– كوماندامىزدىڭ كوشباسشىسى مەيرامبەك ايناعۇلوۆ سپورتشىلاردان ءبىرىنشى بولىپ كىلەمگە شىققاندىقتان پسيحولوگيالىق تۇرعىدان دايىن بولماعان سياقتى. ونىڭ قارسىلاسى سولاقاي. سوعان بايلانىستى وزىمىزگە ىڭعايلى بولاتىنداي كۇرەس ءستيلىن ءتۇسىندىرىپ, وعان جەتكىزگەنىمىزبەن, بارلىعى بەكەر بولدى. تاپسىرمامىزدى كىلەمگە شىققاندا ورىنداعان جوق. سونداي بولماشى قاتەلىكتىڭ كەسىرىنەن كوماندامىزدىڭ كوشباسشىسى قارسىلاسىنا ەسە جىبەردى, – دەگەن باس باپكەر دەمەۋ جادىراەۆتىڭ جاپون بالۋانىنان قالاي جەڭىلگەنىن دە ايتىپ بەردى. – دەمەۋ ۇپاي سانىمەن الدا تۇرعان. 30 سەكۋندتىق ۇزىلىستە باسىن تومەن قاراتپاي, بارلىق ءساتتى باقىلاۋعا الۋ كەرەگىن ايتىپ, ءبارىن تۇسىندىرگەنبىز. بىراق دەمەۋدىڭ ءدال وسىلاي سوڭعى ساتتە بولماشى ادىسكە ءتۇسىپ, قارسىلاسىنا ۇپاي سىيلاعانىن ءبىز دە تۇسىنە المادىق, – دەدى ب.بايسەيىتوۆ.
سونداي-اق باقتيار باعاشار ۇلى 87 كيلودا جارىس جولىنا شىققان نۇرسۇلتان تۇرسىنوۆقا تورەشىلەر ادىلەتسىزدىك جاسادى دەيدى.
– تورەشىلەر تاراپىنان باعالاۋ دۇرىس بولمادى. ءبىرىنشى بولىپ پارتەرگە ءبىزدىڭ بالۋاندى قويدى. ەكىنشىسىندە نەمىس بالۋانى جاتتى. سول كەزدە نۇرسۇلتان تىك تۇرىپ جارتىلاي ءادىس جاساپ لاقتىرعانىمەن, تورەشىلەر ونىڭ ەكى ۇپايىن ەسەپكە المادى. ەرەجە بويىنشا تولىق جاسالماعان ادىسكە ەكى ۇپاي بەرىلۋى كەرەك. مەن تورەشىلەر شەشىمىنە شاعىم تۇسىرگەندە (چەللەندج) بەلدەسۋدى قايتا قاراپ, شەشىمدى وزگەرتكەن جوق. ادەتتە شاعىم قاناعاتتاندىرىلماسا, قارسىلاسقا ءبىر ۇپاي بەرىلەدى. باس تورەشى, تورەشىلەر ۇيلەستىرۋشىنىڭ ۇلتى – نەمىس. وسى جەردەن وزدەرىڭىز قورىتىندى جاساي بەرسەڭىزدەر بولادى. ەگەر دە ەكى ۇپايدى نۇرسۇلتاننىڭ ەنشىسىنە جازعاندا, كەلەسى كەزەڭگە وتەر ەدىك. بۇل جەردە جەڭىستى تارتىپ الدى دەپ ەسەپتەيمىن, – دەدى ب.بايسەيىتوۆ.
ءوز كەزەگىندە گرەك-ريم كۇرەسىنەن الەم چەمپيونى باقتيار بايسەيىتوۆ ەلدەن كەشىرىم سۇراپ, الداعى جوسپارىن ءبولىستى.
– مەن 2019 جىلدىڭ بەل ورتاسىنان قۇرامانىڭ باس جاتتىقتىرۋشىسى قىزمەتىنە كىرىستىم. از ۋاقىتتىڭ ىشىندە بالۋانداردى دايارلاپ, سول جىلى نۇر-سۇلتان قالاسىندا وتكەن الەم چەمپيوناتىندا باق سىنادىق. وندا ءبىز ءبىر كۇمىس, ەكى قولا مەدال جەڭىپ الدىق. 2020 جىلى ازيا چەمپيوناتىندا 1 التىن, 1 كۇمىس جانە 3 قولا جۇلدەگە يە بولدىق. بيىلعى ازيا چەمپيوناتىندا 2 التىن, 2 كۇمىستى ەنشىلەدىك. سوعان قاراماستان, وليمپيادادا ءساتسىز ونەر كورسەتىپ وتىرمىز. جەڭىلىس ءۇشىن جەرلەستەرىمنەن كەشىرىم سۇرايمىن. وليمپيادا ەسەبىن ەلگە بارعاننان كەيىن تولىققاندى بەرەتىن بولامىز. ەگەر دە بارلىعى دۇرىس بولسا, كۇزدە وتەتىن الەم چەمپيوناتىنا دايىندىقتى باستاپ كەتۋىمىز كەرەك, – دەدى باس باپكەر.
