ول ەلىمىزدىڭ تاريحىندا تۇڭعىش رەت ايەلدەر اراسىنداعى ۇلتتىق حوككەي ليگاسىندا (NHL) ونەر كورسەتتى. بۇلبۇل – حوككەيدەن قازاقستان ۇلتتىق قۇراماسىنىڭ مۇشەسى. قازىرگى تاڭدا ول اقش-تاعى جاسوسپىرىمدەر حوككەي كلۋبىنىڭ ءبىرىن جاتتىقتىرىپ ءجۇر. ول نيۋ-دجەرسي شتاتىنداعى High School بازاسىندا جاتتىعاتىن Princeton Tiger Lilies team 14U AA Black كومانداسىنا جەتەكشىلىك ەتەدى.
بۇلبۇل جامبىل وبلىسى تۇرار رىسقۇلوۆ اۋدانىنا قاراستى كوگەرشىن اۋىلىندا دۇنيەگە كەلگەن. ول بالا كۇنىنەن سپورتقا قىزىعىپ ءوسىپتى. سوندىقتان شىعار, كوگەرشىندە قىزدارعا ارنالعان سەكتسيا بولماعاندىقتان, 7 جاسىندا بوكسقا جازىلعان.
«اجەم ماعان بال قوسىلعان ىستىق ءسۇت ىشكىزىپ, باۋىرىممەن بىرگە جاتتىعۋ زالىنا جىبەرەتىن. قىسقا عانا شاشىم بار, سپورت كيىمىن كيىپ الىپ, ءماز بولىپ كەتەتىنمىن. وسىلايشا ەكى اي ءجۇردىم. ەكى ايدان سوڭ اۋىلعا اۋداننان جاتتىقتىرۋشىلار كەلىپ, 7 جاستاعى مەنى ۇل ەكەن دەپ ويلاپ, وزدەرىمەن بىرگە الىپ كەتپەكشى بولعان. بىراق جاتتىقتىرۋشىلارىم اجەمنىڭ مەنى ەشقايدا جىبەرمەيتىنىن جانە الدىندا تۇرعان ۇل ەمەس, قىز بالا ەكەنىن ايتتى», دەپ ەسكە الادى حوككەيشىنىڭ ءوزى.
الدىنا قويعان ماقساتىنا جەتپەيىنشە تىنىم تاپپايتىن ەڭبەكقور ادامدار بولادى عوي. بۇلبۇل ءدال سونداي ادام. بالالارمەن بىرگە جۇدىرىقتاسىپ ءجۇرىپ, كەيىننەن كۇرەسكە اۋىسادى. الايدا قىز بالا ءۇشىن بۇل سپورتتىڭ وڭايعا سوقپايتىنى بەلگىلى. سوندىقتان بۇلبۇلدىڭ اتا-اناسى ونىڭ كۇرەسپەن اينالىسۋىنا قارسى شىعادى.
كەيىنىرەك, بۇلبۇل 12 جاسقا تولعاندا وتباسىمەن بىرگە الماتى قالاسىنا كوشىپتى. قارشاداي قىز قاراپ جاتپاي, سپورتشى بولسام دەگەن ارمانىنا ۇمتىلا تۇسەدى. ءسويتىپ, قالاداعى اۋەسقوي فۋتبول سەكتسياسىنا جازىلادى. بىراق ساباق پەن الاڭنىڭ اراسىندا جۇگىرىپ ءجۇرۋ وڭاي ەمەس. مۇنى تۇسىنگەندىكتەن, اتا-اناسى بۇلبۇلدى سپورت-ينتەرناتقا وقۋعا جىبەرەدى.
بۇلبۇلدىڭ ۇلكەن سپورتتاعى باسپالداعى وسى كەزدە باستالدى دەسەك, قاتەلەسپەيمىز. مەكتەپتە قىزدارعا ارنالعان فۋتبول ۇيىرمەسى جوق ەكەن. دەگەنمەن, حوككەي ويناۋعا مۇمكىندىك مول. ءومىرى اياعىنا كونكي بايلاپ كورمەگەن قىز ايدىنعا ابايلاپ شىعادى. بىراق روليك تەۋىپ ۇيرەنگەندىكتەن, مۇزدا سىرعاناۋ قيىندىق تۋعىزباپتى.
شايبا مەن تاياقتى جانىنا سەرىك ەتكەن بۇلبۇل بەس جىل مەكتەپ كومانداسىندا وينايدى. ءسويتىپ ءجۇرىپ ۋنيۆەرسياداعا قاتىستى. تالانتىنىڭ ارقاسىندا 18 جاسىندا ۇلتتىق قۇراماعا شاقىرتۋ دا الدى.
ءبىر قىزىعى, بۇلبۇل 2 جىل رەگبي دە ويناعان ەكەن. وسى سپورتپەن اينالىسىپ جۇرگەندە ەلوردادا «توميريس» حوككەي كلۋبى قۇرىلىپ جاتقانىن ەستيدى. «قۇلاننىڭ قاسۋىنا مىلتىقتىڭ باسۋى» ساي كەلىپ, كوماندا ساپىنا ەنەدى. كوپ ۇزاماي ونى كلۋب كاپيتانى ەتىپ تاڭدايدى.
