فوتو: ءسىم ءباسپاسوز قىزمەتى
قر سىرتقى ىستەر مينيسترلىگىندە ەل تاۋەلسىزدىگىنىڭ 30 جىلدىعىنا ارنالعان «قازاقستان شەتەلدىك باق كوزىمەن» VI حالىقارالىق بايقاۋ جەڭىمپازدارىن ماراپاتتاۋ ءراسىمى ءوتتى.
بايقاۋدى قر ءسىم جانە قازاقستان باس رەداكتورلار كلۋبى ۇيىمداستىردى. شارا وسىمەن التىنشى رەت وتكىزىلىپ وتىر. بيىلعى كونكۋرس قر تاۋەلسىزدىگىنىڭ 30 جىلدىعىنا ارنالدى.
بايقاۋ اياسىندا قازىلار القاسى الەمنىڭ 40-قا جۋىق ەلىنىڭ 60 ءجۋرناليسىنىڭ جۇمىسىن قارادى. ماتەريالدار قازاقستانعا قاتىستى ەكونوميكا, ساياسات, حالىقارالىق قاتىناستار, تاريح, مادەنيەت, تۋريزم, دەنساۋلىق ساقتاۋ, سپورت, يادرولىق قارۋسىزدانۋ, جاڭارتىلمالى ەنەرگيا كوزدەرى سياقتى اۋقىمدى تاقىرىپتارعا, سونداي-اق قازاق حالقىنىڭ كورنەكتى تۇلعالارى – اباي قۇنانباي ۇلى مەن ءابۋ ناسىر ءال-ءفارابيدىڭ مۇراسىنا ارنالدى. بايقاۋعا قاتىسۋشىلاردىڭ ماتەريالى شەتەلدىك گازەتتەردە, جۋرنالداردا, ينتەرنەت-باسىلىمداردا جانە تانىمال ينتەرنەت پلاتفورمالارىندا جاريالاندى.
قازىلار القاسىنىڭ شەشىمىمەن 6 شەتەلدىك جۋرناليست جەڭىمپاز اتاندى. ولار – «رەسپۋبليكا», «ليتۆالىق كۋرەر» اپتالىق باسىلىمداردىڭ جانە «ەحو ليتۆا» گازەتىنىڭ باس رەداكتورى ن.جۋكوۆ (ليتۆا), «Finančné Noviny» باسىلىمىنىڭ باس رەداكتورى ۆ.باچيشين (سلوۆاكيا), پاكىستاننىڭ جاھاندىق جانە ستراتەگيالىق زەرتتەۋلەر ورتالىعىنىڭ ايماقتىق ساراپشىسى, دوكتور م.ۋل-حاسان حان (پاكىستان), كانادانىڭ ەميگراتسيا جانە مۋلتيكۋلتۋراليزم ماسەلەلەرى جونىندەگى بۇرىنعى ءمينيسترى ت.رۋپرەحت (كانادا), «BCI مەديا» كومپانياسىنىڭ كوممەرتسيالىق پروديۋسەرى ي.چەرنەي-كەلنەر (كانادا), جانە «MNB» تەلەارناسىنىڭ ءتىلشىسى تس.بات-ەردەنە (مونعوليا).
ماراپاتتاۋ راسىمىنە قر سىرتقى ىستەر ءمينيسترىنىڭ ورىنباسارى ەرلان الىمباەۆ, قازاقستان باس رەداكتورلارى كلۋبىنىڭ پرەزيدەنتى بيبىگۇل جەكسەنباي, نۇر-سۇلتان قالاسىندا اككرەديتتەلگەن شەتەلدىك ديپلوماتيالىق كورپۋستىڭ جانە جەتەكشى قازاقستاندىق باق وكىلدەرى قاتىستى.
سىرتقى ىستەر ءمينيسترىنىڭ ورىنباسارى ەرلان الىمباەۆ جەڭىمپازداردى قۇتتىقتاي وتىرىپ, بايقاۋدىڭ قاتىسۋشىلارىنا العىس ءبىلدىردى. ولاردىڭ سانى جىلدان جىلعا ارتىپ كەلە جاتقانىن, وتىنىمدەر گەوگرافياسىنىڭ كەڭەيگەنىن, شەتەلدىك بۇقارالىق اقپارات قۇرالدارى تاراپىنان قازاقستانعا دەگەن قىزىعۋشىلىقتىڭ ارتقانىن اتاپ ءوتتى. ە.الىمباەۆ سىرتقى ىستەر مينيسترلىگىنىڭ كوروناۆيرۋس پاندەمياسىنا بايلانىستى شەكتەۋلەردى ساقتاي وتىرىپ, مازمۇندى باعدارلاما ۇيىمداستىرعانىن, ونىڭ اياسىندا بايقاۋ جەڭىمپازدارى قازاقستان, ونىڭ قازىرگى دامۋى مەن 30 جىل ىشىندە قول جەتكىزگەن جەتىستىكتەرى تۋرالى تولىعىراق بىلۋگە, حالقىمىزدىڭ قوناقجايلىلىعىن سەزىنۋگە مۇمكىندىك الاتىنىن ايتتى.
ءوز كەزەگىندە, شەتەلدىك جۋرناليستەر بايقاۋدى ۇيىمداستىرۋشىلارعا العىس ايتىپ, قازاقستاننان العان اسەرلەرىمەن ءبولىستى.
بايقاۋ جەڭىمپازدارى قازاقستانعا ساياحات تۋرىنا قاتىسۋعا, ونىڭ ىشىندە نۇر-سۇلتان, تۇركىستان جانە الماتى قالالارىنا, سونداي-اق بۋراباي دەمالىس ايماعىنا بارۋعا مۇمكىندىك الدى.
