بۇگىندە الماتى وبلىسىندا 19 مەكتەپكە كۇردەلى جوندەۋ جۇمىستارى جۇرگىزىلىپ جاتىر. ونىڭ 9-ى بيىلعى وقۋ جىلىنا دەيىن تاپسىرىلمايدى.
بيىلعى جاڭا وقۋ جىلىندا اشىلمايتىن مەكتەپتەردىڭ ءبىرى تالدىقورعان قالاسىنداعى وستروۆسكي اتىنداعى مەكتەپ. بۇل ءبىلىم ورداسىندا كۇردەلى جوندەۋ جۇمىستار ماۋسىم ايىندا عانا باستالعان. مەكتەپتىڭ ءتورت قابىرعاسى تۇگەلدەي قىرىلىپ, قىزىل كىرپىش كۇيىندە تۇر. ەدەندەرىن دە تۇگەل الىپ تاستاعان. ايماقتاعى ءبىلىم باسقارماسىنىڭ ايتۋىنشا, جۇمىستار جىل سوڭىنا دەيىن اياقتالادى. سوندىقتان اتالعان مەكتەپتە وقىپ جۇرگەن 1149 بالا كۇزدە قالاداعى وزگە مەكتەپتەردە وقيدى.
كەيبىرى ءتىپتى كوللەدج عيماراتىندا وقيتىن بولادى.
«مەكتەپالدى دايارلىق توپتارى جانە ءبىرىنشى سىنىپ وقۋشىلارى قالاداعى گۋمانيتارلىق-تەحنيكالىق كوللەدج عيماراتىندا ءبىلىم الادى. سول جەردەن كابينەتتەر ءبولىپ وتىر. 9 مەكتەپتە كۇردەلى جوندەۋ كەش باستالۋى جانە وعان قارجىنىڭ كەش ءبولىنۋى جاعدايدى قيىنداتتى. سوندىقتان وقۋشىلارعا قولايلى جاعداي جاسالىپ, مەكتەپ بىتكەنگە دەيىن قاي عيماراتتا وقىسا سول جەرگە جيھازدار قويىلىپ, وقۋ پروتسەسسى ۇزدىكسىز وتەدى دەپ جوسپارلاپ وتىرمىز», دەدى الماتى وبلىستىق ءبىلىم باسقارماسى باسشىسىنىڭ ورىنباسارى ايجان ادامبەكوۆا.
سونداي-اق اقسۋ اۋدانىنىڭ ساعابۇيەن اۋىلىنداعى توقتاروۆ اتىنداعى مەكتەپتە دە جوندەۋ جۇمىستارى ەندى قىزعان. الداعى وقۋ جىلىندا بۇل مەكتەپتىڭ 172 وقۋشىسى اۋىلدىق اكىمدىكتىڭ عيماراتىندا ءبىلىم الماق.
ال, پانفيلوۆ اۋدانىنىڭ سارىبەل اۋىلىنداعى كوبيكوۆا اتىنداعى مەكتەپتىڭ 286 وقۋشىسىن اتالعان اۋىلدىڭ مادەنيەت ۇيىندە وقىتۋ جوسپارلانىپ وتىر.
سونداي-اق رايىمبەك اۋدانىنىڭ تۇزكول اۋىلىنداعى مۇساقۇلوۆ اتىنداعى مەكتەپتىڭ 87 وقۋشىسى وسى اۋىلدىڭ اكىمشىلىك عيماراتىندا ءبىلىم الادى.
