«Sinopharm كومپانياسىنىڭ Vero Cell ۆاكتسيناسى ەندى شىمكەنتتىكتەرگە قولجەتىمدى. قالاعا جەتكىزىلگەن 40 مىڭ دوزا ەكپە ەمحانالارعا ۇلەستىرىلىپ بەرىلدى. Vero Cell ۆاكتسيناسى الەمنىڭ 45 ەلىندە, سونىڭ ىشىندە قىتاي, بىرىككەن اراب امىرلىكتەرى, تۇركيا, سەربيا, بەلارۋس, باحرەين جانە باسقا ەلدەردە ءساتتى قولدانىلادى. دۇنيەجۇزىلىك دەنساۋلىق ساقتاۋ ۇيىمى Vero Cell ۆاكتسيناسىن وسى جىلدىڭ 7 مامىرىنان باستاپ پايدالانۋعا ماقۇلدادى», دەپ حابارلادى باسقارما باسشىسى.
قالانىڭ باس دارىگەرى بۇل ۆاكتسينانىڭ ەرەكشەلىگىن دە اتاپ ءوتتى. ونىڭ ايتۋىنشا, ۆاكتسينانى ساقتاۋدا قاتاڭ تالاپتاردىڭ بولماۋى رەسۋرس جەتىسپەۋشىلىگى جاعدايىندا وتە ىڭعايلى. بۇل الەمدەگى امپۋلاسى ارنايى مونيتورمەن قامتاماسىز ەتىلگەن العاشقى ۆاكتسينا. اتالعان مونيتور جاپسىرما ۆاكتسينانى جىلى ورتاعا سالعان كەزدە ءتۇسىن وزگەرتەدى, بۇل مەديتسينا قىزمەتكەرلەرىنە ونى پايدالانۋ كەزىندە قاۋىپسىزدىك تالاپتارىنىڭ ساقتاۋعا مۇمكىندىك بەرەدى.
قازىر قالادا بەس ءتۇرلى ۆاكتسينا بار. ولار: قاراعاندى قالاسىندا شىعارىلاتىن رەسەيلىك «سپۋتنيك V», قازاقستاندىق QazVac, ءباا ەلىندە دايىندالعان Sinopharm كومپانياسىنىڭ HayatVax ەكپەسى, قىتايدىڭ Sinovac Biotech كومپانياسى جاساپ شىعارعان Coronavac جانە Sinopharm كومپانياسىنىڭ Vero Cell ۆاكتسيناسى.
«قۇرمەتتى قالا تۇرعىندارى, ۆاكتسيناتسيا كوروناۆيرۋسقا قارسى قورعانىستىڭ جالعىز ءارى ءتيىمدى ءادىسى. سولاي عانا ءبىز قالىپتى ومىرىمىزگە ورالا الامىز», دەپ جازادى شىمكەنت قالاسى اكىمدىگىنىڭ ءباسپاسوز قىزمەتى.
