رەسمي دەرەككە سۇيەنسەك, ءدال قازىر قۇرىلىس پەن وڭدەۋشى ونەركاسىپ ەكونوميكالىق ءوسىمنىڭ باستى درايۆەرى بولىپ تۇر. وسى ەكى سالانىڭ ەرەكشە قارقىنى ارقاسىندا ەكونوميكا ءبىرىنشى جارتى جىلدىقتا 2,2 پايىزعا وسكەن. سوڭعى ۋاقىتتا كولىك قۇراستىرۋ سالاسى دا ەكونوميكانىڭ تىڭ باعىتىنا اينالىپ, سەرپىلىپ كەلەدى. اۆتوموبيل ءوندىرىسى ماشينا جاساۋ سالاسىنىڭ 31 پايىزىن مەنشىكتەپ تۇرعانى دا سودان شىعار.
شىلدە ايىنىڭ وزىندە ەل اۋماعىندا جاڭا ينۆەستيتسيالىق جوبالاردى جۇزەگە اسىرۋ ءۇشىن 8 قۇجاتقا قول قويىلعان. قوستانايدا Lada مەن Renault اۆتوموبيلدەرىن قۇراستىرۋ باستالىپ تا كەتتى. Granta-نىڭ شاناعى سول جەردە دانەكەرلەنىپ, بويالادى. اۆتوبيزنەس قاۋىمداستىعىنىڭ دەرەگىنشە, التى ايدا ەل اۋماعىندا قۇراستىرىلعان 39 795 كولىكتىڭ 34 556-سى – جەڭىل اۆتوموبيل, ءتورت مىڭنان استامى جۇك كولىكتەرى بولسا, 537-ءسى اۆتوبۋس ەكەن. بۇدان بولەك, تىركەمە, جارتىلاي تىركەمە جانە ارنايى مامانداندىرىلعان تەحنيكالاردىڭ دا ۇلەسى ارتىپ كەلەدى. ءوندىرىس كولەمى 2020-نىڭ العاشقى التى ايىنان 20,4 پايىزعا اسىپ تۇسكەن.
جارتى جىل ىشىندە قوستانايداعى «سارىارقااۆتوپروم» زاۋىتىندا 23 962 جەڭىل اۆتوكولىك قۇراستىرىلعان. تاعى 148,2 ملرد تەڭگەگە جۇك كولىكتەرى مەن اۆتوبۋستار شىعارىلىپتى. ءوسىم 2020-مەن سالىستىرعاندا 41,6 پايىزدى قۇراعان. الماتىداعى Hyundai Trans Kazakhstan جالپى سوماسى 116,8 ملرد تەڭگەگە 12 319 جەڭىل اۆتوكولىكتى نارىققا شىعارىپتى. ەلدەگى ءاۆتووندىرىس الماتى جانە قوستانايمەن شەكتەلمەيدى, ارينە. سەمەيدەگى «سەماز» (18,4 ملرد تەڭگەگە – 2113 تەحنيكا), Daewoo Bus Kazakhstan (96 اۆتوبۋس), كوكشەتاۋداعى «كاماز-ينجينيرينگ» (16,3 ملرد تەڭگەگە – 704 جۇك كولىگى) زاۋىتتارى دا وتاندىق اۆتوكولىك وندىرىسىنە ەلەۋلى ۇلەس قوسۋدا.
قازاقستاندا قۇراستىرىلعان كولىكتەر ىشىندە ەڭ ءوتىمدى برەندتەردىڭ كوشىن Chevrolet باستايدى. بۇل ماركانىڭ 15 مىڭنان اسا داناسى ساتىلىپ كەتكەن. ودان كەيىنگى ورىنداردا Hyundai (12 377), Kia (4 391), JAC (2 668) جانە GAZ (2 062) بار. بۇل كولىكتەردىڭ بارلىعىن دەرلىك تەك ءبىزدىڭ وتانداستارىمىز عانا ەمەس, شەتەلدىكتەر دە ساتىپ الۋدا. العاشقى التى ايدا ەكسپورت دەڭگەيى دە 77 پايىزعا ءوسىپتى. Hyundai, JAC, Chevrolet-ءتى نەگىزىنەن رەسەي, وزبەكستان, بەلارۋس جانە قىرعىزستان كوپ ساتىپ العان.
