سارسەنبىدەن باستاپ يزرايلدە ادامداردىڭ جينالۋىنا شەكتەۋ جاريالانىپ, الەۋمەتتىك ارا قاشىقتى مىندەتتەۋ قايتا ەنگىزىلدى.
جاڭا ەرەجە قوعامدىق ورىندارعا كىرۋگە رۇقسات ەتىلگەن ادامدار سانىن شەكتەيدى. ولاردىڭ اراسىندا كوپتەگەن مادەني جانە سپورت شارالارى مەن نىساندار بار.
مۇنداي ورىندار تەك Green Pass رۇقساتناماسى بار ازاماتتارعا عانا اشىق. رۇقساتناما ادامنىڭ ۆاكتسينا العانىن, جازىلىپ شىققانىن نەمەسە جاقىندا كوروناۆيرۋسقا تەست تاپسىرىپ, تەرىس ناتيجە كورسەتىلگەنىن راستايدى.
وسىلايشا, ءوز ەركىمەن ۆاكتسينا الماعان نەمەسە ەكپە الۋعا مۇمكىندىگى بولماعان ادامدار باسسەينگە, جاتتىعۋ زالىنا, سپورت جانە مادەني شارالارعا, كونفەرەنتسياعا, مۇراجايعا, كىتاپحاناعا, مەيرامحانا مەن قوناق ۇيگە كىرەر كەزدە COVID-19-عا تەستىلەۋدىڭ تەرىس ناتيجەسىن كورسەتۋى كەرەك.
ودان بولەك, 3-12 جاس ارالىعىنداعى بالالار مەيمانحانا, شارالارعا ارنالعان زالدار مەن مەيرامحانالار سياقتى كوپ ادام قاتىساتىن جابىق جەرلەرگە كىرەر كەزدە كوروناۆيرۋس تەستىنىڭ تەرىس ناتيجەسىن كورسەتۋى ءتيىس.
جاڭا ەرەجە ساۋدا ورتالىقتارىنان باسقا بارلىق كاسىپورىندارعا قولدانىلادى. سەيسەنبى كۇنى جاڭا شەكتەۋ شارالارى ەنگىزىلەر الدىندا يزرايلدە 8 716 جاڭا كوروناۆيرۋس جۇقتىرۋ جاعدايى تىركەلگەن بولاتىن. دەنساۋلىق ساقتاۋ ورگاندارىنىڭ ايتۋىنشا, بۇل وسى جىلدىڭ 1 اقپانىندا ەنگىزىلگەن رەكوردتان اسىپ ءتۇستى.
ءيزرايلدىڭ دەنساۋلىق ساقتاۋ مينيسترلىگىنىڭ حابارلاۋىنشا, بۇگىنگى كۇنى 579 ادامنىڭ جاعدايى اۋىر, سكرينينگتەن وتكەن ناۋقاستاردىڭ 6,2%-ى COVID-19-عا تەستىنىڭ وڭ ناتيجەسىن كورسەتكەن.
وسى اپتادا يەرۋساليمدەگى ەۆرەي ۋنيۆەرسيتەتىنىڭ زەرتتەۋشىلەرى تامىزدىڭ اياعىندا ەلدە ءبىر اپتا ىشىندە COVID-19-دان ءولىم سانى 150-دەن 250-گە دەيىن كوتەرىلەتىنىن بولجايتىن ەسەپتى جاريالادى.
