نيەت پەن ىنتا كەرەك
– سوفيا, الدىمەن توكيو وليمپياداسىنىڭ قولا جۇلدەسىمەن قۇتتىقتايمىز! قازاقستانعا كەلگەننەن كەيىن ەلىڭىز قۇرمەتتەپ, قوشەمەتتەپ جاتىر. جاقىندا پرەزيدەنتتىڭ جارلىعىمەن «قۇرمەت» وردەنىمەن ماراپاتتالدىڭىز. باس باسىلىمنىڭ اتىنان قۇتتىقتاۋىمىزدى قابىل الىڭىز...
– راحمەت. مۇنىڭ بارلىعى حالىقتىڭ قولداۋىمەن بولىپ جاتقان دۇنيە عوي. سىزدەردىڭ گازەتتەرىڭىز ارقىلى قالىڭ قازاق ەلىنە العىس ايتامىن.
– وليمپيادادا جۋرناليستەر ساۋالىنا قازاق تىلىندە جاۋاپ بەرگەنىڭىز قۋانتتى.
– ءيا, مەن قازاق تىلىنەن بولەك, ورىس, اعىلشىن جانە تۇرىك تىلىندە ەركىن سويلەي الامىن.
– بارەكەلدى. ءتورت ءتىلدى قالاي مەڭگەرىپ ءجۇرسىز؟
– ءار نارسەنى ۇيرەنۋ ءۇشىن نيەت پەن ىنتا كەرەك. كورشىلەرىمىزدىڭ كوبى – قازاق وتباسىلارى. كىشكەنتاي كەزىمنەن كورشىلەرىمىزدىڭ سويلەگەنىنە قاتتى قىزىعاتىنمىن. اتا-اناما قازاقشا سويلەگىم كەلەدى دەيتىنمىن. سوسىن ولار مەنى بالاباقشاعا قازاق توبىنا بەردى. كوپ ۋاقىت وتپەي-اق توپتاعى بالالارمەن, كورشىلەرمەن قازاق تىلىندە ەركىن سويلەي باستادىم. مەكتەپتى, ۋنيۆەرسيتەتتى ورىس تىلىندە وقىعانىممەن بۇگىندە قازاق تىلىندە ەركىن سويلەي الامىن. اعىلشىن ءتىلىن جاقسى مەڭگەردىم. تۇرىك ءتىلىن دە كەيىننەن ۇيرەنىپ الدىم.
– وكىنىشكە قاراي, كاراتە سپورتى 2024 جىلعى پاريج وليمپياداسى باعدارلاماسىندا جوق. بۇل ءسىزدىڭ جوسپارىڭىزعا وزگەرىس الىپ كەلە مە؟
– شىنىمدى ايتسام, وليمپياداعا دەيىن وسى حابارعا اسا ءبىر قاتتى نازار اۋدارمادىم. مەنىڭ باستى ماقساتىم توكيودا توپ جارۋ ەدى. بۇعان دەيىن مەن قارسىلاستارىم ءۇشىن «جۇمباق» بولىپ كەلدىم عوي. سونىڭ كوپ كومەگى ءتيدى. وليمپيادادا كاراتە سايىسى جوعارى دەڭگەيدە ءوتتى. حالىقارالىق وليمپيادا كوميتەتى تاعى دا ويلانا جاتار. قالاي بولعاندا دا ءۇمىتىمىزدى ۇزبەيمىز. قانداي جاعداي بولسىن ءبىز ءوز جوسپارىمىزبەن جۇرە بەرەمىز. وسىنداي ادەمى سپورتتى وليمپيادادان الىپ تاستاۋ دۇرىس ەمەس.
