ايماق بويىنشا جۇقپالى ىندەتتىڭ تارالۋ قارقىنى سوڭعى 2 اپتادا 0,8 پايىزدان 1,0 پايىزعا دەيىن ارتتى. تالداۋ بويىنشا الاكول, بالقاش, ەسكەلدى, قاراساي, قاراتال, كەربۇلاق, رايىمبەك, سارقان اۋداندارىندا جانە قاپشاعاي قالاسىندا ۆيرۋس جۇقتىرعانداردىڭ ارتقانى بايقالادى.
ايتپاقشى, انىقتالعان 300 ناۋقاستىڭ اراسىندا بالالاردىڭ دا بولۋى قىنجىلتادى. ماسەلەن, وبلىستا 14 جاسقا دەيىنگى 49 بالادان كوروناۆيرۋس تابىلدى. سونداي-اق 30 وقۋشى مەن 3 ستۋدەنتتىڭ دە كوروناۆيرۋس جۇقتىرعانى بەلگىلى بولدى.
سونىمەن قاتار وڭىرگە جىل باسىنان بەرى ۆاكتسينانىڭ ءبىرىنشى كومپونەنتىنىڭ 634 255 دوزاسى كەلىپ ءتۇستى, ونىڭ ىشىندە «سپۋتنيك V» – 553 745, Hayat Vax – 39 500, QazVac – 13 010, CoronaVac – 28 000 دوزا.
ال ەكپە الۋشىلار قاتارى اپتا سايىن ءوسىپ كەلە جاتقانى بايقالعان. دەرەك بويىنشا, كوروناۆيرۋسقا قارسى ۆاكتسينانىڭ ءبىرىنشى كومپونەنتىمەن 572 169 ادام ەگىلدى, ەكىنشى كومپونەنتپەن ەكپە العاندار سانى – 425 171. ۆاكتسينالانعاندار اراسىندا مەملەكەتتىك قىزمەتكەرلەردىڭ ۇلەسى – 11 943 ادام, مەديتسينا قىزمەتكەرلەرىنىڭ سانى – 23 406 ادام, پەداگوگتەر قاتارى 38 357 ادام جانە باسقا سالادا قىزمەت ەتۋشىلەر سانى – 447 425 ادام. سونداي-اق دارىگەردىڭ مۇقيات تەكسەرۋىنەن كەيىن ەكپە سالدىرۋعا رۇقسات بەرىلگەن سوزىلمالى اۋرۋلارى بار 4 486 ادام ۆاكتسينا پاسپورتىن العان.
وسىلايشا, جەتىسۋدا ەكپە العاندار سانى جارتى ميلليون ادامنان استى.
الماتى وبلىسى
