جىل سايىن قازاقستان حالقىنا ارنالعان مەملەكەت باسشىسىنىڭ جولداۋى ەلدىڭ الەۋمەتتىك-ەكونوميكالىق الەۋەتىن ودان ءارى جاقسارتۋعا باعىتتالعان باستى قۇجات بولىپ ەسەپتەلەدى. بۇل تۋرالى «24 kz» حابارلادى.
ەلباسى بيىلعى جولداۋىندا قازاق ەلى وتكەن جيىرما ەكى جىلدا قىرۋار ءىس تىندىرعانىن, ۇلگىلى دامۋدىڭ وزىندىك مودەلىن قالىپتاستىرعانىن اتاپ ءوتتى. سونىڭ ەڭ باستىسى, «قازاقستان-2050» ستراتەگياسىنىڭ قابىلدانۋى دەر ەدىك. «ستراتەگيا – كۇننەن كۇنگە, جىلدان جىلعا ەلىمىزدى, قازاقستاندىقتاردىڭ ءومىرىن جارقىن ەتە تۇسەتىن ناقتى پراكتيكالىق ىستەر باعدارلاماسى. بىراق, نارىقتىق جاعدايدا اسپاننان ناپاقا كۇتپەي, ءتيىمدى ەڭبەكتەنۋ كەرەكتىگىن اركىم-اق ءتۇسىنۋى ءتيىس. مەملەكەتتىڭ مىندەتى – وسىعان بارلىق جاعدايدى جاساۋ. مەن الەمنىڭ وزىق ەلدەرى اراسىنداعى وتانىمىزدىڭ لايىقتى بولاشاعى عانا قازاقستاندىقتاردى ماڭگىلىككە بىرىكتىرەتىنىنە سەنىمدىمىن.
بۇگىن مەن دامىعان 30 ەلدىڭ قاتارىنا كىرۋ جوسپارىمىزدى ۇسىنعىم كەلەدى. مەنىڭ تاپسىرمام بويىنشا ۇكىمەت ناقتى تۇجىرىمداما جوباسىن جاسادى. وسى جولداۋداعى مەنىڭ تاپسىرمالارىم ەسكەرىلە وتىرىپ جوندەلگەننەن كەيىن تۇپكىلىكتى بەكىتىلەتىن بۇل قۇجاتتى جالپى العاندا قولدادىم. كوپتەگەن بولجامدار بويىنشا, الداعى 15-17 جىل قازاقستاننىڭ اۋقىمدى سەرپىلىسى ءۇشىن «مۇمكىندىكتەر كوزى» بولماق. بۇل كەزەڭدە سىرتقى ورتانىڭ قولايلىلىعى, رەسۋرستارعا, ەنەرگياعا جانە ازىق-ت ۇلىككە سۇرانىستىڭ ارتۋى, ءۇشىنشى يندۋستريالىق توڭكەرىستىڭ ءپىسىپ-جەتىلۋى ساقتالادى. ءبىز بۇل كەزەڭدى پايدالانا بىلۋگە ءتيىسپىز», - دەدى پرەزيدەنت بيىلعى جولداۋىندا ونىڭ ماڭىزىن جۇرتشىلىققا ءتۇسىندىرىپ.
ەندى «قازاقستان» ,«24 kz», «حابار» تەلەارنالارى ارقىلى جولداۋعا بايلانىستى قازاقستانداعى شەتەلدىك ديپلوماتتار مەن ەلىمىز ازاماتتارىنىڭ ايتقان پىكىرلەرىن بەرە كەتكەندى ءجون سانادىق:
سلايمان ارابيات, يوردانيانىڭ قازاقستانداعى توتەنشە جانە وكىلەتتى ەلشىسى:
قازاقستان دۇرىس باعىتتا كەلەدى. 2050 جىلعا دەيىنگى ستراتەگيا ءساتتى باستالدى. پرەزيدەنتتىڭ ساياسي ۇستانىمىنىڭ ارقاسىندا قازاقستان الەمدىك قارجى داعدارىسىنا توتەپ بەردى. حالىق تا ەل باسشىسىن قولداپ وتىر. ويتكەنى, ولاردىڭ ماقساتى ءبىر – دامىعان مەملەكەتكە اينالۋ. قازاقستاندا ەڭبەك ەتىپ, وسى يگى وزگەرىستەرگە كۋا بولۋ مەن ءۇشىن ۇلكەن قۋانىش.
