بۇعان دەيىن ۇلتتىق كاسىپكەرلەر پالاتاسى مەن تسيفرلىق دامۋ مينيسترلىگى بىرلەسىپ, Ashyq قوسىمشاسىن InfoKazakhstan.kz سايتىندا تىركەۋ ءراسىمىن جەڭىلدەتكەن ەدى. وتىنىمدەر وڭايلاتىلعان الگوريتم بويىنشا قابىلدانادى. ەگەر بۇرىن ءوتىنىمدى وڭدەۋگە 7 كۇنگە دەيىن ۋاقىت كەتسە, بۇگىندە جۇيە اۆتوماتتاندىرىلعان جانە QR-كودتى الۋعا ەكى ساعاتتان ارتىق ۋاقىت كەتپەيدى. ءارى بۇل جۇمىستاردىڭ ءبارى تەگىن.
كەشە وڭىرلىك كاسىپكەرلەر پالاتاسىنىڭ ماماندارى قاراعاندىلىق كاسىپكەرلەرگە كومەكتەستى. «قالانىڭ ۇلكەن بازارلارىنىڭ بىرىندە 77 جالعا الۋشى ءوتىنىم بەردى, ولاردىڭ 22-ءسى QR-كود العان. قاراعاندى وبلىسىنداعى كومەك كورسەتۋ پۋنكتەرى بۇگىندە ءوڭىردىڭ 18 اۋدانىندا جانە ءىرى قالالارىندا جۇمىس ىستەيدى. جالعا الۋشىلار وتە بەلسەندى, بارلىعى قوسىلعىسى كەلەدى. قازىردىڭ وزىندە 100-گە جۋىق ءوتىنىم كەلىپ ءتۇستى», – دەدى بازار اكىمشىلىگىنىڭ وكىلى يرينا ميشانوۆا.
QR-كودتى الۋعا ءوتىنىم بەرگەن كاسىپكەرلەردىڭ ءبىرى ليديا چەرنىشوۆا «سامال» بازارىندا سومكە مەن باسكيىم ساتادى. ول بۇعان دەيىن ءوتىنىم بەرگىسى كەلگەن, بىراق وزدىگىنەن جاساي الماپتى. ليديا قاراعاندى وبلىسى كاسىپكەرلەر پالاتاسىنىڭ كومەك كورسەتۋ پۋنكتىن اشقانى جاقسى مۇمكىندىك ەكەنىن ايتىپ وتىر.
ال الماتىدا اپتا باسىنان بەرى Ashyq جوباسىنا قوسىلۋ ءۇشىن 2 مىڭ جاڭا ءوتىنىم كەلىپ تۇسكەن. وسىعان بايلانىستى الماتى قالاسىنىڭ كاسىپكەرلەر پالاتاسىندا دا بيزنەس سۋبەكتىلەرىنە كومەك كورسەتۋ پۋنكتى اشىلدى.
«ەگەر ماۋسىمنىڭ باسىنداعى جاعداي بويىنشا الماتى قالاسىندا بارلىعى 1 700 قاتىسۋشى بولسا, بۇگىنگى كۇنى ولاردىڭ سانى شامامەن 3 000 وبەكتىنى قۇرايدى» دەلىنگەن پالاتانىڭ بەرگەن اقپاراتىندا.
سوڭعى ستاتيستيكاعا سۇيەنسەك, قازاقستان بويىنشا بۇگىندە 21,9 مىڭ بيزنەس سۋبەكتىسى Ashyq جوباسىنا قوسىلعان. ەگەر كاسىپكەرلەر تاراپىنان Ashyq جوباسىنا قوسىلۋعا قاتىستى سۇراق تۋىنداسا, وڭىرلىك كاسىپكەرلەر پالاتاسىنا نەمەسە بيزنەس نىسانى ورنالاسقان مەكەنجاي بويىنشا وكپ فيليالدارىنا حابارلاسىپ, اقپارات العان ءجون. ال كومەك كورسەتۋ پۋنكتەرىنىڭ مەكەنجايىن ءبىلۋ ءۇشىن «1432» بىرىڭعاي نومىرىنە حابارلاسۋعا بولادى.
