سپورت • 22 تامىز، 2021

توپتىق كەزەڭگە جاقىنداي ءتۇستى

43 رەت كورسەتىلدى

ەۋروكۋبوك باسەكەلەرىنە قاتىسىپ جاتقان قازاقستاننىڭ ەكى كومانداسى وتكەن اپتادا پلەي-وفف كەزەڭىندەگى العاشقى ويىندارىن وتكىزدى. بيىلعى ەۋرودودا ويىندارىن چەمپيوندار ليگاسىنان باستاپ، ءۇشىنشى دەڭگەيلى جارىس سانالاتىن كونفەرەنتسيا ليگاسىنا دەيىن ءتۇسىپ قالعان الماتىنىڭ «قايراتى» اتالعان ءتۋرنيردىڭ توپتىق كەزەڭىنە ءبىرتابان جاقىنداي ءتۇستى. ال قازاقستاندىق كوماندالار اراسىندا كۇنى بۇگىنگە دەيىن سەنساتسيا جاساپ كەلگەن قاراعاندىنىڭ «شاحتەرى» ءۇشىن كۇزگى ماۋسىمنىڭ اۋىلى الىس­تاپ كەتكەن سياقتى.

چەمپيونداردى جولدان تايدىرعان كوماندا

«قايرات» كونفەرەنتسيا ليگاسىنىڭ پلەي-وفف كەزەڭىندە وسى جارىستا ءتاۋىر ويىن كورسەتىپ كەلە جاتقان «فولا» كومانداسىمەن كەزدەستى. قازاقستاندىق كوماندا سياقتى ليۋكسەمبۋرگ كلۋبى دا بىلتىر ءوز ەلىنىڭ چەمپيونى اتانىپ، بيىلعى ەۋروكۋبوك ويىندارىن چەمپيوندار ليگاسىنان باستاعان بولاتىن. العاشقى اينالىمدا ولار ءوز الاڭىندا گيبرالتار ەلىنىڭ «لينكولن» كومانداسىمەن كەزدەسىپ، ءبىرىنشى ويىندا 2:2 ەسەبىمەن تەڭ تۇسكەن ەدى. بىراق سىرت الاڭداعى ماتچتا قارسىلاستارىنان 5:0 ناتيجەسىمەن جەڭىلىپ، كونفەرەنتسيا ليگاسىنا ءتۇسىپ قالدى. ەرەجە بويىنشا، چەمپيوندار ليگاسىنىڭ العاشقى ىرىكتەۋ كەزەڭىندە جەڭىلگەن كوماندا بىردەن كونفەرەنتسيا ليگاسىنا جول تارتادى. ءسويتىپ «فولا» سۋ جاڭا جارىستىڭ ەكىنشى كەزەڭىندە بەلارۋس چەمپيونى – «شاح­تەر» كلۋبىنا تاپ كەلدى. سوليگورسكىنىڭ كومانداسى دا بيىلعى ماۋسىمدى چەمپيوندار ليگاسىندا باستاپ، العاشقى اينالىمنان كەيىن كونفەرەنتسيا ليگاسىنا ءتۇسىپ قالعان. بۇل تەكەتىرەستە «فولا» ەكى ماتچتىڭ قورىتىندىسى بويىنشا 3:1 (2:1، 1:0) ەسەبىمەن جەڭىسكە جەتىپ، ءۇشىنشى كەزەڭگە جولداما الدى. تاعى ءبىر ايتا كەتەرلىگى، «شاحتەر» كلۋبىن 2018-2019 جىلدارى قازاقستاندا جۇمىس ىستەپ، ەلوردانىڭ «استاناسىن» جاتتىقتىرعان ۋكراينالىق مامان رومان گريگورچۋك باپتاعان ەدى. وسى جەڭىلىستەن كەيىن ول ءوز قىزمەتىنەن كەتۋگە ءماجبۇر بولدى.

