JANARU دەپ ايدار تاعىلعان جوبا ءتورت باعىت نەگىزىندە جۇزەگە اسپاق. ونلاين پلاتفورما يگىلىگىن تولىق پايدالانعان تالاپكەرلەر SMM, Web-ديزاين, مەنەدجمەنت جانە Soft-skills قابىلەتتەرىن يگەرىپ شىعا الادى.
قازاقستان جاستارى كونگرەسى قولعا الىپ وتىرعان جوبا پلاتفورماسىندا (janaru.jascongress.kz) اتالعان ءتورت باعىت بويىنشا كۋرستار جيناقتالعان. ۇيىمداستىرۋشىلاردىڭ ايتۋىنشا, جوبا وزەكتى ماماندىقتار مەن قابىلەتتەردى يگەرۋگە كومەكتەسەدى. اتاپ ايتار بولساق, SMM باعىتى بويىنشا – موبيلوگراف, پيكچەر جۇمىسىن; WEB باعىتى بويىنشا – Python باعدارلامالاۋ, UI/UX ديزاين, Landing سايتتارىن قۇرۋ جانە Motion design جۇمىسىن; مەنەدجەمەنت باعىتى بويىنشا ءىس قاعازدارىن جۇرگىزۋ, ساندىق ەتيكەتتى مەڭگەرىپ شىعۋعا مۇمكىندىك بار. سونداي-اق ءتورتىنشى كۋرس ءتۇرى – «داعدىلاردى دامىتۋ» اياسىندا قاتىسۋشىلار كوپشىلىك الدىندا سويلەۋ مەن ديزاين-ويلاۋ تۇرعىسىنان جاڭا قابىلەتتەرگە يە بولادى.
جوبانى نۇرسۇلتان نازارباەۆ قورىنىڭ قولداۋىمەن قازاقستان جاستار كونگرەسى جۇزەگە اسىرىپ وتىر. وسى ارقىلى جاستاردىڭ تىڭ داعدىلاردى يگەرۋىنە جول اشاتىن قولجەتىمدى الاڭ قۇرۋدى كوزدەيدى. جوباعا قاتىسقىسى كەلگەن ادام جاستار كونگرەسىنىڭ سايتىندا تىركەلىپ, بارلىق بلوك بويىنشا ساباقتاردى تەگىن وقۋعا مۇمكىندىك الادى. قاتىسۋشىنىڭ وزىنە ىڭعايلى كەز كەلگەن ۋاقىتتا ساباقتاردى وقۋىنا بولادى. تالاپكەر تەك ءبىر باعىتتى وقىسا دا بولادى. ءبارىن دە قامتىپ, بۇكىل كۋرسقا قاتىسامىن دەگەن ادامعا دا ەش كەدەرگى جوق.
«SMM-ءدى وقۋ ارقىلى ءسىز تارگەتتى قالاي دۇرىس قۇرۋدى, ءماتىندى دۇرىس جازۋدى, فوتو مەن بەينەجازباعا تۇسىرە الۋدى, كوپيرايتەرلىكتى ۇيرەنە الاسىز. SMM – قازىرگى ساتتە ەڭ ءبىر وزەكتى قۇرالعا اينالىپ وتىر. ولاردىڭ قىزمەتىنە مەملەكەتتىك مەكەمەلەر دە, جەكە ۇيىمدار دا مۇقتاج بولىپ وتىر. وسى سالانى تەرەڭ بىلەتىن ادامدى جۇمىسقا الۋ ارقىلى ءوز قىزمەتتەرىن كۇشەيتكىسى كەلەدى. ال WEB بلوگىنداعى كۋرستارعا قاتىسۋ ارقىلى سايت جاساۋدى ۇيرەنەسىز. بالكىم جەكە سايتىڭىزدى اشاسىز, بالكىم جەكە كومپانياعا سايت جاساپ بەرەسىز», دەيدى جوبا ۇيلەستىرۋشىسى.
ءوزىن-ءوزى دامىتۋعا ارنالعان جانە قازىرگى زامانعا ساي كاسىپ, ماماندىق, داعدىلارمەن تانىسۋعا ارنالعان JANARU جوباسىنىڭ ونلاين الاڭىندا 25 بەينەجازبا بار. ازىرگە بەينە-ساباقتاردىڭ بارلىعى ورىسشا تۇسىرىلگەن. ۇيلەستىرۋشىلەر مۇنى قازاق تىلىندەگى ماماندار تاپشىلىعىمەن تۇسىندىرەدى. ەگەر وسى جولى تالاپكەرلەردىڭ ىنتا-ىقىلاسى جوعارى بولسا, كەلەسى كەزەكتەگى ساباقتار قازاق تىلىندە ۇسىنىلماق. جوباعا قاتىستى جاڭالىقتار مەن وزگەرىستەردى @janaru.kz ينستاگرام پاراقشاسىنان باقىلاپ وتىرۋعا بولادى.
