ءبىلىم ورداسىنىڭ ءباسپاسوز قىزمەتى ۇسىنعان اقپاراتقا سۇيەنسەك, زياتكەرلىك مەكتەپتىڭ وقۋشىلارى بىرىككەن ۇلتتار ۇيىمىنا «تۇراقتى دامۋدىڭ ماقساتى – مەملەكەتتەر اراسىنداعى تەڭسىزدىكتى تومەندەتۋ» جوباسىن ۇسىنعان ەكەن. MINIBOSS حالىقارالىق بيزنەس-مەكتەبىمەن بىرلەسە ازىرلەنگەن جوبا الەمنىڭ 150 ەلىنەن قاتىسۋشىلار اراسىنداعى ۇزدىك اتانىپ, ءبىلىم گرانتىن جەڭىپ الدى. جالپى سوماسى 3 مىڭ ەۋرو كولەمىندەگى ءبىلىم بەرۋ گرانتى وقۋشىلارعا كاسىپكەرلىك نەگىزىن مەڭگەرۋگە, سونداي-اق ستارتاپ يدەيانى ىسكە اسىرۋدى باستاۋعا مۇمكىندىك بەردى.
ال 10-سىنىپتىڭ وقۋشىلارى ءالي ازامات ۇلى مەن ءاليا دىندەربايدىڭ جوباسى دا نازار اۋدارارلىق. ولار قارت ادامدارعا ارنالعان جوبا ازىرلەگەن.
– جوبانىڭ باستى يدەياسى – زەينەت جاسىنداعى ادامداردى ءارتۇرلى كۋرسقا قاتىستىرۋ ارقىلى ءوزىن ءوزى دامىتۋعا ۇندەۋ. ءبىلىم بەرۋ, ونەر جانە سپورت ويىندارىنا قاتىستى كۋرستار مەن شەبەرلىك سىنىپتارىن ۇسىندى. جىل باسىندا «قارتتار مارافونى» جوباسى ۇلتتىق بايقاۋدا فينالعا شىعىپ, حالىقارالىق دەڭگەيدە ەل نامىسىن قورعاۋ قۇقىعىنا يە بولدىق, – دەيدى بۇۇ قولداعان بىلگىر وقۋشىلار.
ونلاين فورماتىندا وتكەن بايقاۋ قورىتىندىسىندا اتىراۋلىق وقۋشىلاردىڭ جوباسى ۇزدىكتەر قاتارىنا قوسىلىپ, بۇۇ-نىڭ التىن مەدالىن جەڭىپ الدى. لايىقتى قارتتىقتى قولدايتىن الەۋمەتتىك جوبا ءومىر بويى ءبىلىم الۋ جانە زەينەتكەرلەردى قوعامدىق ومىرگە تارتۋ مۇمكىندىگى بار ەكەنىن دالەلدەپ وتىر.
اتىراۋ وبلىسى
