الماتى وبلىسى پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە, بۇل وقيعا 17 تامىزدا ساعات 22:00 شاماسىندا «الماتى-وسكەمەن» اۆتوجولىندا بولعان.
انىقتالعانداي «تويوتا كامري» كولىگىندە الماتى وبلىسى ىلە اۋداندىق پوليتسيا ءبولىمىنىڭ ەكى ينسپەكتورى بولعان. ولار 21 جاستاعى مۇحتار نۇرتىلەۋ جانە 23 جاستاعى سانجار وماربەك. ەكەۋى دە وقيعا ورنىندا تىلگە كەلمەستەن كوز جۇمدى. ءۇشىنشى پوليتسەي, 21 جاستاعى ماقسات رامازان ءتۇرلى دەنە جاراقاتىمەن اۋرۋحاناعا ءتۇستى.
الماتى وبلىستىق پوليتسيا دەپارتامەنتىنىڭ باستىعى الەۋمەتتىك جەلى ارقىلى جۇرگىزگەن تىكەلەي ەفير بارىسىندا وقيعانى راستادى.
سونىمەن قاتار مارقۇمداردىڭ جاقىندارىنا كوڭىل ايتتى.
«الدىن الا مالىمەتتەر بويىنشا, «تويوتا كامري» ماركالى اۆتوكولىگىنىڭ جۇرگىزۋشىسى الماتى-وسكەمەن اۆتوجولىنىڭ بويىمەن سولتۇستىك باعىتتا 46 كم ءجۇرىپ ءوتىپ, الدىڭعى سول جاق دوڭعالاڭى تەسىلىپ, سونىڭ سالدارىنان اۆتوكولىك 90 گرادۋسقا بۇرىلعان. وسى ساتتە ونىڭ ارتىنان كەلە جاتقان «حيۋنداي اكتسەنت» ماركالى اۆتوكولىك جوعارىدا اتالعان اۆتوكولىكپەن سوقتىعىسقان.
جول اپاتىنىڭ سالدارىنان وقيعا ورنىندا «تويوتا كامري» كولىگىنىڭ جۇرگىزۋشىسى مەن ونىڭ جولاۋشىسى كوز جۇمدى», دەلىنگەن اتالعان ۆەدومستۆونىڭ ءباسپاسوز قىزمەتى تاراتقان حابارلامادا.
سونداي-اق «وتەگەن باتىر» كەنتىندەگى ورتالىق اۋرۋحاناعا ءتۇرلى جاراقاتتارمەن وسى كولىكتىڭ تاعى ءبىر جولاۋشىسى جەتكىزىلدى.
اتالعان دەرەك بويىنشا قر قك 345-بابىمەن قىلمىستىق ءىس قوزعالدى. ءتيىستى ساراپتامالار تاعايىندالدى
