وليمپيادا الدىندا پرەزيدەنت قاسىم-جومارت توقاەۆتىڭ قولىنان كوك تۋدى العان, التىن مەدالدان بىردەن-ءبىر ۇمىتكەر قامشىبەك قوڭقاباەۆ كەشە قولا جۇلدەنى قاناعات ەتتى. انىعىندا, جارتىلاي فينالدا امەريكالىق ريچارد توررەسپەن جۇدىرىقتاسقان وتانداسىمىزدىڭ ەسەسى كەتتى. گونگ ەستىلە سالا ءبىر-بىرىنە لاپ قويعان ەكى قارسىلاس العاشىندا كەزەك-كەزەك سوققى جاساۋمەن بولدى. الما-كەزەك شابۋىلدارمەن وتكەن ءبىرىنشى راۋندتا بەس تورەشىنىڭ بىرەۋى جەڭىستى قامشىبەككە بەردى. ەكىنشى راۋندتا ءبىز كۇتپەگەن جاعداي ورىن الدى. امەريكالىق بوكسشى جەرلەسىمىزدى نوكداۋنعا جىبەردى. ودان قالسا قوڭقاباەۆ تورەشىدەن ەسكەرتۋ الدى. بۇل كەزەڭدە بارلىق تورەشى جەڭىستى توررەسكە جازدى. ال ءۇشىنشى راۋندتا قامشىبەكتىڭ مۇرنى سىنىپ, كەزدەسۋ توقتاتىلدى. ناتيجەسىندە, بارلىق تورەشى ءبىراۋىزدان امەريكالىق بوكسشىنى جەڭىمپاز دەپ تانىدى.
سونىمەن ەل سەنگەن قامشىبەك قوڭقاباەۆ تا جارىس جولىن اياقتادى. ارينە, حالىق وعان ۇلكەن سەنىم ارتقان ەدى. بىراق وليمپياداعا قاتىساتىنداردىڭ ەشقايسىسى دا وسال ەمەس. ونىڭ ۇستىنە اۋىر سالماقتاعىلارعا جۇدىرىقتاسۋ وتە قيىن. كەيدە كەزدەسۋدىڭ تاعدىرىن جالعىز سوققى شەشەدى. قامشىبەكتىڭ قانشاما جىل يۆان دىچكونىڭ كولەڭكەسىندە جۇرگەنى تاعى بەلگىلى. وردا بۇزار وتىز جاسىندا قولا مەدالعا قول جەتكىزۋ دە ولجا. ەندى قامشىبەك اۋەسقوي بوكستا كەتكەن ەسەسىن كاسىپقوي بوكستا قايتارادى دەپ سەنەمىز.
توررەس اقتىق ايقاستا وزبەك بوكسشىسى باحودير جالولوۆپەن كەزدەسەدى. جالولوۆ جارتىلاي فينالدا تۇڭعىش رەت نوكداۋن الدى. سويتە تۇرا بريتاندىق بوكسشىدان جەڭىستى ج ۇلىپ الدى. ايتپاقشى, توررەس 2019 جىلى ەكاتەرينگبۋرگتە وتكەن الەم چەمپيوناتىندا جالولوۆتان نوكاۋت الىپ, اۋرۋحانادان ءبىر-اق شىققان ەدى. وسى جولعى شايقاس قالاي بولاتىنىن 8 تامىزدا بىلەتىن بولامىز.
ەركىن كۇرەستەن 57 كيلوعا دەيىنگى سالماق دارەجەسىندە جارىس جولىنا شىققان نۇريسلام ساناەۆ ءۇشىن جارىس كەرەمەت باستالدى. العاشقى كەزدەسۋىن گۆينەيا-بيساۋ ەلىنىڭ وكىلى يۋنا فافە ديامانتينوعا قارسى وتكىزگەن جەرلەسىمىز 7:0 ەسەبىمەن جەڭىسكە جەتتى. ال شيرەك فينالداعى قارسىلاسى ءتىپتى ازۋلى ەدى. الەم چەمپيونى, ازيا ويىندارىنىڭ قولا جۇلدەگەرى جاپونيالىق يۋكي تاكاحاشيمەن ەش قايمىقپاي بەلدەسكەن نۇريسلام 6:4 ەسەبىمەن باسىم ءتۇستى. وسىلايشا, كىشىگىرىم سەنساتسيا جاساعان ساناەۆ اقتىق ايقاس ءۇشىن ۇندىستاندىق راۆي كۋمارمەن كىلەمگە شىققان بولاتىن. تارتىستى كەزدەسۋدى نۇريسلام جاقسى باستادى. ول قارسىلاسىن بىرنەشە رەت اينالدىرىپ, 9:2 ەسەبىمەن العا شىققان. بىراق بۇل باسىمدىقتى ول سوڭىنا دەيىن ۇستاپ تۇرا المادى. ساناەۆ اياعىنان كىشىگىرىم جاراقات الىپ, كەيىن ۇندىلىك بالۋان قارسى ادىسكە كوشتى. ناتيجەسىندە, راۆي كۋمار نۇريسلامدى تازا جەڭدى. ەندى نۇريسلام ساناەۆ وليمپيادانىڭ قولا مەدالى ءۇشىن كۇرەسەدى.
ايتا كەتەيىك, قازاقستاندىق بالۋان ءۇشىن ءۇندى بالۋانى – الىنبايتىن قامالداي. وسىمەن ءۇشىنشى رەت كەزدەسىپ, بارلىعىندا دا جەڭىلىسكە ۇشىرادى.
بايداركا ەسۋدەن 500 مەتر قاشىقتىقتا باق سىناعان ناتاليا سەرگەەۆا ىرىكتەۋ كەزەڭىندە (2:01.374) جەتىنشى ورىننان كورىندى. ال كانوەمەن 200 مەتر قاشىقتىققا سايىسقا تۇسكەن مارگاريتا تورلوپوۆا ءتيىستى قاشىقتىقتى 49,721 ۋاقىتتا باعىندىردى. ەكى سپورتشى دا شيرەك فينالعا جولداما الدى.
ترەكتەگى ۆەلوسپورتتان ىرىكتەۋ كەزەڭى كەشە باستالعانىمەن, ءبىزدىڭ سپورتشى ءۇشىن وليمپيادا ەرتە اياقتالدى. سپرينت بويىنشا كەلەسى اينالىمعا وتەتىن سپورتشىلاردا انىقتاۋ باسەكەسىندە سەرگەي پونومارەۆ ۇزدىك 24 سپورتشىنىڭ قاتارىنان كورىنە المادى. ول جارىستى نەبارى 29-ورىنمەن اياقتادى.
