TOKYO2020 • 02 تامىز، 2021

جەڭىلىستەر جەڭىسكە باستاي ما؟

48 رەت كورسەتىلدى

سپورتتىڭ پاديشاسى سانالاتىن جەڭىل اتلەتيكادان مەدالداردىڭ ءبىرسىپىراسى 2 تامىز كۇنى ءوز يەلەرىن تاپتى. وكىنىشكە قاراي، جۇلدە العانداردىڭ ساناتىندا قازاقستاندىقتار تاعى دا جوق.

كەشە ايەلدەر اراسىندا 200 مەتر قاشىق­تىق بويىنشا ىرىكتەۋ كەزەڭى ءوتتى. قازاقستان ساپىنان قاتىسقان ولگا سافرونوۆا ءتيىستى مەجەنى 23،64 سەكۋندتا باعىندىرىپ، ءوز توبىندا التىنشى بولىپ كەلدى. بۇل سىندا 1-3 ورىن العان سپورتشىلار عانا جارتىلاي فينالعا جولداما الدى.

ال 200 مەتر قاشىقتىقتا بايداركا ەسۋدەن ناتاليا سەرگەەۆا ءتيىستى قاشىق­تىقتى 46،657 ۋاقىتتا باعىندىرىپ، التىن­شى ورىنعا تۇراقتادى. ناتيجەسىندە، قازاق­ستاندىق اتلەت كەلەسى كەزەڭگە وتكەنىمەن شيرەك فينالدا جەتىنشى ورىننان كورىنىپ، جارتىلاي فينالعا وتە المادى. ايتا كەتەرلىگى، ناتاليا سەرگەەۆا 4 تامىز كۇنى 400 مەتر قاشىقتىق بويىنشا جارىس جولىنا شىعادى.

توكيو وليمپياداسىندا گرەك-ريم كۇرە­سىنەن بەلدەسۋلەر جالعاسىپ جاتىر. كە­شە بوزكىلەمگە دەمەۋ جادىراەۆ شىقتى. ەرلەر اراسىندا 77 كيلوعا دەيىنگى سالماق دارەجەسىندە سىنعا تۇسكەن وتانداسىمىز جاپونيالىق ياكيبۋ سوحەيگە جول بەردى. تارتىستى بەلدەسۋ 5:3 ەسەبىمەن جاپونيالىق بالۋاننىڭ پايداسىنا شەشىلدى.

ەكى كۇننىڭ قورىتىندىسى بويىنشا قازاقستان ساپىنان كىلەمگە شىققان قوس بالۋان دا قارسىلاستارىنا العاشقى اينالىمدا جول بەردى. ۇلتتىق قۇرامانىڭ باس باپكەرى باقتيار بايسەيىتوۆ گازەت وقىر­ماندارىنا شاكىرتتەرىنىڭ جەڭىلىسىن جات­تىقتىرۋشىلاردىڭ تاپسىرماسىن ورىن­داماعانىمەن ءتۇسىندىردى.

«1 تامىز كۇنى مەيرامبەك ايناعۇلوۆ جاتتىقتىرۋشىلار تاپسىرماسىن ورىندامادى. ءبىز قاتاڭ ەسكەرتىپ، تىيىم سال­عان ءادىس-ءتاسىلدى كىلەمگە شىققان سات­تە-اق قولداندى... وسىلايشا، ءوز قاتە­لىگى­نىڭ كەسىرىنەن قار­سى­لاسىنا جول بەردى. ال دەمەۋ جادىراەۆ جاپون بالۋا­نىن ۇپاي سانىمەن جەڭىپ تۇرعان. سوڭعى ساتتە قارسىلاسىنا ەسە جىبەردى. 30 سەكۋند­تىق ءۇزىلىس بولعان كەزدە ءبارىن ءتۇ­سىندىرىپ، بەلدەسۋدى سوڭىنا دەيىن بەرمەي، باقىلاۋعا الۋ كەرەك ەكەنىن ايتقان بولاتىنبىز. دەمەۋدىڭ ءدال وسىلاي سوڭعى ساتتە قارسىلاسىنا ۇپاي سىيلاعانىن ءبىز دە تۇسىنە المادىق»، دەدى باس باپكەر.

