شارا اباي ەسكەرتكىشىنە گۇل قويۋ راسىمىنەن باستالدى.
وعان سىرتقى ىستەر مينيسترلىگى, قحر مادەنيەت جانە تۋريزم مينيسترلىگى, قىتايدىڭ شەت ەلدەرمەن دوستىق قوعامى, شىۇ حاتشىلىعىنىڭ وكىلدەرى, تمد ەلدەرىنىڭ قىتايداعى ديپلوماتيالىق ميسسيالارىنىڭ باسشىلارى مەن ستۋدەنتتەر قاتىستى.
قازاقستان رەسپۋبليكاسىنىڭ قحر-داعى ەلشىسى عابيت قويشىباەۆ ءوز سوزىندە اباي شىعارماشىلىعى, ونىڭ قازاق فيلوسوفياسى مەن ادەبي ءتىلىنىڭ قالىپتاسۋىنداعى ءرولى تۋرالى ايتتى.
«وسىدان جەتى جىل بۇرىن, ءدال وسى جەردە, بەيجىڭنىڭ قاق ورتاسىندا ۇلى اقىنىمىز ابايعا ەسكەرتكىش ورناتىلدى. بۇل ايتۋلى وقيعا ەكىجاقتى مادەني-گۋمانيتارلىق ىنتىماقتاستىقتا ماڭىزدى ءىز قالدىرىپ, قىتاي جۇرتشىلىعىن قازاق ادەبيەتىنىڭ كلاسسيكتەرىمەن تانىستىرۋ جولىنداعى كەزەكتى قادام بولدى», دەدى ول.
ديپلومات دارىندى اۋدارماشى حا حۋانچجان ابايدى قىتاي تىلىنە ءبىرىنشى بولىپ اۋدارعانىن ەسكە سالدى. اتاقتى جازۋشى جانە ادەبيەتتانۋشى اكبار ءماجيت تە اباي شىعارمالارىن قىتاي تىلىنە اۋدارۋعا ۇلكەن ۇلەس قوسقانىن اتاپ ءوتتى.
ءوز كەزەگىندە قىتايلىق ءمۇسىنشى يۋان سيكۋن سوڭعى جىلدارى بەيجىڭدەگى ەسكەرتكىشىنىڭ جانىندا اباي وقۋلارىن وتكىزۋ جاقسى داستۇرگە اينالعانىن ايتتى.
«جىل سايىن وسىندا قازاقستان مەن قىتاي جاستارى جينالىپ, ابايدىڭ كلاسسيكالىق ولەڭدەرىن وقيدى», دەدى ول.
شارا بارىسىندا قازاق ءتىلىن وقىپ جاتقان قىتايلىق ستۋدەنتتەر مەن قىتايدا وقيتىن قازاقستاندىق جاستار, سونداي-اق قازاقستاندىق ديپلوماتتاردىڭ بالالارى اباي شىعارمالارىنان ءۇزىندى وقىپ, قويىلىم كورسەتتى.
