ەلباسى بەكىتكەن ۇلت جوسپارىنىڭ 68-قادامىندا ازاماتتىق اۆياتسيا سالاسىن باسقارۋدىڭ جاڭا مودەلىنە كوشۋ كوزدەلگەن. وعان قول جەتكىزۋ ءۇشىن ازاماتتىق اۆياتسيا كوميتەتى قازاقستاننىڭ اۆياتسيالىق اكىمشىلىگىمەن تىزە قوسىپ, بىرلەسكەن شارالاردى جۇزەگە اسىردى. بىرلەسكەن جۇمىستاردىڭ ناتيجەسى حالىقارالىق ازاماتتىق اۆياتسيا ۇيىمى تاراپىنان جوعارى باعالاندى.
دالىرەك ايتساق, ICAO وسى جىلدىڭ 2-11 تامىزى ارالىعىندا ۇشۋ قاۋىپسىزدىگى بويىنشا تەكسەرۋ جۇرگىزدى. ونىڭ الدىن الا بەلگىلى بولعان قورىتىندىلارىنا سايكەس, قازاقستاننىڭ ICAO ستاندارتتارىنا سايكەس كەلەتىنى ناقتىلانىپ قويماي, ۇشۋ قاۋىپسىزدىگىن قامتاماسىز ەتۋ دەڭگەيىن 84 پايىزعا دەيىن كوتەردى.
اتاپ ايتقاندا, كەلەسىدەي باعىتتار ايتارلىقتاي جاقسى ناتيجە كورسەتتى. نەگىزگى اۆياتسيالىق زاڭناما (LEG) ستاندارتى 61 پايىزدان 81 پايىزعا دەيىن ءوستى. ازاماتتىق اۆياتسيا ۇيىمى (ORG) ستاندارتى 37 پايىزدان 75 پايىزعا دەيىن جوعارىلادى. اەروناۆيگاتسيالىق قىزمەت كورسەتۋ (ANS) دەڭگەيى 87 پايىزدان 95 پايىزعا كوتەرىلدى. اۋەايلاقتار جانە جەردەگى قىزمەت كورسەتۋ (AGA) باعىتى دا جاقسى ءوسىم كورسەتتى – 56 پايىزدان 90 پايىزعا جوعارىلادى. اۆياتسيالىق وقيعالار مەن ينتسيدەنتتەردى تەكسەرۋ (AIG) ستاندارتى 47 پايىزدان 53 پايىزعا جەتتى.
وسىلايشا, قازاقستان ەۋروپالىق ۇشۋ قاۋىپسىزدىگى اگەنتتىگىنە (EASA) مۇشە ەلدەر اراسىنداعى ICAO ستاندارتتارىنا سايكەستىكتىڭ ورتاشا دەڭگەيىنە قول جەتكىزدى (84 پايىز). اتالعان كورسەتكىش بويىنشا قازاقستان ەۋروپانىڭ كوپتەگەن ەلىنەن جوعارى تۇر. دالىرەك ايتساق, ءبىزدىڭ ەل نيدەرلاند (87 پايىز), بەلگيا (87 پايىز), پورتۋگاليا (87 پايىز), چەحيا (87 پايىز), لاتۆيا (86 پايىز), دانيا (85 پايىز), يسلانديا (84 پايىز), پولشا (84 پايىز), سلوۆەنيا (82 پايىز), كيپر (82 پايىز) سياقتى ەۋروپا مەملەكەتتەرىمەن ءبىر دەڭگەيدە ورنالاسقان.
حالىقارالىق ازاماتتىق اۆياتسيا ۇيىمىنىڭ بۇل جولعى تەكسەرۋى قازاقستاننىڭ ازاماتتىق اۆياتسيا سالاسىن باسقارۋداعى جاڭا ءتاسىلدى جانە ۇشۋ قاۋىپسىزدىگىن قامتاماسىز ەتۋدى باقىلاۋ كەزىندە بۇرىن انىقتالعان ەسكەرتۋلەردى جويۋىن, سونداي-اق سىننان ناتيجە شىعارىپ, جاڭاشىلدىقتاردى ەنگىزۋىن ناقتى باعالاۋعا باعىتتالعان.
جالپى, ICAO سالانى رەتتەۋدە ايتارلىقتاي وزگەرىستەر بولعان جاعدايدا عانا تەكسەرۋدى باستايدى. قازاقستاننىڭ ۇلت جوسپارىنا سايكەس, ەلدەگى ۇشۋ قاۋىپسىزدىگىن باقىلاۋ مەن قاداعالاۋدى جۇزەگە اسىرۋ مودەلىن ترانسفورماتسيالاۋ جونىندەگى باستاماسى ICAO-نىڭ شتاب-پاتەرى مەن ەۋروپالىق وڭىرلىك كەڭسەسى تاراپىنان جوعارى باعالاندى.
ICAO-عا مۇشە مەملەكەت اۋديتورلارى جۇرگىزگەن تاۋەلسىز باعالاۋ دا وڭ ناتيجە كورسەتتى. اۋديتورلار ازاماتتىق اۆياتسيا كوميتەتى مەن قازاقستاننىڭ اۆياتسيالىق اكىمشىلىگىنىڭ جۇرگىزگەن جەمىستى جۇمىسىن جوعارى باعالاپ, باسقارۋدىڭ جاڭا ءتاسىلى ىسكە قوسىلعان ساتتەن باستاپ قول جەتكىزىلگەن ەلەۋلى پروگرەستى اتاپ ءوتتى.
قازاقستاندا ۇشۋ قاۋىپسىزدىگىنە قاتىستى ايتارلىقتاي ەسكەرتۋلەردىڭ بولماۋى ءۇشىنشى ەلدەردىڭ پايدالانۋشىسى اۆتوريزاتسيالاعاننان كەيىن اۋە كومپانيالارىنا ەۋروپالىق وداق ەلدەرىنە رەيستەردى ەركىن ورىنداۋعا مۇمكىندىك بەرەدى.
بۇگىنگى تاڭدا قازاقستاندا وتاندىق اۋە كومپانيالارىن ەۋروپالىق كوميسسيانىڭ «قارا تىزىمىنە» ەنگىزەرلىكتەي قاۋىپ جوق. سونداي-اق شەتەلدەرگە ۇشۋعا سانكتسيالار نەمەسە شەكتەۋلەر ەنگىزۋگە دە ەشقانداي نەگىز جوق.