«التىنشى سىنىپتا وقىپ جۇرگەندە, حوككەيگە اۋىستىم. تاڭەرتەڭگى جاتتىعۋعا ۇلگەرۋ ءۇشىن ۇيقىدان تاڭعى ساعات بەستە تۇراتىنمىن. العاشىندا الماتىداعى «جۇلدىز» كومانداسىندا وينادىم. سوسىن جاستار قۇراماسىنا ءوتىپ, سلوۆاكيادا, رەسەيدە وتكەن الەم بىرىنشىلىكتەرىنە باردىم. 2011 جىلى ۇلتتىق قۇراماعا ءوتتىم. سول جىلى الماتىدا وتكەن قىسقى ازيادا ويىندارىنا قاتىسۋعا جاسىم جەتپەي قالدى...
2 جىلعا جۋىق ۋاقىت جاتتىققان سوڭ, ءبىزدى ەشكىم قارجىلاندىرمايتىن بولدى. سوسىن مەن رەگبيگە اۋىسىپ, سول سپورت تۇرىنەن سپورت شەبەرىنە كانديداتتىعىمدى قورعادىم. انە-مىنە رەگبي قۇراماسىنا كىرەم دەپ جۇرگەندە, استانادا ەندى اشىلىپ جاتقان «توميريس» حوككەي كومانداسىنا شاقىرتۋ الدىم», دەيدى بۇلبۇل.
بۇلبۇلدىڭ ايتۋىنشا, مۇحيت اسىپ, امەريكاعا بارۋ تۋرالى وي وعان 16 جاسىندا سلوۆاكيادا وتكەن الەم چەمپيوناتىنا جۇرگەندە كەلەدى. سودان باستاپ جاتسا دا, تۇرسا دە شەتەل اسۋعا اڭسارى اۋادى.
ءسويتىپ جۇرگەندە تانىمال جاتتىقتىرۋشى سەمي دجو سمولدىڭ كوزىنە تۇسەدى. بۇلبۇل اعىلشىن ءتىلىن جەتىك بىلەتىندىكتەن, ءبىر-ءبىرىن جاقسى ءتۇسىنىپ, ەمەن-جارقىن تىلدەسەدى. حوككەيشى قىزدىڭ تالانتىن بايقاعان جاتتىقتىرۋشى ونى كاناداعا شاقىرىپتى.
«كانادادا Calgary Coyote كومانداسىنا قوسىلدىم. العاشىندا جات ەلدە ويناۋ قورقىنىشتى ەدى. بىراق ارتقا شەگىنبەۋىم قاجەت ەكەنىن ءتۇسىندىم. شەتەل دەپ كەلگەن سوڭ ءوزىڭنىڭ عانا ەمەس, ەلىڭنىڭ نامىسىن قورعاۋىڭ كەرەك. باستى ماقساتىم – NHL-گە قوسىلۋ ەدى. كانادا ارقىلى امەريكاعا باردىم. 2019 جىلى جازىمدى مينەسسوتتادا وتكىزدىم. كەيىننەن نيۋ-يورك, نيۋ-دجەرسي كوماندالارىنىڭ ىرىكتەۋىنەن ءوتتىم. 16 تامىز كۇنى ماعان ەكى كوماندا حابارلاسىپ, كەلىسىمشارت ۇسىندى. قۋانىشىمدا شەك بولمادى», دەيدى بۇلبۇلدىڭ ءوزى.
ءسويتىپ قارشاداي قىز نيۋ-دجەرسي شتاتىنداعى مونمۋت دجانكشەن قالاسىنىڭ «مەتروپوليتەن ريۆەتەرس» كلۋبىنىڭ ساپىنا قوسىلدى. بۇلبۇلدىڭ شەبەرلىگىنە «ريۆەتەرستىڭ» باس مەنەدجەرى دە جوعارى باعا بەرگەنى ەسىمىزدە.
«قارتانباەۆانىڭ شەبەرلىگى, ويىنعا ادالدىعى ونى جانكۇيەرلەردىڭ سۇيىكتى ويىنشىسىنا, كوماندامىزدىڭ بەلدى مۇشەسىنە اينالدىرارى ءسوزسىز», دەيدى كەيت ۆيتمان ەننيس.
بۇلبۇل سەگىز قىرلى, ءبىر سىرلى دەسەك قاتەلەسپەيمىز. ول بوس ۋاقىتىندا ءتۇرلى ۆولونتەرلىك ءىس-شارالارعا قاتىسادى. ءبىر قىزىعى, «توميريس» ساپىندا ويناپ جۇرگەندە ول ەلوردادا وتەتىن جارمەڭكەلەردە پەچەنە ءپىسىرىپ ساتقان.
ء«بىر كۇنى الدەبىر امەريكالىق سايتتى اقتارىپ وتىرعانىمدا, قىزىلدى-جاسىلدى پەچەنە كوزىمە وتتاي باسىلدى. ءبىراز اقپاراتقا قانىققان سوڭ, كاسىپكەرلىك كۋرسىنداعى تانىستارىما ءوزىمنىڭ پەچەنە پىسىرگىم كەلەتىنىن ايتتىم. ولار مەنىڭ ويىمدى قالجىڭ دەپ قابىلداپ, كۇلدى دە قويدى. مەن عالامتورعا حابارلاندىرۋ جازعاننان كەيىن جۇرتتان تاپسىرىس تۇسە باستادى», دەيدى بۇلبۇل.
بۇلبۇلدىڭ ارمانى كوپ. ول ايەلدەر حوككەيىن دامىتۋعا ۇلەس قوسقىسى كەلەدى. قازىرگى تاڭدا وسى ماقساتتا ەڭبەك ەتىپ ءجۇر.
