وتكەن ايدا يزرايل 60 جاستان اسقان ادامدارعا COVID-19 ۆاكتسيناسىنىڭ ءۇشىنشى دوزاسىن بەرە باستاعان الەمدەگى ءبىرىنشى ەل بولدى. ەندى دەنساۋلىق ساقتاۋ سالاسىنداعى ساراپشىلاردىڭ ۇكىمەتتىك كونسۋلتاتيۆتىك توبى ۆاكتسينانىڭ ءۇشىنشى دوزاسىن الۋشىلار جاسىن 50 جاسقا دەيىن تومەندەتۋدى ۇسىندى.
ءبىر كۇن بۇرىن پرەمەر-مينيستر نافتالي بەنەت بۇل ۇسىنىستى قۇپتادى جانە ونى «يزرايل ازاماتتارىنىڭ دەنساۋلىعى ءۇشىن دۇرىس شەشىم جانە دەلتا پاندەمياسىمەن كۇرەستەگى ماڭىزدى قادام», دەپ اتادى.
بەننەت ۆاكتسينا سالدىرۋ ورتالىقتارى شابات ءدىني راسىمىنە قاراماستان, تاۋلىك بويى, اپتاسىنا جەتى كۇن جۇمىس ىستەيتىنىن ايتتى. بۇل ۆاكتسيناتسيا قارقىنىن توقتاتپاۋ ءۇشىن قاجەت.
ايتا كەتەيىك, يزرايلدە پاندەميا باستالعالى بەرى 924 مىڭنان استام كوروناۆيرۋس ينفەكتسياسىن جۇقتىرىپ, 6,6 مىڭعا جۋىق ادام كوز جۇمعان. ەل حالقىنىڭ 60%-عا جۋىعى ۆاكتسينانىڭ ەكى دوزاسىن دا الدى.
