وسى جىلدىڭ مامىر ايىندا عانا قىزمەتىنە كىرىسكەن ەلشى حانىم مەيىرىمدى جانە جومارت حالقى بار وسى ادەمى ەل تۋرالى بۇرىننان ەستىگەنىن, ونىڭ سولتۇستىك پەن وڭتۇستىك ايماقتارىن ارالاپ ۇلگەرگەنىن, وسى مەرزىم ارالىعىندا قازاقستاندى جاڭا قىرىنان تانىعانىن ايتتى.
ء«بىزدىڭ ەلدەرىمىزدىڭ اراسىنداعى ەجەلگى جانە تاريحي قاتىناستار 2000 جىلدان استام ۋاقىت بۇرىن پايدا بولعان. ەلدەر اراسىندا تاۋارلارمەن ۇنەمى جانە تۇراقتى الماسۋ بولدى. ەڭ باستىسى, يدەيالار جانە مادەني ىقپال الماسۋ دا بايقالدى. مەن, ەكىجاقتى قاتىناستار تۇرعىسىنان, ستراتەگيالىق ارىپتەستەردىڭ ەكەۋى دە – ءۇندىستان دا, قازاقستان دا وزدەرىنىڭ ءتيىستى قاسيەتتەرىن تولىققاندى كورسەتكەنىن قۋانا مالىمدەيمىن. 2019 جىلعى ماۋسىمدا ارىس قالاسىنداعى وق-دارىلەر قويماسىنداعى جارىلىستان كەيىن ءۇندىستان قازاقستانعا قالپىنا كەلتىرۋ وپەراتسيالارىنا كومەكتەسۋ جانە قۇرباندار سانىن ازايتۋ ءۇشىن بومبالاردى زالالسىزداندىرۋ بويىنشا كۇشەيتىلگەن كوستيۋمدەر بەردى. قازىرگى COVID-19 پاندەمياسىنىڭ ءورشۋى كەزىندە ءۇندىستان ۇكىمەتى گيدروكسيحلوروحين ءدارى-دارمەگىن قازاقستانعا COVID-19-بەن كۇرەستە گۋمانيتارلىق كومەك رەتىندە جىبەردى. سول سياقتى بيىل ءبىز تاپ بولعان داعدارىس كەزىندە قازاقستان ۇندىستانداعى پاندەميامەن كۇرەسۋ ءۇشىن ارنايى رەيسپەن مەديتسينالىق جابدىقتار جەتكىزدى, سول ءۇشىن ءبىز قازاقستان حالقىنا ريزاشىلىعىمىزدى بىلدىرەمىز. وسىنداي تەرەڭ تۇسىنىستىكپەن جانە ءبىر-بىرىمىزگە دەگەن ءوزارا سىيلاستىقپەن ءبىزدىڭ ەكىجاقتى قاتىناستارىمىز ءۇشىن زور الەۋەت بار ەكەنىن كورىپ وتىرمىن», دەدى شۋبدارشيني تريپاتي.
بۇگىنگى تاڭدا ءۇندىستان – كوپتەگەن ازىق-ت ۇلىك جانە اۋىل شارۋاشىلىعى تاۋارلارىنىڭ, ونىڭ ىشىندە ءسۇت جانە جەمىس-جيدەكتەردىڭ ءىرى ءوندىرۋشىسى, سونداي-اق بيداي, كۇرىش, شاي جانە ماقتانىڭ ەكىنشى ءىرى ءوندىرۋشىسى.
ەلشى حانىم ناقتىلاپ وتكەندەي, ءۇندىستان – IT قىزمەتتەرىنىڭ ەڭ ءىرى ورتالىقتارىنىڭ ءبىرى. الەمدەگى 20 ۇزدىك IT كومپانيالاردىڭ بەسەۋى – ءۇندى كومپانيالارى. ءۇندىستاننىڭ تەحنولوگيالىق كومپانيالارى ءوسۋدى قامتاماسىز ەتەدى, قورلارعا, دەنساۋلىق ساقتاۋعا, ءبىلىم الۋعا قول جەتىمدىلىكتى ارتتىردى, جۇمىس ورىندارىن قۇردى جانە كەدەيشىلىك دەڭگەيىن ازايتتى.
ءۇندىستاننىڭ عارىش سالاسىنداعى جەتىستىكتەرى بۇكىل الەمگە ايگىلى. سوڭعى 75 جىل ىشىندە ءۇندىستان ءارتۇرلى الەۋمەتتىك-ەكونوميكالىق سالالاردا وتە تەز دامىدى, الداعى 10-15 جىلدا الەمدەگى ەڭ ءىرى ەكونوميكالىق مەملەكەتتەر ۇشتىگىنە كىرەدى دەگەن ءۇمىت بار.
ءۇندىستان ءوزىنىڭ ستارتاپتارعا نەگىزدەلگەن ەكوجۇيەسىمەن تانىمال. ساراپشىلار بۇل ەل الەمدەگى ەڭ جاس كاسىپكەرلەردىڭ وتانى ەكەنىن ايتادى. بۇل دەرەكتى ەلشىنىڭ سوزىمەن ناقتىلاساق, ۇندىستانداعى كاسىپكەرلەردىڭ ورتاشا جاسى 27-گە تەڭ.
ءۇندىستان ەلشىسى ديپلوماتيالىق ەڭبەك جولىن 1991 جىلى باستاسا, قازاقستان – ەلشى رەتىندە كەلىپ وتىرعان ەكىنشى ەلى.