ايتا كەتەيىك، گرەك-ريم كۇرەسىنەن وليم­پيا ويىندارىنا قازاقستان ءۇش جولداما جەڭىپ العان ەدى. توكيو وليمپياداسىنا مەي­رامبەك ايناعۇلوۆ (60 كگ)، دەمەۋ جادى­راەۆ (77 كگ) قاتىسىپ، العاشقى اينالىمدا جەڭىلىس تاپتى. بۇگىن 87 كيلوعا دەيىنگى سال­ماق دارەجەسىندە نۇرسۇلتان تۇرسىنوۆ كۇرە­سەتىن بولادى.

بايداركا مەن كانوەدان ەرلەر ارا­سىندا 1000 م قاشىقتىقتاعى شيرەك فينالدىق سىندار اياقتالدى. اتالعان سانات بويىنشا قازاقستان ساپىنان اعايىندى سەرگەي مەن تيموفەي ەمەليانوۆتار قاتىستى. شيرەك فينالدىڭ ناتيجەسى بويىنشا قازاقستان 3:55.157 كورسەتكىشپەن ءتورتىنشى ورىننان كورىندى. مۇنداي ناتيجە ا فينالىنا جولداما الۋعا جەتكىلىكسىز بولعاندىقتان، قازاقستاندىق دۋەت ۆ فينالىندا باق سىنايدى. ۆ فينالى بۇگىن وتەدى.

كەشە 50 مەترگە ءۇش اراقاشىقتان نىسانا كوزدەۋدەن يۋري يۋركوۆ سىنعا ءتۇستى. جەرلەسىمىزگە سەگىز سپورتشىعا عانا جولداما بەرىلەتىن فينالدىق كەزەڭگە وتۋگە ءتورت ۇپاي جەتپەي قالدى.

«يۋري ناعىز جاۋىنگەر، ول ەڭ سوڭىنا دەيىن بەرىلگەن جوق. ءيا، فينالعا ءوتۋ ءۇشىن نەبارى ءتورت ۇپاي جەتپەي قالدى. بۇل ءبىزدىڭ دە، سپورتشىنىڭ دا كوڭىلىن تۇسىرگەنى انىق. بىراق بۇل سپورت، سپورتتا كەز كەلگەن ناتيجەنى كۇتۋگە بولادى. ازىرگە، بۇل يۋركوۆتىڭ وليم­پياداداعى ەڭ ۇلكەن كورسەتكىشى. توكيو ويىن­دارىنىڭ وتەتىن ۋاقىتى دا ۇزاپ كەتتى، پاندەمياعا بايلانىستى دايىندىق كەزىندە دە قيىندىقتار تۋدى. مۇنىڭ ءبارى دە اسەرىن تيگىزگەن شىعار. ەندى جينالىپ، الداعى دودالارعا دايىندالامىز»، دەدى كوماندانىڭ باس باپكەرى ولگا دوۆگۋن.

سۋ دوبىنان قازاقستان قۇراماسى ءۇشىن توكيو وليمپياداسى ءساتسىز اياقتالدى. كەشە­گى كۇنگە دەيىن وتاندىق ۆاتەرپولشى­لار يسپانيا، سەربيا، چەرنوگوريا جانە حورۆاتيا كومان­دالارىنا جول بەرگەن ەدى. ىرىكتەۋدىڭ سوڭعى كەزەڭىندە دە الەكساندر شۆەدوۆ شاكىرتتەرى سول جۇرىسىنەن «جاڭىلماي»، اۋسترالياعا قارسى كەزدەسۋدە 7:15 ەسەبىمەن جەڭىلىسكە ۇشىرادى.

سوڭعى جاڭالىقتار

ەڭبەكپەن ەسەيگەن ەر

قازاقستان • كەشە

بەيتانىس ساعىنىش

الەم • كەشە

جالعىزدىق ارالى

كينو • كەشە

ەلوردادا قار جاۋادى

قازاقستان • كەشە

بۇگىن ماشينا جاساۋ كۇنى

قازاقستان • كەشە

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار