ەكونوميكا • 06 تامىز، 2021

ەنەرگوبلوك قالپىنا كەلتىرىلۋدە

62 رەت كورسەتىلدى

ب.نۇرجانوۆ اتىنداعى ەكىباستۇز گرەس-1 ستانساسىنىڭ قۋاتتىلىعى 500 مۆت بولاتىن №1 ەنەرگوبلوگى قالپىنا كەلتىرىلۋدە. بۇگىندە بولشەكتەۋ جۇمىستارى تولىق اياقتالىپ، جاڭا تەحنولوگيالىق جابدىقتاردى ورناتۋ باستالدى.

«سامۇرىق-ەنەرگو» اق تاراتقان رەسمي مالىمەتكە سۇيەنسەك، قايتا جا­ڭار­تىلعان ەنەرگوبلوك 2023 جىلدىڭ جەل­توقسانىندا پايدالانۋعا بەرىلىپ، ىسكە قوسىلادى.

جالپى، «سامۇرىق-ەنەرگو» بۇل جوباعا ەرەكشە ءمان بەرىپ وتىر. سەبەبى ونى ويداعىداي جۇزەگە اسىرۋ كومپانيا­نىڭ وزگە دە ەنەرگەتيكالىق نىساندارىندا جۇرگىزىلىپ جاتقان جۇمىستار سەكىل­دى سالادا ورىن الىپ وتىرعان ەلەكتر قۋا­تىنىڭ تاپشىلىعىن ازايتۋعا جانە ەلدىڭ ەنەرگەتيكالىق قاۋىپسىزدىگىن ارتتىرۋعا مۇمكىندىك بەرەدى. بۇل رەتتە سوڭعى ءتورت جىلدا (2017-2020 جىلدار ارالىعىندا) رەسپۋبليكادا ەلەكتر تۇتىنۋدىڭ ورتاشا ءوسىمى 4 پايىزدى قۇرادى. جىل سايىن ەلەكتر قۋاتىنا دەگەن قاجەتتىلىك شامامەن 600 مۆت-قا ءوسىپ وتىر.

ماماندار قولدا بار قۋات رەزەرۆ­تەرىنىڭ ازايىپ بارا جاتقاندىعىن العا تارتۋدا. ەلەكتر قۋاتىنىڭ بولجامدى تەڭگەرىمى قازاقستاندا 2023 جىلدان باس­تاپ وندىرىستىك قۋات تاپشىلىعى بولاتىنىن كورسەتىپ وتىر. ال رەتتەۋ قۋاتىنىڭ تاپشىلىعى قازىردىڭ وزىندە بايقالۋدا.

جۇيەلىك وپەراتوردىڭ اقپاراتىنا سۇيەنسەك، 2020-2021 جىلدارى كۇزگى-قىسقى كەزەڭنەن ءوتۋ بارىسىندا ءبىرتۇتاس ەلەكتر ەنەرگەتيكالىق جۇيەنىڭ جۇمىس قۋاتىنا قاتىستى ناقتى رەزەرۆ 600 مۆت-تى قۇرادى. سالاداعى ساراپشىلار اعىمداعى قارقىن ساقتالعان جاعدايدا، كەلەسى جىلىتۋ كەزەڭىندە ءبىرتۇتاس ەلەكتر ەنەرگەتيكالىق جۇيەنىڭ قۋات رەزەرۆتەرى بولماي قالۋى مۇمكىن ەكەنىن، بۇل ەلەكتر­مەن جابدىقتاۋداعى شەكتەۋلەرگە اكەپ سوقتىراتىنىن ايتىپ دابىل قاعۋدا.

جاڭا ەلەكتر سۇزگىلەرىن ورناتا وتىرىپ، №1 ەنەرگوبلوگتى قالپىنا كەلتىرۋ جوباسى ستانسانىڭ قۋاتىن 4000 مۆت-قا دەيىن ارتتىرۋعا مۇمكىندىك بەرمەك. سونىڭ ناتيجەسىندە، ستانسادا ۇزاق جىل­دار بويى جۇرگىزىلىپ كەلە جاتقان نەگىز­گى جابدىقتاردى جاڭعىرتۋ پروتسەسى وي­داعىداي اياقتالماق.