– ءيا, توكيودا مەدالدار ساراپقا سالىنعان كاراتەنىڭ «كاتا» مەن «كۋميتەسى» شىنىندا دا ادەمى سپورت ءتۇرى ەكەن. وسىنداي ادەمى سپورتپەن قانشا جاستان باستاپ اينالىسىپ ءجۇرسىز؟
– مەن شىمكەنت قالاسىندا تۋىپ-ءوستىم. التى جاسىمنان باستاپ وسى سپورتپەن «دوسپىن». وتباسىنىڭ جالعىز پەرزەنتىمىن. اكەم وسىدان ءتورت جىل بۇرىن و دۇنيەلىك بولدى. قازىر انام ەكەۋمىز بىرگە تۇرامىز.
كاراتەنىڭ «كاتا» مەن «كۋميتە» تۇرىنە توقتالساق, كەز كەلگەن كاراتەشى الدىمەن «كاتا» سپورتىمەن مىندەتتى تۇردە شۇعىلدانادى. كەيىن قالاۋى بويىنشا «كۋميتەمەن» اينالىسۋعا بولادى. مەن دە وسىنداي كەزەڭنەن ءوتتىم. ءار جەكپە-جەكتىڭ باسىندا اتتارىن جاريالاعان كەزدە ەكى قاتىسۋشى, بىرەۋى قىزىل بەلدىكپەن, ەكىنشىسى كوك بەلدىكپەن الاڭنىڭ شەتىندەگى سىزىقتا «كاتانىڭ» باس تورەشىسىنە قاراپ تۇرادى. تورەشىلەر بريگاداسىنا تاعزىم ەتكەننەن كەيىن كوك بەلدىكتەگى سپورتشى الاڭنىڭ سىرتىنداعى ورنىنا جايعاسىپ, قىزىل بەلدەۋدەگى قارسىلاسىنىڭ ونەرىن تاماشالايدى. قىزىل بەلدەۋدەگى سپورتشى بىرنەشە بولىمنەن تۇراتىن جاتتىعۋىن جاساعاننان كەيىن, كەزەك كوك بەلدەۋدەگى كاراتەشىگە تيەدى. جارىس بىتكەننەن كەيىن ەكى قاتىسۋشى دا الاڭنىڭ شەتىنە ورالىپ, سۋديالاردىڭ شەشىمىن كۇتەدى. ال «كۋميتەدە» وزدەرىڭىز كورگەندەي بىرنەشە سپورتتىڭ ادىستەرى بار. اياقپەن دە, قولمەن دە ءادىس جاساپ, ۇپاي الۋىڭا بولادى.
بۇيىرعان كەتپەيدى...
– وليمپيادا جولداماسىنا قالاي يە بولدىڭىز؟
– وليمپيادا باعدارلاماسىنا كاراتە سپورتىنىڭ ەنگەنى تۋرالى حاباردى ەستىگەندە قاتتى قۋاندىم. وليمپياداعا تىكەلەي جولداما الۋ ءۇشىن الەمدىك رەيتينگتە 1-2-ورىندا بولساڭ, دارحان ءاسادىلوۆ سەكىلدى بىردەن جولداما الاسىڭ. مەن بۇعان دەيىن 68 كيلودان جوعارى سالماقتا سىنعا ءتۇسىپ جۇرگەنمىن. الايدا وليمپياداعا جولداما الۋ ءۇشىن مەنىڭ سالماعىم مەن 68 كيلوعا دەيىنگى سالماق بىرىكتىرىلىپ, الەمدىك رەيتينگ ءتۇزىلدى. مەن ول رەيتينگتە ۇزدىكتەر قاتارىنان كورىنە المادىم. شامامەن 200 ۇپاي جەتپەي قالدى. ودان كەيىن پاريجدە وتكەن ىرىكتەۋ تۋرنيرىنە قاتىستىم. ول تۋرنيردەن دە جولداما الا المادىم. وسىلايشا, قانشا جۇگىرسەم دە وليمپيادا جولداماسى ۋىسىما بىردەن تۇسپەدى. «جۇگىرگەن جەتپەيدى, بۇيىرعان كەتپەيدى», دەگەن راس ەكەن. توكيوداعى دوداعا ءبىر اي قالعاندا بارلىق سالماق بويىنشا ازيا ايماعىنا بەرىلەتىن وليمپيادانىڭ جالعىز جولداماسى ماعان بۇيىرعاندا توبەم كوككە ەكى ەلى جەتپەي قالدى.
