«بۇگىن قازاقستان حالقى ءۇشىن ەرەكشە كۇن. شىنىندا دا, بۇل كۇنى ءبىز ۇلى ابايدىڭ تۇلعاسىنا قۇرمەت كورسەتەمىز, كورنەكتى اقىننان رۋحاني قولداۋ تابامىز. ء«بىرىڭدى قازاق ءبىرىڭ دوس, كورمەسەڭ, ءىستىڭ ءبارى بوس», دەيدى اقىن. ءبىزدىڭ پارىزىمىز - ابايدىڭ وسى وسيەتىن ورىنداۋ. اباي ءبىز ءۇشىن ۇلكەن رۋحاني تىرەككە اينالدى. سوندىقتان قازاق حالقىنا ۇلى ابايدى سىيلاعان اللا تاعالاعا العىس ايتامىز», دەدى قىرىمبەك كوشەرباەۆ ۇلى اقىن ەسكەرتكىشىنە گۇل شوقتارىن قويعاننان كەيىن.
گۇل قويۋ راسىمىنە پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ, ءبىلىم جانە عىلىم ءمينيسترى اسحات ايماعامبەتوۆ, مادەنيەت جانە سپورت ءمينيسترى اقتوتى رايىمقۇلوۆا, نۇر-سۇلتان قالاسىنىڭ اكىمى التاي كولگىنوۆ, ەلىمىزدىڭ بارلىق ايماقتارىنان مەملەكەتتىك ورگاندار مەن قازاق زيالىلارى قاتىستى.
ايتا كەتەيىك, بۇگىن, 10 تامىز - اباي كۇنى.
