قازاقستان • 27 شىلدە، 2021

قازاقستاندا LinkedIn الەۋمەتتىك جەلىسى بۇعاتتالدى

64 رەت كورسەتىلدى

قر اقپارات جانە قوعامدىق دامۋ مينيسترلىگىنىڭ باستاماسى بويىنشا ەل اۋماعىندا ينتەرنەت-كازينولاردى جارنامالاعان LinkedIn الەۋمەتتىك جەلىسى بۇعاتتالدى، دەپ حابارلايدى Egemen.kz Forbes-كە سىلتەمە جاساپ.

قر اقپارات جانە قوعامدىق دامۋ مينيسترلىگى LinkedIn الەۋمەتتىك جەلىسى جۇمىسىنىڭ توقتاتىلۋىن ينتەرنەت رەسۋرسى تاراپىنان ورىن العان ءتارتىپ بۇزۋشىلىقپەن ءتۇسىندىردى.

«LinkedIn ينتەرنەت رەسۋرسىنا مونيتورينگ جۇرگىزۋ بارىسىندا بىرنەشە زاڭبۇزۋشىلىق انىقتالدى. اتاپ ايتقاندا، ينتەرنەت-كازينونى جارنامالاۋ جانە بىرەۋلەردىڭ اتىنان جالعان اككاۋنتتار اشۋ. اتالعان زاڭبۇزۋشىلىقتار قازاقستان رەسپۋبليكاسىنىڭ زاڭنامالىق تالاپتارى مەن قاتار LinkedIn ينتەرنەت رەسۋرسىنىڭ ىشكى ەرەجەلەرىنە دە قايشى كەلەدى»، دەلىنگەن اتالعان ۆەدومستۆونىڭ ءباسپاسوز حابارلاماسىندا.

مينيسترلىكتىڭ مالىمەتىنشە، LinkedIn جەلىسىن قولدانۋشىلارعا ارنالعان كەلىسىمدە ينتەرنەت رەسۋرستا جاريالاناتىن اقپارات زاڭدى ءارى راس بولۋى ءتيىس جانە ول ءۇشىنشى جاقتىڭ قۇقىعىنا قايشى كەلمەۋى كەرەك. سونداي-اق، اتالعان الەۋمەتتىك جەلى ەرەجەسىنە سايكەس، قولدانۋشىلاردى شاتاستىرىپ، جالعان اقپارات تاراتۋعا جانە قۇمار ويىنداردى جارنامالاۋعا تىيىم سالىنادى.

«وسى ورايدا مينيسترلىك قر «بايلانىس» تۋرالى» زاڭىنىڭ 41-1 بابىنىڭ 3-1 تارماعىنا سايكەس، زاڭبۇزۋشىلىقتىڭ ورىن العانىن انىقتاپ، LinkedIn ينتەرنەت رەسۋرسىنىڭ اكىمشىلىگىنە اتالعان ولقىلىقتى جويۋ تۋرالى حابارلاما جىبەردى. وكىنىشكە قاراي، جەلى اكىمشىلىگى تاراپىنان زاڭبۇزۋشىلىق ءالى كۇنگە دەيىن جويىلعان جوق»، دەلىنگەن اقپاراتتا.

اقپارات جانە قوعامدىق دامۋ مينيسترلىگى LinkedIn جەلىسىن قولدانۋداعى زاڭبۇزۋشىلىق جويىلىپ، قالپىنا كەلگەن جاعدايدا ونىڭ جۇمىسى ەلىمىزدە جالعاسا بەرەتىنىن مالىمدەدى.

سوڭعى جاڭالىقتار

دوللار باعامى قايتا ءوستى

قارجى • بۇگىن، 16:12

ۇقساس جاڭالىقتار