دجۋن كۋكيتا, يۋنيسەف وكىلدىگىنىڭ قازاقستانداعى باسشىسى:
«قازاقستان-2050» ستراتەگياسى – ۇزاقمەرزىمدى جوسپار. مۇنداي جۇيەلى تۇردە ازىرلەنگەن قۇجات بويىنشا ەلدى دامىتۋ تەك كورەگەن باسشىنىڭ قولىنان كەلەدى. وزدەرىڭىزگە ءمالىم, يۋنيسەف جالپى بالالار دەنساۋلىعىنا قاتىستى ماسەلەنى ۇدايى كوتەرىپ كەلەدى. ال قازاقستاننىڭ دامۋ جوسپارىندا بۇل باعىتقا ەرەكشە ءمان بەرىلگەن. ءبىز بۇعان وتە قۋانىشتىمىز.
ەرلان سىدىقوۆ, ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى:
ەلباسى جولداۋىندا ۇلكەن جەتىستىكتەرگە جەتۋىمىزدىڭ باستى فاكتورى عىلىم ەكەنى باسا ايتىلدى. عىلىمسىز العا ەكونوميكا, ءوندىرىس تە جۇرمەيتىنى انىق. ال دامىعان 30 ەلدىڭ قاتارىنا جەتۋدىڭ باستى كورسەتكىشى – عىلىمعا كوڭىل ءبولۋ. سوندىقتان دا پرەزيدەنت عىلىمعا قاراجاتتىڭ بولىنەتىندىگىنە ماڭىز بەردى. بۇل بارشامىزدى قۋانتادى.
شامشيدين اميتوۆ, قر ءىىم الماتى اكادەمياسىنىڭ زاڭ ينستيتۋتى باستىعىنىڭ ورىنباسارى:
مەملەكەت باسشىسى ىشكى ىستەر ورگاندارىنىڭ قىزمەتكەرلەرىنىڭ جاعدايىن جاقسارتۋ ءۇشىن جالاقىلارىن كوتەردى جانە الەۋمەتتىك قورعالۋىن قامتاماسىز ەتتى. سونىمەن قاتار پوليتسيا قىزمەتكەرلەرىنىڭ ازاماتتىق كونستيتۋتسيالىق قۇقىقتارى مەن بوستاندىقتارىن ساقتاۋدى جانە ىشكى ىستەر ورگاندارىندا تەك قانا كاسىبي شەبەرلەردىڭ قىزمەت ەتۋىن تالاپ ەتىپ وتىر. سول ماقساتتا ءبىزدىڭ اكادەميادا ىشكى ىستەر ورگاندارىنا كادرلار دايارلاۋ بويىنشا ۇلكەن جوسپارلىق جۇمىستار اتقارىلۋدا.
اسكەر پەريەۆ, قازاقستان حالقى اسسامبلەياسىنىڭ مۇشەسى:
ۇلتارالىق كەلىسىم, ەتنوسارالىق كەلىسىم ماسەلەسى شەشىلىپ قويعان. جالپى, العان قويىلعان تالاپتار وتە اۋقىمدى. سونىڭ باستىسى, «قازاقستان – 2050» ستراتەگياسىنىڭ تۇپقازىعى بولىپ سانالاتىن «ماڭگىلىك ەل» يدەولوگياسى. ەلباسى بيىلعى جولداۋىندا وسىعان بىرنەشە رەت توقتالىپ, ونىڭ ماڭىزىن ايتىپ بەردى.
دايىنداعان: ءامىرحان الماعانبەتوۆ.
دەرەككوز: «قازاقستان», «حابار», «24 kz» تەلەارنالارى
فوتو: اقوردا. kz.
