جوبا «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورىنىڭ باستاماسىمەن بۇكىل ەل اۋماعىندا جۇزەگە اسىرىلادى.
3 جىل ىشىندە جوباعا قازاقستاننىڭ كەۇ-نىڭ 360-تان استام وكىلى قاتىسىپ, 120-دان استام ۇيىم 500 مىڭنان 3 ميلليون تەڭگەگە دەيىن گرانتتار الدى. كوممەرتسيالىق ەمەس ۇيىمدار ءوز بيزنەس-مودەلىن قۇرا وتىرىپ, جوبالاردى ءساتتى جۇزەگە اسىرۋمەن قاتار, الەۋمەتتىك ماسەلەلەردى دە شەشۋگە ۇلەس قوستى.
«قازاقستاندىق كەۇ ءوزىن-ءوزى وتەۋگە كوشەتىن, مەملەكەتتىك گرانتتاردى كۇتۋگە ۋاقىت جوعالتپايتىن كەز كەلدى. وڭىرلەردە كەۇ-دىڭ جاقسى مىسالدارى بار, ولار قايتا قۇرىلىپ, شاعىن كاسىپورىندار اشتى. بۇل مۇگەدەكتىگى بار ادامدار اراسىندا جۇمىسسىزدىق دەڭگەيىن تومەندەتۋ ماسەلەلەرىن شەشۋگە سەپتىگىن تيگىزەدى. سونداي-اق وسىنىڭ ارقاسىندا الەۋمەتتىك باعالار بويىنشا قىزمەتتەرگە قولجەتىمدىلىك وسۋدە», دەيدى «Samruk-Kazyna Trust» قورىنىڭ رەسمي وكىلى ميراس ىرگەباەۆ.
جوبانىڭ ءبىرىنشى كەزەڭى 2021 جىلدىڭ 23 تامىزىنان 17 قىركۇيەگىنە دەيىن جالعاسىن تابادى. كەزەڭ بارىسىندا تىلەك بىلدىرۋشىلەردىڭ وتىنىمدەرى جينالىپ, ارنايى كوميسسيا كونكۋرس شارتتارىنا سايكەستىگىنە ىرىكتەۋ جۇرگىزەدى.
ەكىنشى كەزەڭگە وتكەن قاتىسۋشىلار «ينكۋباتور» جانە «اكسەلەراتور» باعدارلامالارىنىڭ بىرىنەن الەۋمەتتىك كاسىپكەرلىك, ماركەتينگ, قارجى جانە بيزنەستىڭ زاڭدىق اسپەكتىلەرى سالاسىندا ونلاين رەجيمىندە وقۋ مۇمكىندىگىنە يە بولادى. كەۇ وكىلدەرىن الەۋمەتتىك كاسىپكەرلىكتى دامىتۋدا زور تاجىريبەسى بار ساراپشىلار وقىتادى.
ەكىنشى كەزەڭنىڭ قورىتىندىسى بويىنشا فيناليستەر انىقتالىپ, ولار وزدەرىنىڭ الەۋمەتتىك جوبالارىن كونكۋرستىق كوميسسياعا ۇسىناتىن بولادى. جوباداعى ۇزدىك يدەيالار الەۋمەتتىك كاسىپكەرلىكتى دامىتۋعا 3 ميلليون تەڭگەگە دەيىن گرانتتار ۇتادى. جوبا جەڭىمپازدارى جەلتوقسان ايىندا جاريالانادى.
وتىنىمدەردى قابىلداۋ ەرەجەلەرىمەن «Samruk-Kazyna Trust» قورىنىڭ http://www.sk-trust.kz/ سايتىندا جانە الەۋمەتتىك جەلىلەرىندە تانىسۋعا بولادى.
