«ەلوردا سپورتشىلارى جارىس الدىنداعى مەديتسينالىق تەكسەرۋدەن ەمحانادا كوپشىلىكپەن بىرگە وتەدى. بۇل ءوز كەزەگىندە سپورتشىلارعا قولايسىزدىقتار تۋعىزىپ, ولاردىڭ دايىندىعى مەن ساۋىقتىرۋ پروتسەسى ساپاسىنا اسەر ەتەدى. وسى سەبەپتى سپورتشىلار قالا اكىمىمەن كەزدەسۋدە بولەك مەديتسينالىق مەكەمە بەرۋدى سۇرادى. ۇسىنىس قولداۋ تاۋىپ, بيىل ەلوردادا تۇڭعىش رەت ارنايى سپورتتىق-مەديتسينالىق ورتالىق اشىلاتىن بولدى», دەدى قالالىق دەنە شىنىقتىرۋ جانە سپورت باسقارماسىنىڭ باسشىسى سامات ەرعاليەۆ.
ونىڭ سوزىنشە, ورتالىقتا سپورتشىلارعا تەرەڭدەتىلگەن مەديتسينالىق تەكسەرۋلەر جۇرگىزىلەدى.
«سپورتتىق-مەديتسينالىق ورتالىق سپورتشىلاردىڭ وڭالۋى جانە دەنساۋلىعىن قالپىنا كەلتىرۋگە مۇمكىندىك بەرەدى. سونداي-اق سپورتشىلاردىڭ دەنساۋلىعىن قاداعالاپ, جاراقات العان جاعدايدا ەمدەۋ ءۇشىن بىلىكتى دارىگەرلەردى تارتۋ قولعا الىنىپ جاتىر. سپورتتىق دارىگەرلەرمەن قاتار پسيحولوگ, ماسساجيست جانە سپورتشىلاردىڭ تاماقتانۋىن قاداعالايتىن ماماندار بولادى», دەيدى ول.
