الپينيزم – وليمپ دوداسىنا جاڭادان قوسىلعان بەس سپورتتىڭ ءبىرى. 2016 جىلى حالىقارالىق وليمپيادا كوميتەتىنىڭ كەزەكتى وتىرىسىندا وليمپ باعدارلاماسىنا كىرگەننەن كەيىن بۇل سپورت ءتۇرىنىڭ دامۋى جىلدام قارقىن الا باستادى. ەلىمىزدە الپينيزممەن كاسىبي تۇردە شۇعىلداناتىن ءامىر مايمۇراتوۆ, بەكنۇر التىنبەكوۆ, الىشەر مۇرات, تامارا ولجاباەۆا جانە اسەل مارلەنوۆا سىندى سانداعان سپورتشى بار. سولاردىڭ اراسىندا ريشات ءحايبۋلليننىڭ شوقتىعى بيىك.
قازاقستان اتلەتتەرى اتالعان سپورت تۇرىنەن العاش رەت 2018 جىلى ازيا ويىندارىنا قاتىسقانىمەن, جەڭىس تۇعىرىنان كورىنە المادى. اراعا ءبىر جىل سالىپ جاپونيادا وتكەن الەم چەمپيوناتىندا ريشات حايبۋللين ۇزدىك جەتى سپورتشىنىڭ قاتارىنا ىلىگىپ, وليمپياداعا جولداما الدى.
«قازىر بابىمدامىن. جوسپارلانعان جارىستارعا قاتىسىپ, شىڭدالا ءتۇستىم. الەم كۋبوگىندە جاقسى ناتيجە كورسەتىپ, العا قويعان ماقساتىمدى تولىق ورىندادىم. سونداي-اق حالىقارالىق جارىستارداعى تاجىريبەم دە ارتا ءتۇستى. شىنى كەرەك, قانداي دا ءبىر سپورتشىنى باستى قارسىلاسىم دەپ ايتا المايمىن. ەڭ الدىمەن, ءوز-ءوزىڭدى جەڭۋىڭ قاجەت قوي. سوندىقتان نەگىزىنەن ءوز-وزىممەن جارىسامىن», دەدى حايبۋللين.
كەيىپكەرىمىز وليمپيادا الدىندا چەحيا كۋبوگىنە قاتىسىپ, «قيىندىق» جاتتىعۋى بويىنشا كۇمىس جۇلدەگەر اتاندى. سونداي-اق شۆەيتساريادا وتكەن الەم كۋبوگىندا سەگىزىنشى ورىننان كورىندى.
التى جاسىنان باستاپ قۇزعا ورمەلەۋمەن شۇعىلداناتىن ريشات بۇگىندە وليمپيادادا جۇلدە الادى دەگەن سپورتشىلاردىڭ قاتارىندا. ەگەر دە باعى مەن بابى قاتار شاپسا, جەرلەسىمىزدىڭ جەتىستىگىنە ءسۇيىنشى سۇرايتىن كۇن دە جاقىن دەگەن ۇمىتتەمىز. قىسقاسى, ءۇمىتىمىز ۇزىلگەن جوق ءالى.
