باسىلىمنىڭ مالىمەتتەرىنە سايكەس, «تاليبان» ساياسي قاناتىنىڭ جەتەكشىسى ابدۋل عاني بارادار مەن اسكەري كوميسسياسىنىڭ جەتەكشىسى موۋلاۆي ياكۋب, قوزعالىستىڭ نەگىزىن قالاۋشى موللا وماردىڭ ۇلى, سونداي-اق «حاككاني جەلىسى» ديۆەرسيالىق توبىنىڭ جەتەكشىسى سيراجۋددين حاككاني كەڭەستەگى ەڭ ىقپالدى ءۇش ادام بولۋى مۇمكىن.
باسىلىمنىڭ حابارلاۋىنشا, تالىبتەر اۋعانستاندا پرەزيدەنت نەمەسە باسقا جەكە كوشباسشى لاۋازىمىن قالپىنا كەلتىرگىسى كەلمەيدى. سونىمەن بىرگە ولار اقش قولداعان بۇرىنعى ۇكىمەتتىڭ كەيبىر مۇشەلەرىنە جاڭا كابينەتتە مينيسترلىك لاۋازىمداردى ۇسىنۋعا نيەتتى. وسىلايشا, ولار حالىقارالىق قاۋىمداستىقتا تانىلۋ مۇمكىندىگىن ارتتىرۋ ءۇشىن مۇمكىندىگىنشە ينكليۋزيۆتى بولىپ كورىنەتىن ۇكىمەت قۇرعىسى كەلەدى.