– وليمپيادا جەكپە-جەكتەرىنە توقتالساق. شىنىمدى ايتسام, «ا» توبىنداعى قارسىلاستارىڭىزدى كورىپ, ءسىزدى توپتان شىعا المايدى-اۋ دەگەن كۇمان بولدى. سوعان قاراماستان توپتان سۋىرىلىپ شىقتىڭىز. العاشقى قارسىلاسىڭىز تۇرىك سپورتشىسىنا قانداي تاكتيكا قولداندىڭىز؟
– ءيا, راسىندا دا قارسىلاستارىم وسال ەمەس. ەۋروپا, الەم چەمپيوناتتارىندا جۇلدە العان اككى كاراتەشىلەر. العاشقى قارسىلاسىم ءۇش دۇركىن ەۋروپا چەمپيونى, الەم چەمپيوناتىنىڭ ەكى دۇركىن جۇلدەگەرى تۇركيالىق مەلتەم حودجاوگلۋ ەدى. كەزدەسۋ 5:5 ەسەبىمەن اياقتالىپ, العاشقى ءبىر ۇپايىمدى ەنشىلەدىم. تەڭ تۇسكەن جاعدايدا ەرەجە بويىنشا كەزدەسۋدە كىم ءبىرىنشى ۇپايىن ەنشىلەيدى, سوعان جەڭىس بەرىلۋ كەرەك-تۇعىن. الايدا تۇرىك سپورتشىسى جەكپە-جەك بارىسىندا بىرنەشە ەسكەرتۋ العاننىڭ كەسىرىنەن تەڭ ناتيجەگە قاناعات تۇتتى.
– كەلەسى قارسىلاسىڭىز ەۋروپا ويىندارىنىڭ جەڭىمپازى, الەم چەمپيوناتىنىڭ بىرنەشە دۇركىن جۇلدەگەرى سيلۆيا سەمەرارو بولاتىن. مۇنداي ازۋلى قارسىلاستى ۇلكەن ۇپاي ايىرماشىلىعىمەن جەڭۋ وڭاي بولماعان شىعار...
– ءبىز وليمپيادا الدىندا بارلىق قارسىلاسىمىزعا تىڭعىلىقتى دايىندالدىق. كەيبىرىمەن جارىستاردا كەزدەستىك. يتاليالىق كاراتەشى جاقىن قاشىقتا اياعىن وتە جىلدام سەرمەپ ۇپاي جيناپ الاتىنىن بىلەمىز. سوندىقتان وعان ارا قاشىقتىقتى ۇستاپ وتىرىپ, قارىمتا شابۋىلعا تۇسپەي ۇپاي جيناپ وتىردىم. ناتيجەسىندە, قارسىلاسىمنىڭ مىقتىلىعىنا قاراماستان 5:1 ەسەبىمەن ۇتتىم.
– ال الەم چەمپيونى, ەۋروپانىڭ ەكى دۇركىن جەڭىمپازى يرينا زارەتسكايامەن بولعان جەكپە-جەكتە قارسىلاسىڭىزدان گورى ءسىز «فاۆوريت» بولدىڭىز ەمەس پە؟!
– كەزىندە ۋكراينا اتىنان شىعىپ, الەم, ەۋروپا چەمپيوناتىنىڭ قولا جۇلدەگەرى اتانعان, بۇگىندە ازەربايجان قۇراماسى ساپىندا ەۋروپا ويىندارىنىڭ, الەم, ەۋروپا بىرىنشىلىكتەرىنىڭ باس جۇلدەسىنە يە بولعان يرينا زارەتسكايا – رەيتينگتە ءبىرىنشى ورىندا تۇرعان سپورتشى. بۇل قىزدى مەن بۇرىننان تانيمىن. سوندىقتان وعان قارسى قۇرعان تاكتيكامىز جەمىسىن بەردى. ومىرىمدەگى ەڭ ماڭىزدى كەزدەسۋىمدە جەڭىسكە جەتەتىنىمە سەنىمدى بولدىم.