ليۋكسەمبۋرگ ۇجىمى كەلەسى اينالىمدا سولتۇستىك يرلانديا چەمپيونى – «لينفيلدپەن» كەزدەسىپ، ەكى ويىندا دا 2:1 ەسەبىمەن جەڭىسكە جەتتى. ءسويتىپ 600 مىڭنان اسا عانا حالقى بار شاعىن مەملەكەتتىڭ ۇجىمى كونفەرەنتسيا ليگاسىنىڭ پلەي-وفف كەزەڭىنە ءبىر-اق شىقتى. كىل چەمپيونداردى جولدان تايدىرعان «فولا» توپتىق كەزەڭگە جولداما بەرەتىن ويىندا قازاق­ستان چەمپيونىنا قارسىلاس اتاندى. بىراق بۇل ۇجىمنىڭ العاشقى ويىندا «قايراتقا» شامالارى جەتپەدى.

ليۋكسەمبۋرگتەگى «جوزي بارتەل» ستاديو­نىن­دا وتكەن ءبىرىنشى ماتچتا الماتىلىقتار الاڭ يەلەرىن ەش قيىندىقسىز جەڭدى. ويىنداعى العاشقى گولدى «فولا» فۋتبولشىلارى سوقتى. كەزدەسۋدىڭ 19-مينۋتىندا بوسنيالىق فۋتبولشى ميرزا مۋستافيچ مەرگەندىگىمەن كوزگە ءتۇسىپ، جەرگىلىكتى جانكۇيەرلەردى قۋانىشقا بولەدى. بىراق ارادا 9 مينۋت وتكەندە ارتۋر شۋشەناچەۆ ۆاگنەر لاۆتىڭ پاسىنان كەيىن تارازى باسىن تەڭەستىرىپ كەتتى. ال 37-مينۋتتا بۇل جولى ا.شۋشەناچەۆ برازيليالىق فۋتبولشىعا ناتيجەلى پاس شىعارىپ بەردى. ءوز كەزەگىندە ۆاگنەر لاۆ تاماشا گول سوعىپ، كومانداسىن ەسەپتە العا شىعاردى. ءبىرىنشى تايم اياقتالار تۇستا «قايرات» ويىنشىلارى تابلوداعى كورسەتكىشتى 3:1-گە جەتكىزدى. جۋىردا عانا الما­تىلىق كوماندانىڭ قۇرامىن تولىقتىرعان پور­تۋگاليالىق جارتىلاي قورعاۋشى ريكاردۋ الۆەش­تىڭ 43-مينۋتتا ايىپ الاڭىنىڭ سىرتى­نان باعىتتاعان سوققىسى قاقپا تورىندا تۋلادى. بۇل – الۆەشتىڭ «قايرات» ساپىنداعى العاشقى گولى.

ەكىنشى تايمدا دا «قايرات» ويىنشىلارى باسىمدىقتى ءوز قولدارىندا ۇستادى. 69-مينۋتتا قارسىلاس كوماندانىڭ ويىنشىسى ءوز الاڭىندا ءتارتىپ بۇزىپ، تورەشى 11 مەترلىك ايىپ دوبىن بەلگىلەدى. پەنالتيدى ءساتتى ورىنداعان ۆاگنەر لاۆ ويىننىڭ نۇكتەسىن قويدى. قورىتىندى ەسەپ – 4:1. وسىلايشا «قايرات» كونفەرەنتسيا ليگاسىنىڭ توپتىق كەزەڭىنە ءبىر اياعىمەن شىعىپ تۇر دەسە دە بولادى. الداعى بەيسەنبى كۇنى وتەتىن قارىمتا كەزدەسۋدە الماتىلىق ۇجىمعا تەڭ ويىن دا جەتكىلىكتى. «قايرات» الماتىداعى ورتالىق ستاديوندا دەڭگەيى جاعىنان وزىنەن الدەقايدا تومەن كلۋبتان جەڭىلە قويماس.

