جاڭا پاتوگەندەردىڭ پايدا بولۋى جونىندەگى جاڭا حالىقارالىق عىلىمي كونسۋلتاتيۆتىك توپ (SAGO) ددسۇ-عا بولاشاقتا جاڭا قوزدىرعىشتار مەن ۆيرۋستاردىڭ پايدا بولۋىن جۇيەلى زەرتتەۋدىڭ جاھاندىق نەگىزىن ازىرلەۋ بويىنشا كەڭەس بەرۋگە جاۋاپتى.
بۇل توپ كوروناۆيرۋسقا ءار ءتۇرلى زەرتتەۋلەر جۇرگىزۋدى قولدايدى.
«SAGO-عا كانديداتتاردى قابىلداۋدا اشىق كونكۋرس جاريالاي وتىرىپ, ددسۇ جاڭا عىلىمي-كونسۋلتاتيۆتىك توپ ءۇشىن اشىق نەگىز جاسايدى, ونىڭ جۇمىسىنا بارلىق مۇشە مەملەكەت قاتىسادى دەپ ۇمىتتەنەمىز», دەلىنگەن ددسۇ حابارلاماسىندا.
سونداي-اق, ددسۇ بارلىق ەل ۇكىمەتىن كوروناۆيرۋستىڭ اينالاسىنداعى جاعدايدى دەپوليتيزاتسيالاۋعا جانە وسى ۆيرۋستىڭ پايدا بولۋىن انىقتاۋ ءۇشىن ىنتىماقتاستىققا شاقىردى.
بۇعان دەيىن قىتاي ددسۇ ۇسىنعان COVID-19 شىعۋ تەگى تۋرالى تەرگەۋدىڭ ەكىنشى كەزەڭىنە قاتىسۋدان باس تارتقان بولاتىن. بەيجىڭ ۇيىمى تەرگەۋ جوسپارىنىڭ تۇجىرىمدارىن «اقىلعا قونىمسىز, عىلىمعا قارسى» دەپ سانايدى.
ەسكە سالايىق, ۇزاق كەلىسسوزدەردەن كەيىن ددسۇ-نىڭ ون عالىمىنان تۇراتىن كومانداسى ۋحاندا 2021 جىلدىڭ قاڭتارىندا جەكە تەرگەۋ جۇرگىزدى. ۇيىم كوروناۆيرۋستىڭ زەرتحانادان تاراۋى مۇمكىن ەمەس ەكەنىن, بىراق ءالى دە تەكسەرىس جۇرەتىنىن ايتقان. مامىردىڭ سوڭىندا دجو بايدەن امەريكالىق عالىمدارعا COVID-19 شىعۋىن زەرتتەۋگە ەكى ەسە كوپ كۇش سالۋعا شاقىردى. وسى ۋاقىتتا ۋحان ۆيرۋسولوگيا ينستيتۋتى ۆيرۋس قولدان جاساندى تۇردە جاسالماعانىن ايتتى. سونداي-اق ولار اكادەميالىق قوعامداستىقتىڭ ىشىندە كوروناۆيرۋستىڭ تابيعي شىعۋ تەگى تۋرالى كونسەنسۋس بار دەپ سەندىردى.
