2018 جىلى «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعى قىزمەتكەرلەرى قازان قالاسىنا ساپار جاساعان كەزدە زاڭدار جيناعىن تاپقان.
قارامولا جارعىسى – ادام قۇقىعى مەن بوستاندىعىن قورعاۋ تۋرالى ەرەجەلەر جيناعى. كودەكس 1885 جىلى قارامولا ەلدى مەكەنىندەگى سەزدە, اباي جوعارعى بي بولىپ سايلانعاندا قابىلدانعان. كەيىن سەمەي اسكەري گۋبەرناتورىنىڭ بۇيرىعىمەن قازان ۋنيۆەرسيتەتىنىڭ باسپاسىندا اراب الىپبيىمەن شىعارىلعان.
«1885 جىلى قارامولا ەلدى مەكەنىندە بيلەردىڭ سەزدى ءوتتى. سول سەزدە اباي جوعارعى بي بولىپ سايلاندى. رەسەي ۇكىمەتىنىڭ جەرگىلىكتى وكىلدەرى حاكىمنەن زاڭدار جيناعىن جازىپ بەرۋدى وتىنگەن. ءۇش كۇن ىشىندە بيلەرمەن كەڭەسە وتىرىپ, اباي وسى جارعىنى شىعاردى», دەيدى اباي اتىنداعى مۋزەي ديرەكتورى مەيرامگۇل قايرامباەۆا.
جارعىنىڭ تەك كيريل قارپىمەن جازىلعان نۇسقاسى سەمەيدەگى مۋزەيدە 60-جىلداردان بەرى بار. تۇپنۇسقاسى ەندى تابىستالدى.
«ەندى زەرتتەۋشىلەر كيريل قارپىمەن ماشينكامەن جازىلعان كوشىرمەسىن تۇپنۇسقامەن سالىستىرا الادى. سونىمەن قاتار بىرقاتار ماسەلەلەرگە نۇكتە قويىلادى. سەبەبى بۇعان دەيىن كەيبىر تاراۋلار بويىنشا داۋ-دامايلار تۋىنداعان ەدى. كيريلل قارپىنە اۋدارعاندا دا قاتەلىكتەر كەتۋى مۇمكىن. زەرتتەۋشىلەر ءۇشىن بۇل وتە ۇلكەن ولجا», دەدى مۋزەي ديرەكتورى.