قايرات

 توپتىق كەزەڭنەن ءۇمىت بار

كونفەرەنتسيا ليگاسىنىڭ بۇعان دەيىنگى كەزدەسۋلەرىنىڭ ءبىرىنشى ويىنىن سىرت الاڭدا وتكىزىپ، قارىمتا كەزدەسۋلەردە پەنالتي سەريا­سى بويىنشا قارسىلاستارىنان باسىم ءتۇسىپ كەلە جاتقان قاراعاندىنىڭ «شاحتەرى» پلەي-وفف كەزەڭىندە ء«داستۇردى» بۇزىپ، العاشقى ويىنىن قازاقستاندا وتكىزدى. ەلورداداعى «استانا ارەنادا» ءيزرايلدىڭ ەڭ مىقتى كوماندالارىنىڭ ءبىرى سانالاتىن تەل-ءاۆيۆتىڭ «ماككابيىمەن» كەزدەسكەن جەرلەستەرىمىز قولدا تۇرعان جەڭىسىنەن ايىرىلىپ قالدى. كەزدەسۋدىڭ ەسەبىن «شاحتەر» فۋتبولشىلارى اشقانىمەن، «كەنشىلەر» كومانداسى ەكى مينۋتتا ەكى گول وتكىزىپ الدى.

بىلتىرعى ەۋروپا ليگاسىنىڭ توپتىق كە­زە­ڭىندە ونەر كورسەتىپ، ەكىنشى ورىنمەن پلەي-وفف ساتىسىنا دەيىن جەتكەن «ماككابي» قارا­عاندىلىق كوماندانىڭ وسى جارىستاعى ەڭ ازۋلى قارسىلاسى سانالادى. بىراق بيىل يزرايل كوماندالارىنىڭ قارقىنى بىلتىرعىداي قاتتى ەمەس ەكەنى بايقالادى. ماسەلەن، الماتىنىڭ «قايراتى» چەمپيوندار ليگاسىنىڭ ءبىرىنشى كەزەڭىندە حايفانىڭ «ماككابيىن» ەكى ويىن قورىتىندىسى بويىنشا 3:1 ەسەبىمەن جەڭسە، تەل-ءاۆيۆتىڭ كومانداسى وتكەن ويىندا قازاق­ستان چەمپيوناتىندا تومەنگى ورىنداردا كەلە جاتقان «شاحتەردى» 2:1 ناتيجەسىمەن ارەڭ جەڭدى.

«شاحتەر» مەن «ماككابي» اراسىنداعى ءبىرىنشى كەزدەسۋدە الاڭ يەلەرى گول سوعىلعان ۋاقىتقا دەيىن قورعانىستا وتە ساۋاتتى ويىن كورسەتتى. نەگىزىنەن قارىمتا شابۋىلعا يەك ارتقان ماگومەد اديەۆ شاكىرتتەرى كەزدەسۋدىڭ ەسەبىن ءبىرىنشى بولىپ اشتى. الاڭعا ەكىنشى تايمدا شىققان يدريس ۋماەۆ ارادا ءبىر مينۋت وتكەننەن سوڭ ەسكەندىر قىبىرايدىڭ پاسىنان كەيىن ادەمى گول سوعىپ، كومانداسىنا باسىمدىق سىيلاعان ەدى. بىراق قازاقستاندىق جانكۇيەرلەردىڭ قۋانىشى ۇزاققا سوزىلمادى. 75-مينۋتتا قوناقتار ساپىنان اۆي ريكان مەرگەندىك تانىتىپ، تارازى باسىن تەڭەستىرسە، 77-مينۋتتا ەدەن شامير اۋتتان اسىرىلعان پاستى باسىمەن قاقپاعا ءدال باعىتتاپ، كومانداسىنا جەڭىس سىيلادى.

ەندى «شاحتەر» 26 تامىزدا يزرايلدەگى «بلۋمفيلد» ستاديونىندا قارسىلاستارىن جەڭىپ، كونفەرەنتسيا ليگاسىنىڭ توپتىق كەزەڭىنە شىعۋدى كوزدەيدى. وعان قاراعاندىلىقتاردىڭ تولىق مۇمكىندىگى بار.

سوڭعى جاڭالىقتار

اسىل اعانىڭ شاراپاتى

رۋحانيات • كەشە

قۇيماقۇلاق

رۋحانيات • 26 قازان، 2021

قوعامنىڭ بىتەۋ جاراسى

قوعام • 26 قازان، 2021

گاز باعاسى نەگە قىمبات؟

ايماقتار • 26 قازان، 2021

فرانتسيا تىزگىنى ءۇشىن تايتالاس

ساياسات • 26 قازان، 2021

ەربوسىن ۇلىن اۋىر سىناق كۇتىپ تۇر

كاسىپقوي بوكس • 26 قازان، 2021

ۇقساس جاڭالىقتار