سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, وقىس وقيعا 7 تامىزدا ساعاتا 5.00 شاماسىندا بولعان.
ايىرتاۋ اۋدانىندا كەزەكشىلىكتە جۇرگەن ءپاترۋلدى پوليتسيا باتالونىنىڭ ينسپەكتورلارىنا اۋدان ورتالىعى ساۋمالكولدەگى لەرمونتوۆ كوشەسىندە ءبىر تۇرعىن ءۇيدىڭ ورتەنگەنى تۋرالى حابارلاما تۇسەدى.
وقيعا ورنىنا جەدەل جەتكەن پوليتسيا لەيتەنانتتارى ازامات بۇكۇەۆ پەن نۇرسۇلتان وسپانوۆ جەكە تۇرعىن ءۇيدىڭ جابىق اۋلاسىنىڭ كوك تۇتىنگە ورانىپ, جالىنداپ جاتقانىن كورەدى.
ازامات ءۇش گاز باللونىن شىعارىپ, ۇيگە كىرىپ كەتكەن ارىپتەسىنە كومەككە ۇمتىلادى.
«كوك ءتۇتىن ۇيگە دە كىرىپ ۇلگەرىپتى. ءۇي يەسى – زەينەتكەر ايەل تۇتىنگە تۇنشىعىپ, وزدىگىنەن شىعا الماي جاتىر ەكەن. ەكى جاقتاپ سۇيەمەلدەپ, دالاعا الىپ شىقتىق. ءوتىنىشى بويىنشا دارىلەرىن دە الۋدى ۇمىتپادىق. كولىككە وتىرعىزىپ, ءۇيدىڭ بولمەلەرىن تاعى ءبىر قاراپ شىقتىق. وسى كەزدە كورشىلەرى دە كەپ ۇلگەردى. ءبارىمىز بىرگە شەلەكپەن ءورتتى سوندىرۋگە كىرىستىك», دەيدى ازامات بۇكۇەۆ.
كوپ ۇزاماي ءورت سوندىرۋشىلەر دە جەتىپ, ءورتتى تولىق ءسوندىردى.
ال پوليتسيا قىزمەتكەرلەرى بولسا كەيۋانانى بالاسىنىڭ ۇيىنە امان-ەسەن جەتكىزدى. ەكىنشى كۇنى زەينەتكەردىڭ اعاسى الەكساندر مايمەسكۋلوۆ كوكشەتاۋدان كەلىپ, اپاسىن قۇتقارىپ قالعان پوليتسيا قىزمەتكەرلەرىنە العىسىن جاۋدىردى. ازامات بۇكۇەۆ پەن نۇرسۇلتان وسپانوۆ بۇل ارەكەتتەرىن ەرلىككە جاتقىزبايدى, ايتۋلارىنشا, ولار حالىققا كومەكتەسۋگە مىندەتتى, قىزمەتتەرى سونداي. ءارى ءورتتى ورشىتپەي تەز ارادا سوندىرۋگە ساۋمالكولدىڭ باسقا تۇرعىندارى دا كومەكتەسكەن.
