدالانعان. وسىنىسىمەن قويىلىم كىشكەنتاي كورەرمەندى بىردەن ەلىكتىرىپ اكەتەدى. ايتا كەتەيىك, اتالعان سپەكتاكل تەاتر فەستيۆالى اياسىندا اكتەرلەرگە قۋىرشاق جۇرگىزۋدەگى قابىلەتتەرىن كورسەتۋگە تولىقتاي مۇمكىندىك بەرەدى.
بۇدان بولەك تەاتر ۇجىمى اشىربەك سىعاي اتىنداعى «سىن – شىن بولسىن...» رەسپۋبليكالىق تەاترلار فەستيۆالىندە دە ونەر كورسەتپەك. مادەني ءىس-شارا ەل تاۋەلسىزدىگىنىڭ 30 جىلدىعىنا وراي ۇيىمداستىرىلىپ وتىر. قۋىرشاق تەاترى وعان «رومەو مەن دجۋلەتتا» سپەكتاكلىمەن قاتىسادى. بۇل قويىلىم دا شەكسپير پەساسى بويىنشا رەجيسسەر دينا جۇماباەۆانىڭ جەتەكشىلىگىمەن ساحنالانعان.
ونەر ۇجىمى حالىقارالىق ءھام رەسپۋبليكالىق بايقاۋلاردان تابىستى ورالادى دەپ سەنەمىز.
