ەءلشى حانىم ەلىمىزدىڭ ءبىراز ايماقتارىنا ءىس-ساپارعا بارىپ, ىسكەرلىك كەزدەسۋلەر وتكىزگەنىن تىلگە تيەك ەتىپ ءوتتى. «مەنىڭ بايقاعانىم, ءبىزدىڭ ورتاق توعىسقان قىرلارىمىز كوپ, دەگەنمەن, تىكەلەي قاتىناس ءالى دە ماسەلە تۋدىرادى! ءۇندىستان 1992 جىلعى اقپاندا قازاقستانمەن ديپلوماتيالىق قاتىناستار ورناتىپ, قازاقستاننىڭ تاۋەلسىزدىگىن مويىنداعان العاشقى ەلدەردىڭ ءبىرى بولدى. ءۇندىستان ەلشىلىگى الماتى قالاسىندا 1992 جىلدىڭ مامىر ايىندا, قازاقستاننىڭ نيۋ-دەليدەگى ەلشىلىگى 1993 جىلى اشىلدى. ءبىزدىڭ ەلدەرىمىز وزدەرىنىڭ ەكىجاقتى قاتىناستارىن نىعايتىپ, ولاردى 2009 جىلى قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ ۇندىستانعا رەسپۋبليكا كۇنىن تويلاۋعا قۇرمەتتى قوناق رەتىندەگى ساپارى كەزىندە ستراتەگيالىق ارىپتەستىككە اينالدىردى» » دەپ اتاپ ءوتتى ەلشى حانىم.
سونداي-اق ءۇندىستانىڭ قازىرگىدەي پاندەميا كەزىندە الەمنىڭ 150 ەلىنە كومەك كورسەتكەنى ەلشى حانىمنىڭ نازارىنان تىس قالمادى.
«مەن, ەكىجاقتى قاتىناستار تۇرعىسىنان, ستراتەگيالىق ارىپتەستەرىنىڭ ەكەۋى دە, ءۇندىستان دا جانە قازاقستان دا, وزدەرىنىڭ ءتيىستى قاسيەتتەرىن تولىققاندى كورسەتكەنىن قۋانا مالىمدەيمىن. 2019 جىلعى ماۋسىمدا ارىس قالاسىنداعى وق-دارىلەر قويماسىنداعى جارىلىستاردان كەيىن ءۇندىستان قازاقستانعا قالپىنا كەلتىرۋ وپەراتسيالارىنا كومەكتەسۋ جانە قۇرباندار سانىن ودان ءارى ازايتۋ ءۇشىن بومبالاردى زالالسىزداندىرۋ بويىنشا كۇشەيتىلگەن كوستيۋمدەر بەردى. قازىرگى COVID-19 پاندەمياسىنىڭ ءورشۋى كەزىندە ءۇندىستان ۇكىمەتى گيدروكسيحلوروحين ءدارى-دارمەگىن قازاقستانعا COVID-19-بەن كۇرەستە گۋمانيتارلىق كومەك رەتىندە جىبەردى. سول سياقتى, بيىل ءبىز تاپ بولعان داعدارىس كەزىندە قازاقستان ۇندىستانداعى پاندەميامەن كۇرەسۋ ءۇشىن ارنايى رەيسپەن مەديتسينالىق جابدىقتار جەتكىزدى, سول ءۇشىن ءبىز قازاقستان حالقىنا ريزاشىلىعىمىزدى بىلدىرەمىز. وسىنداي تەرەڭ تۇسىنىستىكپەن جانە ءبىر-بىرىمىزگە دەگەن ءوزارا سىيلاستىقپەن ءبىزدىڭ ەكىجاقتى قاتىناستارىمىز ءۇشىن زور الەۋەت بار ەكەنىن كورىپ وتىرمىن», دەپ اتاپ ءوتتى ەلشى حانىم.