باستاپقى جيىرما سەكۋند ىشىندە بىردەن ەكى ۇپاي جينادىم. مۇنداي بەلسەندىلىكتى مەنەن كۇتپەگەن قارسىلاسىم بىردەن ەسىن جيناپ, بىرنەشە سوققى جاساپ 3:2 ەسەبىمەن العا شىقتى. ەسەپتە جەڭىلىپ جاتسام دا ساسپادىم, كەرىسىنشە بارىنشا سابىرلىلىق تانىتىپ, ءوز مۇمكىندىگىمدى كۇتتىم. بەلسەندى شابۋىلداردان كەيىن ەسەپ 4:4 بولدى. جەكپە-جەكتىڭ اياقتالۋىنا ساناۋلى سەكۋند قالعاندا, جاساعان سوققىم ءدوپ ءتيىپ, جەڭىستى ج ۇلىپ الدىم. ناتيجەسى – 5:4. وسى جەڭىستەن كەيىن بەس ۇپايعا يە بولىپ, مەرزىمىنەن بۇرىن جارتىلاي فينالعا ءوتتىم.
– سوڭعى كەزدەسۋدە جاپوندىق سپورتشىدان ويسىراي جەڭىلگەنىڭىزدىڭ سەبەبى نەدە؟
– مەندە جۇرت بىلە بەرمەيتىن جاراقات كوپ. جاپونيالىق ايۋمي ۋەكۋسامەن بولعان سوڭعى كەزدەسۋ ەشتەڭە شەشپەگەندىكتەن, جاراقات الماي, كەزدەسۋدى تەزىرەك اياقتاۋ جوسپارى بولدى. ەسەپتى جاپوندىق اشقانىمەن, ارتىنشا «يۋكي» الىپ, 1:1 ەسەبىمەن تەڭەستىردىم. بىراق مويىنداۋ كەرەك, ايۋمي ماعان قارسى جەكپە-جەكتە بەلسەندى بولدى. از ۋاقىت ىشىندە ءدال سوققى بەرە الدى, سودان كەيىن «يپپون» جاسادى. ناتيجەسىندە, 5:1 ەسەبىمەن جەڭىپ كەتتى.
– جارتىلاي فينالدا مىسىرلىق كاراتەشىدەن ءبىر عانا ۇپايمەن جەڭىلدىڭىز. جەڭىسكە جەتۋ ءۇشىن نە جەتپەدى؟
– ايتا بەرسەك, سەبەپ كوپ. مەنىمەن ەكىنشى جەكپە-جەكتە كەزدەسكەن يتاليالىق سيلۆيا سەمەرارو مەن جارتىلاي فينالدا «ايقاسقا» تۇسكەن فەريال ابدەلازيز بيىل پاريجدە وتكەن وليمپيادالىق ىرىكتەۋ جارىسىندا فينالدا كەزدەسىپ, يتاليالىق جەڭىسكە جەتكەن ەدى. سوندىقتان ەكەۋىن دە جاقسى تانيمىن. مىسىرلىق كاراتەشى بىرنەشە ءىرى تۋرنيرلەردە ولجا سالعان. سوعان قاراماستان مەنىڭ ودان باسىم تۇسەتىن مۇمكىندىگىم كوپ ەدى. ادىستەرىمدى دۇرىس پايدالانا المادىم. بابىم كەلىپ تۇرعانىمەن بۇل كەزدەسۋدە باعىم جانبادى. سەبەبى, مۇنىڭ الدىنداعى كەزدەسۋلەردە 5:4, 5:5 ەسەبى تىركەلىپ, بارلىعى مەنىڭ پايداما شەشىلدى. ال فەريال ابدەلازيزبەن وتكەن تارتىستى جەكپە-جەكتە 4:5 ەسەبىمەن قارسىلاسىما جول بەردىم.