ەستەرىڭىزگە سالا كەتەيىك، 2014 جىلى قۋاتى 500 مۆت بولاتىن №2 ەنەرگوبلوك جەلىگە قوسىلدى. بۇل ەكىباستۇز گرەس-1 نىسانىنىڭ وندىرىستىك كورسەتكىشتەرىن ايتارلىقتاي ارتتىرۋعا جول اشتى. بۇعان دەيىن 2012 جىلدىڭ شىلدەسىندە قۋاتى 500 مۆت بولاتىن №8 ەنەرگوبلوك ىسكە قوسىلعان بولاتىن.

«سامۇرىق-ەنەرگو» اق ەلەكتر قۋاتىنىڭ بولجامدى تاپشىلىعىن ازايتۋ ءۇشىن گرەس-1 ستانساسىنىڭ №1 ەنەرگوبلوگىن قالپىنا كەلتىرۋدەن بولەك، تاعى دا باسقا جوبالاردى ىسكە اسىرۋدى جوس­پارلاپ وتىر. اتاپ ايتقاندا، ەكىباستۇز گرەس-2 ستانساسىنىڭ قۋاتى 636 مۆت بولاتىن ءۇشىنشى ەنەرگوبلوگىن پايدالانۋعا بەرۋ، 2028 جىلدان 2035 جىلعا دەيىنگى ارالىقتا ەكىباستۇز گرەس-1 ستانساسىنىڭ جيىنتىق قۋاتىن 240 مۆت-قا ارتتىرۋ ماقساتىندا 3، 4، 5، 6، 7، 8 بلوكتاردى كەزەكپەن قايتا جاڭارتۋ مىندەتى تۇر.

سونداي-اق «الماتى ەلەكتر ستانتسيا­لارى» اق-عا قاراستى الماتى جەو-3 نىسانىنىڭ بەلگىلەنگەن قۋاتىن 450 مۆت-قا دەيىن ۇلعايتىپ ءارى مانەۆرلىك رەجىمدى قامتاماسىز ەتە وتىرىپ، قايتا جاڭارتۋ كوزدەلگەن. بۇدان بولەك، الماتى جەو-1 قايتا قۇرۋ، قۋاتىن 250 مۆت-قا دەيىن ارتتىرۋ جانە 2030 جىلعا دەيىن مانەۆر جاساۋ مۇمكىندىگىن تۋدىرۋ دا قاراستىرىلعان.

سونىمەن قاتار 2026 جىلى قاپشاعاي گەس-ىندە قۋاتتى رەتتەۋ دياپازونىن 300 مۆت-قا دەيىن ۇلعايتۋدى قامتاماسىز ەتەتىن، قۋاتى 40 مۆت بولاتىن كەربۇلاق گەس-ءىن پايدالانۋعا بەرۋ جوسپارلانۋدا. شەلەك دالىزىندە ءوڭىردىڭ جەل جانە سۋ الەۋەتىن يگەرۋ جوبالارىن دامىتۋ كوزدەلىپ وتىر.

ب.نۇرجانوۆ اتىنداعى ەكىباستۇز گرەس-1 – ارقايسىسىنىڭ قۋاتى 500 مۆت بولاتىن سەگىز ەنەرگوبلوكپەن جابدىق­تالعان، بەلگىلەنگەن قۋاتى 4000 مۆت-تى قۇ­رايتىن قازاقستانداعى ەڭ ءىرى جىلۋ ەلەك­تر ستانساسى. ستانسا رەسپۋبليكا بويىن­شا بارلىق ەلەكتر تۇتىنۋ كولە­مىنىڭ 20-23 پايىزىن قامتاماسىز ەتەدى. ستانسانىڭ يەسى – «سامۇرىق-ەنەرگو» اق.

 

سوڭعى جاڭالىقتار

ۇقساس جاڭالىقتار