«بۇگىن جولعا 137 اۆتوبۋس شىعۋى كەرەك ەدى. ەش سەبەپ ايتپاي 80 جۇرگىزۋشى جۇمىسقا شىقپاي قالدى.
№24, 26, 15, 7, 11 سەكىلدى باعىتتار توقتاپ تۇر. حابارلاما دا بەرمەدى. نەگىزى ولار ەلەكتروندى بيلەت ەنگىزگەن سوڭ ەكىنشى دەڭگەيلى بانك ارقىلى بانك كارتاسىن اشۋى كەرەك ەدى. كەيبىرى بۇدان باس تارتتى. ويتكەنى نەسيە قارىزى, اليمەنتى بار, سالىقتى تولەمەگەن. ال بانك كارتاسى بار ادامدار جالاقىسىن الىپ وتىر. شىنىنا كەلگەندە, ءبارىنىڭ كارتاسى جوق دەپ ايتا المايمىن. كەيبىرى ءبىر-ءبىرىن قولداپ, بۇگىن جۇمىسقا كەلمەدى», دەدى «اۆتوپارك» جشس ديرەكتورىاعارىس تىلەۋلەسوۆ.
ونىڭ ايتۋىنشا, ەلەكتروندى بيلەت تولەم جۇيەسى ەنگىزىلگەنىمەن, تابىس ارتپاعان. تەحنيكالىق قاجەتتىلىك, سالىق پەن جانار-جاعارماي, جۇرگىزۋشىلەردىڭ جالاقىسىن كوتەرۋ كىرىستى ارتتىرۋعا مۇمكىندىك بەرمەگەن.
«قازىر جۇرگىزۋشىلەر 120-300 مىڭ تەڭگە ارالىعىندا جالاقى الادى. ولاردىڭ ەڭبەكاقىسى جۇمىس جۇكتەمەسىنە قاراي ەسەپتەلەدى. ەكى اي مۇمكىندىك بەرىلدى. بانك كارتاسى بولماسا ەندى قولما-قول بەرە المايمىز. قازىر 40-50 پايىزى جالاقى الا الماي ءجۇر», دەدى اعارىس تىلەۋلەسوۆ.
تاڭەرتەڭ جۇرگىزۋشىلەردىڭ جۇمىسقا شىقپاي قالعانىن ەستىگەن ەڭبەك ينسپەكتسياسىنىڭ وكىلدەرى دە سەرىكتەستىككە باردى.
«بۇگىن تاسىمالداۋ كومپانياسىنىڭ جۇمىسشىلارىنان ارىز-شاعىم تۇسپەدى. دەگەنمەن جۇرگىزۋشىلەر جۇمىسقا شىقپاي قالعان سوڭ سەبەبىن بىلۋگە كەلىپ تۇرمىز. سەبەپسىز, نەگىزسىز جۇمىسقا كەلمەسە, تارتىپتىك جازا قولدانىلۋى مۇمكىن. ونىڭ ءتورت ءتۇرى بار. ءتىپتى جۇمىستان شىعارۋعا قۇقىلى», دەدى وبلىستىق ەڭبەك ينسپەكتسياسى باسقارماسى باسشىسىنىڭ ورىنباسارى تالعات يسكارين.
