جۇلدەگە جاقىنداۋ كورسەتكىشتى ميلاد كەرمەدەگى جاتتىعۋ بويىنشا تىركەدى. ىرىكتەۋدە 14,766 ۇپاي جيناعان ول جالپى ەسەپتە ەكىنشى ورىن العان ەدى. ءدال وسى جاتتىعۋدان ميلادتان مەدال كۇتەمىز.
بۇعان دەيىن ازيا, الەم چەمپيوناتىندا سىنعا تۇسكەنىمەن, جۇرت كوزىنە تۇسە قويماعان ميلاد ءتاۋىر ناتيجەگە تەك 2019 جىلدان باستاپ جەتە باستادى. 2019 جىلى يتاليانىڭ نەاپول قالاسىندا وتكەن جازعى ۋنيۆەرسيادادا كۇمىس مەدال جەڭىپ الدى. 2020 جىلعى گيمناستيكادان الەم كۋبوگىنىڭ سەرياسى اياسىندا اۋستراليانىڭ مەلبۋرن قالاسىندا وتكەن ەركىن جاتتىعۋدا قولا مەدالعا يە بولدى.
«وليمپياداعا دەيىن كيەۆتە جاتتىعۋ جاسادىق. وليمپياداعا قاتىسۋ بالا كەزدەگى ارمانىم ەدى. سول ارمانعا جەتۋ وڭاي بولعان جوق. كۇش-جىگەرىمدى سالىپ ءجۇرىپ ماقساتىما قول جەتكىزدىم. ەندى قايتكەندە دە توكيودا ءتاۋىر ناتيجە كورسەتسەم دەيمىن», دەدى م.كاريمي.
وليمپيادا باستالعالى بەرى بارلىق سپورتشىعا سەنىم ارتىپ, «مەدال الادى دەگەن سەنىم ارتامىز» جازىپ جاتىرمىز عوي. الايدا ءۇمىتىمىز اقتالماي, سپورتشىلارىمىز قوعاداي جاپىرىلىپ جەڭىلىپ جاتىر. ميلاد كاريميگە قاتىستى ماقالامىزدىڭ تاقىرىبىن سۇراقپەن قويىپ وتىرعانىمىزدىڭ ءجونى وسىنداي. كەرمەدەگى جاتتىعۋ بويىنشا كاريمي كوك تۋىمىزدى جەلبىرەتىپ جاتسا, قۋانىشتىڭ كوكەسى سول بولار ەدى!