– قولا جۇلدە دە كەرەمەت ناتيجە عوي. ماراپاتتاۋ ساتىندە كوز جاسىڭىزعا ەرىك بەردىڭىز. بۇل قۋانىشتىڭ كوز جاسى ما, الدە؟..
– وعان دا سەبەپ كوپ. بىرىنشىدەن, قارسىلاسىمنان ايقىن جەڭىلگەن جوقپىن. ەگەر دە تاعى 3-4 سەكۋند ۋاقىت بولعاندا ونى ايقىن جەڭەتىن ەدىم. فينالعا جولداما العان مىسىرلىق قارسىلاسىم وليمپيادا چەمپيونى اتاندى. ەكىنشىدەن, قازاق ەلىنە, جەرلەستەرىمە التىن مەدال الىپ بەرە الماعانىم ءۇشىن كۇيىندىم. ۇشىنشىدەن, مارقۇم بولعان اكەمنىڭ, سونداي-اق بىلتىر 31 جەلتوقساندا ومىردەن وتكەن اكەمىزدەي بولعان ۇستازىمىز جاستالاپ ساناۋوۆتىڭ وسى جەڭىسىمىزدى كورە الماي كەتكەنى ەسىمە ءتۇستى. وزدەرىڭىز بىلەسىزدەر, جاستالاپ ساناۋوۆ – ەلىمىزدە كاراتەنىڭ دامۋىنا ولشەۋسىز ۇلەس قوسقان ازامات.
سوڭعى مۇمكىندىكتى ءمۇلت جىبەرۋگە بولمايدى
– توكيو دوداسىندا ەل دارحان اسادىلوۆتەن التىن مەدال كۇتتى. وعان بيىك تۇعىردان كورىنۋ ءۇشىن نە جەتپەدى دەپ ويلايسىز؟
– كوماندامىزدىڭ كوشباسشىسى دارحان اسادىلوۆتەن ەل التىن مەدال كۇتكەنى راس. وعان سەبەپ تە جوق ەمەس ەدى. دارحان الەمدىك رەيتينگتە كوش باستاپ تۇر. 60 كيلو وليمپيادا باعدارلاماسىندا بولماعاندىقتان, دارحانعا 67 كيلوعا دەيىنگى سالماقتا سىنعا ءتۇسۋ قيىندىق تۋعىزدى دەپ ويلايمىن. ونىڭ ۇستىنە وليمپيا ويىندارىنداعى قارسىلاستارى دا وسال بولمادى. جاپونيالىق ناوتو ساگو 2018 جىلعى الەم چەمپيوناتىنىڭ كۇمىس جۇلدەگەرى, يتاليالىق اندجەلو كرەششەنتسو 2018 جىلعى الەم چەمپيونى جانە فرانتسيالىق ستيۆەن دا كوستا 2018 جىلعى الەم چەمپيونى, ءۇش دۇركىن ەۋروپا چەمپيونى اتانعان اككى سپورتشىلار ەدى. ناق وسى فرانتسۋز جارتىلاي فينالدا دارحاننان باسىم ءتۇسىپ,
توكيو وليمپياداسىنىڭ چەمپيونى اتاندى. سوعان قاراماستان قازاقستاننىڭ سپورت تاريحىندا كاراتەدەن تۇڭعىش رەت وليمپيادانىڭ جۇلدەسىن الىپ بەرگەن دارحان جارادى.
