سقو وڭىرلىك كوممۋنيكاتسيالار قىزمەتىندە ءبىلىم باسقارماسى جاڭا وقۋ جىلىنا دايىندىق بارىسى جايىندا ءمالىم ەتتى.
باسقارما باسشىسى گۇلميرا كارىموۆانىڭ ايتۋىنشا, وڭىردە 75 316 وقۋشى بار. بۇل – وتكەن جىلمەن سالىستىرعاندا 2,5 مىڭعا كوپ. العاش رەت 8 مىڭ ءبۇلدىرشىن ءبىرىنشى سىنىپقا بارادى. ونىڭ جارتىسىنان استامى پەتروپاۆلدىڭ ۇلەسىندە. بيىل وڭىردە 472 مەكتەپ جۇمىس ىستەمەك.
جاڭا وقۋ جىلىندا 6: اقجار اۋدانىندا – 1 مەكتەپ, اققايىڭ اۋدانىندا – 1, ەسىل اۋدانىندا – 1, جامبىل اۋدانىندا – 2, قىزىلجار اۋدانىندا – 1 مەكتەپ جابىلدى. بۇل باستاۋىش مەكتەپتەردە نەبارى 4 وقۋشىدان عانا وقىعان.
«وبلىستاعى مەكتەپتەردىڭ 361-ءى – 78 %-ى شاعىن جيناقتى مەكتەپتەر. جاڭا وقۋ جىلىندا 298 ەلدى مەكەننەن 2 074 بالانى تاسىمالداۋ جوسپارلانعان, ونىڭ ىشىندە كۇن سايىن 1261 وقۋشى, اپتا سايىن 813 وقۋشى تاسىمالدانادى. بۇل ماقساتقا 124 اۆتوكولىك بار, ونىڭ 42-ءسى بىلتىر, 18-ءى بيىل ساتىپ الىندى», دەيدى گۇلميرا كارىموۆا.
ەگەر وقۋشى نەمەسە مۇعالىم اۋىرۋ جۇقتىرسا, سىنىپ قاشىقتان وقىتۋ فورماتىنا كوشەدى.
«قاشىقتان وقىتۋعا كوشكەن جاعدايدا وقۋشىلارعا كومپيۋتەر بەرىلەدى. ءبىرىنشى كەزەكتە كومپيۋتەرلەر تابىس دەڭگەيى تومەن وتباسىلاردان شىققان بالالارعا ۇلەستىرىلەدى. بىلتىر وبلىسقا 14 مىڭنان استام كومپيۋتەرلىك تەحنيكا ساتىپ الىندى. بۇگىنگى تاڭدا مەكتەپتەردە 25 مىڭنان استام كومپيۋتەر بار. ءبىلىم وردالارى 100 % ينتەرنەتپەن قامتىلعان. 62 مەكتەپ ينتەرنەتكە سپۋتنيكتىك بايلانىس ارقىلى قوسىلعان. كەڭ جولاقتى ينتەرنەتكە 455 مەكتەپ قوسىلدى. ايىرتاۋ اۋداننىڭ مەكتەپتەرىن ينتەرنەتتىڭ وسى تۇرىنە قوسۋ ءۇشىن جەرگىلىكتى بيۋدجەتتەن 15 ملن تەڭگە ءبولىندى. بۇگىنگى تاڭدا جابدىقتاردى ساتىپ الۋ جونىندە جۇمىستار جۇرگىزىلىپ جاتىر», دەيدى باسقارما باسشىسى.
