وقيعا • 04 تامىز، 2021

ىلە الاتاۋىندا جاعدايى ناشارلاعان تۋريست قۇتقارىلدى

21 رەت كورسەتىلدى

3 تامىز ساعات 22:10-دا رەسپۋبليكالىق جەدەل-قۇتقارۋ جاساعىنىڭ كەزەكشى بولىمىنە رەسەيدەن كەلگەن تۋريستەر توبىنا قۇتقارۋشىلاردىڭ كومەگى قاجەت ەكەندىگى تۋرالى اقپارات كەلىپ تۇسكەن. ولاردىڭ جالپى سانى 15 ادام، دەپ حابارلايدى Egemen.kz.

بۇل تۋرالى قر تجم رەسمي وكىلى تالعات ءۋالي حابارلادى.

تۋريستەر سوۆەتتەر شىڭىنا كوتەرىلگەن. شىڭدى باعىندىرۋ كەزىندە ولاردىڭ ءبىرىنىڭ جاعدايى كۇرت ناشارلاعان. الايدا توپ ىشىندە دارىگەر بولعاندىقتان، ول ناۋقاستانعان ءتۋريستىڭ ءوت قابىندا تاس بولۋى مۇمكىن ەكەنىن ايتقان.

رەپسۋبليكالىق جەدەل-قۇتقارۋ جاساعىنىڭ 8 قۇتقارۋشىسى مەن كينولوگيالىق توپ دەرەۋ ىزدەستىرۋ-قۇتقارۋ جۇمىستارىنا شىقتى.

4 تامىزدا تۋريستەر سوۆەتتەر شىڭىنىڭ اسۋىنان (تەڭىز دەڭگەيىنەن 3700 مەتر بيىكتىكتە) تابىلدى. جاعدايى ناشارلاعان بويجەتكەنگە العاشقى مەديتسينالىق كومەك كورسەتىلدى. بۇل ايماقتاعى تاۋلى جەر تاياز جانە تىك جارتاستى شوگىندىلەردەن تۇراتىندىقتان، زارداپ شەككەن ادامدى زەمبىلمەن تاسىمالداۋعا كەلمەيدى. سەبەبى تاسىمالداۋ كەزىندە قىزدىڭ جاعدايى ودان ءارى ناشارلاۋى مۇمكىن بولدى. الماتى قالاسىنىڭ قۇتقارۋ قىزمەتى اۋە بورتىن ۇسىندى.

ايتا كەتۋ كەرەك، بۇل توپ 29 شىلدەدە رەسپۋبليكالىق جەدەل-قۇتقارۋ جاساعىندا تىركەلگەندىكتەن قۇتقارۋشىلار تۋريستەردىڭ مارشرۋتىن بىلگەن. بۇل ىزدەۋ ۋاقىتىن قىسقارتۋعا كومەكتەستى.

قازىر قۇتقارۋشىلار اۋە كەمەسىن كۇتۋدە. اۋە كەمەسىنىڭ كومەگىمەن قۇتقارۋشىلار زارداپ شەككەن ادامدى ۇلكەن الماتى شاتقالىنداعى تىكۇشاق الاڭىندا كۇتىپ تۇرعان اپاتتار مەديتسيناسى ورتالىعىنىڭ قىزمەتكەرلەرىنە دەيىن جەتكىزەدى.

سوڭعى جاڭالىقتار

ۇقساس جاڭالىقتار