حوككايدو, مياگي, گيفۋ, ايچي, ميە, شيگا, وكاياما جانە حيروسيما وسى جۇمادان باستاپ 12 قىركۇيەككە دەيىن, توكيو مەن وساكانى قوسا العاندا, قاتاڭ شارا قولدانعان وزگە 13 پرەفەكتۋرانىڭ قاتارىنا قوسىلادى. بۇل قادام جاپونيا توتەنشە جاعدايدىڭ اۋقىمىن كەڭەيتكەننەن بىرنەشە كۇن وتكەن سوڭ جاسالدى. ويتكەنى ۆيرۋستىڭ «دەلتا» شتامى ەلدىڭ مەديتسينالىق جۇيەسىنە اۋىرتپالىق ءتۇسىرىپ, كەڭىنەن تارالىپ جاتىر. پرەمەر-مينيستر يوشيحيدە سۋگا بۇل شەشىمدى جۇقپالى اۋرۋلار مەن باسقا دا سالالارداعى ساراپشىلار توبى قولداعاننان كەيىن جۇمىس توبىنىڭ وتىرىسىندا رەسمي تۇردە ماقۇلدادى.
توتەنشە جاعداي كەزىندە مەيرامحانالار الكوگول ساتپايدى, كاراوكەگە بارماۋ ۇسىنىلعان, سونداي-اق ولار كەشكى 8-گە دەيىن جابىلۋى كەرەك. دۇكەندەر مەن ساۋدا ورتالىقتارىن قوسا العاندا, ءىرى كوممەرتسيالىق نىساندارعا ءبىر ۋاقىتتا رۇقسات ەتىلگەن كەلۋشىلەردىڭ سانى شەكتەلەتىن بولادى. بۇل شەشىم توكيو پاراليمپيادا باستالعاننان ءبىر كۇن وتكەن سوڭ قابىلدانىپ وتىر. بۇل جارىس تا وليمپيا ويىندارى سەكىلدى ىندەتتىڭ تارالۋىنا بايلانىستى كورەرمەنسىز ءوتىپ جاتىر. ەل استاناسىندا سارسەنبىدە 4 228 ادامنىڭ ىندەت جۇقتىرعانى انىقتالعان.
