پرەزيدەنتكە ايماقتا كوروناۆيرۋس ىندەتىنە شالدىققان ناۋقاستاردىڭ 22 جۇقپالى اۋرۋلار ستاتسيونارىندا ەمدەلىپ جاتقانى, توسەك-ورىن قورى 2113 ورىنعا جەتكىزىلىپ, تاعى 5 مىڭى رەزەرۆتە تۇرعانى تۋرالى باياندالدى. مەملەكەت باسشىسىنىڭ تاپسىرماسى بويىنشا ءدارى-دارمەك قورىمەن دە قامتاماسىز ەتىلگەن.
بۇدان كەيىن قاسىم-جومارت توقاەۆ قاتەرلى ىسىك اۋرۋىنىڭ بەلگىلەرى بار جانە وسى دەرت بويىنشا ەسەپتە تۇرعان ناۋقاس ادامدارعا كونسۋلتاتيۆتى-دياگنوستيكالىق كومەك كورسەتۋگە مامانداندىرىلعان ونكولوگيالىق ەمحانانى ارالاپ كوردى.
مەملەكەت باسشىسى وبلىستا مەديتسينا ينفراقۇرىلىمى جاقسى قارقىنمەن دامىپ, جاڭا نىساندار بوي كوتەرىپ جاتقانىن اتاپ ءوتتى. ونىڭ ايتۋىنشا, جوسپارلى تۇردە ەم الاتىن ازاماتتارعا, جۇرەك-قان تامىرلارى دەرتىمەن جانە قاتەرلى ىسىكپەن اۋىراتىن ناۋقاستارعا كورسەتىلەتىن مەديتسينالىق قىزمەت تۇرلەرى كوۆيد كەزەڭىنە دەيىنگى دەڭگەيدە بولۋى ءتيىس.
پرەزيدەنت دەنساۋلىق ساقتاۋ سالاسىنىڭ ماماندارىنا قاجىرلى ەڭبەگى ءۇشىن ريزاشىلىعىن ءبىلدىردى.
– مەديتسينا قىزمەتكەرلەرىنىڭ جۇمىسىنا, اسىرەسە پاندەميا كەزەڭىندە سالماق ءتۇسىپ وتىر. ەڭبەك دەمالىسىنا دا بارماي, سەنبى-جەكسەنبى كۇندەرى دە دامىل كورمەي جۇمىس ىستەپ جۇرگەنى ءۇشىن مەديتسينا قىزمەتكەرلەرىنە العىسىمدى بىلدىرەمىن. دارىگەرلەرگە وتە قيىن, بىراق ءبىز ولاردى قولدايمىز, – دەدى قاسىم-جومارت توقاەۆ.