– كومانداداعى ەڭ جاس سپورتشىلاردىڭ ءبىرى – ءمولدىر جاڭبىربايدىڭ دا جۇلدەگەرلەر قاتارىنان كورىنۋگە زور مۇمكىندىگى بار ەدى عوي. وعان نە بولدى؟
– ءمولدىر جارىستى ءساتتى باستاعانىمەن, توپتان شىعا الماي قالدى. ول الدىمەن مىسىر قىزىن ۇتتى. ەكىنشى كەزدەسۋدە اۋستريالىق سپورتشىدان باسىم ءتۇسىپ تۇرىپ, جەڭىلىپ قالدى. كەيىن ۋكراينا قىزىن دا جەڭىپ تۇرىپ, جەكپە-جەك اياقتالۋىنا 2-3 سەكۋند قالعاندا جەڭىستى بەرىپ قويدى. ءمولدىر ۆ توبىندا سىنعا ءتۇسىپ, ەكى كەزدەسۋدە جەڭىلدى. ءبىر كەزدەسۋدە تەڭ ءتۇستى. ال ءبىر جەكپە-جەكتى جەڭىسپەن اياقتادى. نەگىزى, ءمولدىردىڭ دايىندىعى وتە جوعارى ەدى. الايدا ءبىر قاتەنى ەكى كەزدەسۋدە جىبەرىپ, ەسەپتە الدا تۇرعان جەرىنەن ۇتىلدى. اۋستريالىق سپورتشىمەن وتكەن كەزدەسۋدە جوق جەردەن قاتە جىبەرىپ, سول قاتەلىك توپتاعى بۇكىل جاعدايدى شەشىپ كەتتى.
– نۇرقانات اجىقانوۆ پەن دانيار يۋلداشەۆتى ماماندار اۋىر توپقا ءتۇستى دەيدى...
– كوماندامىزدىڭ ەڭ جاس مۇشەسى 20 جاستاعى نۇرقانات تۋرالى ءبىراز اڭگىمە ايتۋعا بولادى. ول ەرەسەكتەر دوداسىنا بار-جوعى ءۇشىنشى رەت قاتىسىپ وتىر. ءتىپتى بۇرىن-سوڭدى رەيتينگ ءۇشىن ۇپاي بەرىلەتىن پرەمەر-ليگا دودالارىنا دا قاتىسپاعان. جاس مولشەرىنە بايلانىستى ءىرى باسەكەلەردەن سىرت قالسا دا, توكيو تورىندە ايگىلى چەمپيوندارمەن تەرەزەسى تەڭ ونەر كورسەتتى. ازۋلى قارسىلاستارىنان وسال بولعان جوق. نەگىزى, ونىڭ سالماعىندا ەرمەك اينازاروۆ ەل نامىسىن قورعاپ ءجۇردى. بىراق تىزەسىنەن جاراقات العان سوڭ, سوڭعى ليتسەنزيالىق تۋرنيردە باپكەرلەر نۇرقاناتقا سەنىم ارتتى. فرانتسيادا وتكەن وليمپيادالىق ىرىكتەۋ تۋرنيرىندە توپ جارىپ, كىشىگىرىم سەنساتسيا جاسادى. وليمپيادادا نۇرقانات العاشىندا اۋستراليا وكىلى تسۋنزاري ياحيرونى سەنىمدى ۇتتى. ال گەرمانيالىق نوا بيتششكە كەزدەسۋدىڭ اياقتالۋىنا 3-4 سەكۋند قالعاندا ۇپاي بەرىپ قويدى. بۇل دا تاجىريبەنىڭ ازدىعىنان, ءىرى جارىستاردىڭ دۋىنا تۇسپەگەننەن دەپ ويلايمىن. كەيىن يتاليالىق سپورتشى, ەكى دۇركىن الەم چەمپيونى لۋيدجي بۋسانى ۇتقاندا مامانداردىڭ نازارى نۇرقاناتقا بىردەن اۋدى. سەبەبى وليمپيادادا بۋسانى تەك نۇرقانات قانا جەڭدى. كەيىن ازەربايجاندىق رافاەل اگاەۆكە 2:3 ەسەبىمەن جول بەردى. توكيودا نۇرقانات نەمىس سپورتشىسىنا ۇپاي بەرمەگەندە, توپتان شىعىپ, كەم دەگەندە قولا مەدال جەڭىپ الار ەدى. ال دانيار يۋلداشەۆ وتە اۋىر توپقا ءتۇستى. شىنى كەرەك, وسى سالماقتا ا جانە ۆ توپتارىندا تەپە-تەڭدىك بولعان جوق دەيدى ماماندار. ءۇشىنشى كەزدەسۋگە دەيىن دانياردىڭ جارتىلاي فينالعا شىعاتىن مۇمكىندىگى بولدى. بىراق رەيتينگتە ءبىرىنشى تۇرعان تۇركيالىق سپورتشىدان جەڭىلگەن سوڭ, مەدالدان ءۇمىتىن ءۇزدى.
