اۋىل شارۋاشىلىعى مينيسترلىگى باعا وسە بەرەتىنىن مالىمدەدى, دەپ حابارلايدى «ەۋرازيا» ءبىرىنشى ارناسى.
اقمىرزا جاناتاەۆ - 10 جىلدان استام جىلقى, سيىر جانە قوي وسىرۋمەن اينالىساتىن تاجىريبەلى مالشى. ول قازىرگى ۋاقىتتا مال ۇستاۋ ءتيىمسىز ەكەنىن ايتادى. كولىك سايمانى مەن جانارماي شامامەن 10%-عا قىمباتتادى, جەم باعاسى تورتتەن ءبىر ەسە ءوستى. بيىل جاعدايدى ءشوپ پەن ارپانىڭ تاپشىلىعى قيىنداتتى. فەرمەر ءۇشىن ءار باس التىنمەن ولشەنەدى, بىراق دەلدالدار تاۋار باعاسىن تومەندەتۋگە تىرىسىپ جاتىر.
«دەلدالدار بىزدەن ارزانعا, كەلىسىنە 1400, 1700 تەڭگەگە ساتىپ الادى. بىراق نارىقتا ولار كەمىندە ءىرى قارا ەتىن 2400, قوي ەتىن - 4000-عا دەيىن, جىلقى ەتى - 5000 تەڭگەگە دەيىن ساتادى», دەيدى شارۋا قوجالىق باسشىسى اقمىرزا جاناتاەۆ.
فەرمەرلەر جاقىن ارادا 1 كەلى ەت ءۇشىن 4000 تەڭگە سۇراۋعا تۋرا كەلەتىنىنە سەنىمدى. قازىردىڭ وزىندە سيىر ەتى, جىلقى ەتى مەن قوي ەتىنىڭ باعاسى ورتاشا ەسەپپەن 13%-عا قىمباتتاعان.
بولجامدارعا سۇيەنسەك, ەت كوپ ۇزاماي تەك مەرەكە كۇندەرى عانا بولاتىن ءدامدى تاعامعا اينالادى. ارزان بولعانى ءۇشىن تاۋىق ەتىنە سۇرانىس ارتۋى مۇمكىن.
اۋىل شارۋاشىلىعى مينيسترلىگى ەت باعاسىنا جاناما اسەر ەتەتىن فاكتورلاردى شەشۋگە تىرىسىپ جاتقانىن ايتتى.
ء«شوپ دايىنداۋ جوسپارى جاسالدى. جوسپار بويىنشا 23 ميلليون توننا ءشوپ دايىندالادى. ونىڭ ىشىندە 1 تامىزداعى جاعداي بويىنشا 60%-ى نەمەسە 15 ملن تونناسى ورىندالدى. مينيسترلىك جەم-ءشوپ قۇنىن تومەندەتۋ بويىنشا دا جۇمىس جۇرگىزىپ جاتىر», دەيدى قر اۋىل شارۋاشىلىعى مينيسترلىگىنىڭ باس ساراپشىسى عاني جۇماحمەتوۆ.
باعانىڭ قىمباتتاعانىنا قاراماستان, قازاقستاندىقتار ەتتى كوبىرەك تۇتىنا باستادى. سيىر ەتىنە سۇرانىس 1%-عا, قوي ەتىنە 1,5%-عا ءوستى. ەت ونىمدەرى بويىنشا جىلقى ەتى كوش باستاپ تۇر. ەتتىڭ بۇل تۇرىنە سۇرانىس 8 پايىزعا ءوستى.
