پرەزيدەنت • 02 تامىز، 2021

باقىتجان ساعىنتاەۆ مەملەكەت باسشىسىنا ەسەپ بەردى

33 رەت كورسەتىلدى

مەملەكەت باسشىسى قاسىم-جومارت توقاەۆ الماتى اكىمى باقىتجان ساعىنتاەۆتىڭ ەسەبىن تىڭدادى، دەپ حابارلايدى Egemen.kz پرەزيدەنتتىڭ ءباسپاسوز حاتشىسى بەرىك ءۋاليدىڭ فەيسبۋكتەگى جازباسىنا سىلتەمە جاساپ.

پرەزيدەنت قاسىم-جومارت توقاەۆ الماتى قالاسىنىڭ اكىمى باقىتجان ساعىنتاەۆپەن شاھارداعى كوروناۆيرۋس ىندەتىنىڭ تارالۋىنا قارسى اتقارىلىپ جاتقان شارالار جانە قالانىڭ ينفراقۇرىلىمىن دامىتۋ ماسەلەلەرىن تەلەفون ارقىلى تالقىلادى.

باقىتجان ساعىنتاەۆتىڭ ايتۋىنشا، «دەلتا» شتامىنىڭ تارالۋىنا بايلانىستى الماتى قالاسىنداعى ەپيدەميولوگيالىق جاعداي كۇردەلى بولىپ تۇر. وتكەن اپتادا ىندەت جۇقتىرۋ 1،5 ەسە ارتىپ، 6397-دەن 9852-گە جەتكەن. ءبىر تاۋلىكتە ۆيرۋس جۇقتىرۋ 1،7 پايىزعا كوبەيگەن. سوڭعى تاۋلىكتە جاڭادان 1540 ناۋقاس تىركەلسە، ولاردىڭ 1404-ىندە ىندەتتىڭ بەلگىلەرى بار.

ناۋقاستار سانىنىڭ ارتۋىنا بايلانىستى قوسىمشا جۇقپالى اۋرۋلار اۋرۋحانالارى اشىلۋدا. قازىر 7625 ناۋقاس ەم قابىلداپ جاتىر، 2400 ورىندىق توسەك-ورىن قورى جاساقتالدى.

قالانىڭ ءدارىحانا جەلىسىن ءدارى-دارمەكپەن قامتاماسىز ەتۋ ماقساتىندا 5 ميلليارد تەڭگە كولەمىندە تۇراقتاندىرۋ قورى قۇرىلدى. 68 ءتۇرلى ءدارى-دارمەكتىڭ قاجەتتى مولشەرى جاساقتالدى. قالانىڭ مەديتسينالىق ۇيىمدارى ءدارى-دارمەك پەن جەكە قورعانىش قۇرالدارىنىڭ ەكى ايلىق قورى قامتاماسىز ەتىلگەن.

تۇرعىندارعا جاپپاي ەكپە سالۋ جالعاسىپ جاتىر. قالادا 167 ۆاكتسينا سالۋ پۋنكتى جۇمىس ىستەپ تۇر. 2 تامىزداعى جاعداي بويىنشا 725 575 ادامعا ەكپەنىڭ ءبىرىنشى كومپونەنتى، 510 989 تۇرعىنعا ەكىنشى كومپونەنتى سالىنعان.

مەملەكەت باسشىسى الماتى قالاسىنىڭ اكىمىنە كوروناۆيرۋس ىندەتىنىڭ تارالۋىنا جول بەرمەۋ بويىنشا جۇمىستى كۇشەيتۋدى جانە شەكتەۋ شارالارىنىڭ ساقتالۋىن قاتاڭ باقىلاۋعا الۋ جونىندە تاپسىرما بەردى.

اڭگىمەلەسۋ بارىسىندا باقىتجان ساعىنتاەۆ قاسىم-جومارت توقاەۆقا ناۋرىزباي اۋدانىنا قوسىلعان ىقشام اۋداندارداعى تۇرعىنداردى ساپالى اۋىز سۋمەن قامتاماسىز ەتۋ جانە اباي داڭعىلىن قالا شەكاراسىنا دەيىن ۇزارتۋ جونىندە باياندادى. سونىمەن قاتار قالانىڭ تاريحي ورتالىعىنداعى قۇرىلىستاردى شەكتەۋ ماسەلەلەرى كوتەرىلدى.

سوڭعى جاڭالىقتار

ۇقساس جاڭالىقتار