– وليمپياداعا دەيىن توكيو دوداسىنان جۇلدەلى بولامىن دەپ ويلادىڭىز با؟
– كاراتە وليمپيادا باعدارلاماسىنا تۇڭعىش رەت ەنگەنىن بىلەسىزدەر. ونىڭ ۇستىنە, كەلەسى ويىن باعدارلاماسىندا بولمايتىندىقتان, مەن ءۇشىن بۇل جالعىز ءارى ۇلكەن مۇمكىندىك ەدى. بارلىق سپورتشى مۇنى جاقسى ءتۇسىندى. وليمپيادا الدىندا ءاربىر جەكپە-جەكتە جەڭىسكە جەتەمىن دەپ ماقسات قويعانمىن. وسى دودادا بارىمدى سالدىم دەپ ويلايمىن.
– كاراتەنىڭ قازاقستانداعى دەڭگەيى قانداي؟
– كاراتەدەن قازاقستان سپورتشىلارىنىڭ بولاشاعى زور. ويتكەنى كوماندا جاس. 34 جاستاعى دارحان اسادىلوۆتەن باسقالارى 20-22 جاستا. ءوزىمىز دە جاسپىز. ەلىمىزدە وكشەمىزدى باسىپ كەلە جاتقان جۇزدەگەن مىقتى سپورتشى بار. باسەكەلەستىك بار جەردە ناتيجە دە جاقسى بولادى. قازاقستان كاراتەشىلەرى الەمدە ەڭ مىقتى كوماندالاردىڭ ءبىرى ەكەنىن توكيودا دالەلدەدى دەپ ويلايمىن. وكىنىشتىسى, بار بولعانى 60-قا جۋىق سپورتشى وليمپياداعا قاتىستى. بۇل شامامەن 400-گە جۋىق سپورتشى قاتىسقان دزيۋدومەن, 130-عا جۋىق سپورتشى قاتىسقان تاەكۆوندومەن, 300-گە جۋىق سپورتشى قاتىسقان بوكسشىلارمەن سالىستىرۋعا كەلمەيدى. 60 سپورتشى التى سالماق دارەجەسىنە بولىنسە, ءار سالماقتا ون سپورتشىدان عانا باق سىنادى. كەيبىر اتلەتتەر ءۇشىن وليمپيادا چەمپيونى اتانعاننان گورى, ويىنعا جولداما الۋ قيىنىراق سوقتى. سوعان قاراماستان التى سالماق دارەجەسىندە قازاقستان بەس جولداما الدى. بۇل – ۇلكەن كورسەتكىش.
– جوسپارىڭىزدى بولىسسەڭىز؟
– قاراشا, جەلتوقسان ايلارىندا الەم چەمپيوناتى مەن ازيا چەمپيوناتى وتەدى. بۇيىرتسا, سول دودالاردا چەمپيون اتانىپ, ەلدى تاعى ءبىر قۋانتسام دەيمىن.
– اڭگىمەڭىزگە راحمەت, التىن جۇلدەڭىز كوپ بولسىن!
– راحمەت, ايتقانىڭىز كەلسىن. گازەت ۇجىمىنا شىعارماشىلىق تابىس تىلەيمىن. وقىرماندارىڭىز كوپ بولسىن.
اڭگىمەلەسكەن
الماس ماناپ,
«Egemen Qazaqstan»
