اقمولا وبلىسى پوليتسيا دەپارتامەنتىنىڭ باستىعى ارمانبەك بايمۋرزين Facebook-تەگى پاراقشاسىنا پوليتسەيلەرگە قارسىلىق كورسەتىپ, ولاردىڭ قىزمەتتىك كولىگىنە زاقىم كەلتىرگەن جۇرگىزۋشى كۋالىگى بولماعان ەر ادامدى ۇستاۋ بارىسىنداعى ۆيدەونى جاريالادى.
5 تامىز كۇنى ساعات 20:00 شاماسىندا «جاقسى-ەسىل-بۇزىلىق» اۆتوجولىنىڭ 3-ءشى شاقىرىمىندا «Mitsubishi Outlander» ماركالى اۆتوكولىگىنىڭ جۇرگىزۋشىسى پوليتسيا قىزمەتكەرلەرىنىڭ تالاپتارىنا باعىنباي, قاتتى ءجۇرىپ, قاشىپ كەتپەك بولعان.
«قۋىپ بارا جاتقاندا ءتارتىپ بۇزۋشى قىزمەتتىك كولىككە زاقىم كەلتىردى. ءماجبۇرلى تۇردە توقتاتىلعاننان كەيىن جۇرگىزۋشى پوليتسەيلەرگە قارسىلىق كورسەتكەن. مەديتسينالىق كۋالاندىرۋ قورىتىندىسىنا سايكەس, ءتارتىپ بۇزۋشى جەڭىل دارەجەدە ماس بولعان. دەرەكقوردى تەكسەرۋ بارىسىندا 2017 جىلدىڭ 9 قاراشاسى كۇنى جۇرگىزۋشى بەس جىلعا دەيىن كولىك جۇرگىزۋ قۇقىعىنان ايىرىلعان بولىپ شىقتى. قىلمىستىق كودەكستىڭ 346-بابى 1 ءبولىمى «كولىك قۇرالدارىن جۇرگىزۋ قۇقىعىنان ايىرىلعان ماس كۇيدەگى ادامنىڭ كولىك قۇرالىن باسقارۋى» بويىنشا سوتقا دەيىنگى تەرگەۋ باستالدى», دەلىنگەن جازبادا.
ارمانبەك ءبايمۋرزيننىڭ ايتۋىنشا, بيىل وڭىردە جۇرگىزۋشى كۋالىگىنەن ايىرىلعان 243 جۇرگىزۋشى كولىك ايداعانى ءۇشىن اكىمشىلىك جاۋاپقا تارتىلعان.
بۇرىن باسقارۋ قۇقىعىنان ايىرىلعان 74 جۇرگىزۋشى ماس كۇيىندە كولىك ايداعانى ءۇشىن قىلمىستىق جاۋاپقا تارتىلعان. مۇنداي فاكتىلەردى انىقتاۋ بويىنشا جۇمىس كۇندەلىكتى جۇرگىزىلىپ جاتىر.
«اعا لەيتەنانت ق. قابيەۆ پەن لەيتەنانت ق. تولتانوۆ ىنتالاندىرىلادى. ءوز ومىرلەرىن تاۋەكەلگە بايلاپ وتىرىپ, ولار باسقا بىرەۋلەردىڭ ومىرلەرىن امان الىپ قالعان بولۋى مۇمكىن. پوليتسەيلەردىڭ قىراعىلىعى بولماعاندا, بۇل وقيعانىڭ نەمەن اياقتالارى بەلگىسىز», دەپ قورىتتى ۆەدومستۆو جەتەكشىسى.
