ايماقتار • 27 شىلدە، 2021

قوقىس زاۋىتىنىڭ قۇرىلىسى باستالدى

24 رەت كورسەتىلدى

جاقىن بولاشاقتا قالا ماڭىنداعى قوقىس پوليگوندارى ءتۇپ ورنىمەن جويىلىپ، قالا كوشەلەرىندە تسەللوفان ۇشىپ، بوتەلكە جايراپ جاتپايتىن شىعار. ولاي دەيتىنىمىز، وسكەمەن مەن سەمەيدە قوقىس سۇرىپتايتىن ەكى زاۋىتتىڭ قۇرىلىسى باستالعان. زاۋىت ىسكە قوسىلعاننان كەيىن تۇرمىستىق قالدىقتاردىڭ 30 پايىزى قايتا وڭدەۋگە جونەلتىلىپ وتىرادى.

قوقىس پوليگونىنىڭ كەشەنى وسكەمەنگە تاياۋ 4،2 گەكتار اۋماققا سالىنىپ جاتىر. ونىڭ قۇرىلىسىمەن رەسپۋبليكا بويىنشا قالدىقتاردى جيناۋ، تاسىمالداۋ، قايتا وڭدەۋ جانە كادەگە جاراتۋدى ۇيىمداستىرۋشى «وكم وپەراتور» كومپانياسى وكىلدەرى تانىستىردى. جوبا جەتەكشىسىنىڭ ايتۋىنشا، عيماراتتىڭ ىرگەتاسى قۇيىلىپ، كوممۋنيكاتسيا جۇرگىزىلدى. قازىر مەتالل كونسترۋكتسيادان جاسالعان كورپۋستى مونتاجداۋعا دايىندىق باستالدى. كەشەن جىلىنا 100 مىڭ توننا تۇرمىستىق قالدىقتى سۇرىپتاي الادى. پايدالانۋعا 30 تامىزدا، قالا كۇنىنە وراي بەرىلمەك. ال سەمەيدەگى زاۋىت 29 تامىزدا قولدانىسقا وتەدى.

«وسكەمەنسپەتسكوممۋنترانس» كومپانيا­سىنىڭ ديرەكتورى قازەز ماحامبەتوۆتىڭ ايتۋىنشا، زاۋىتقا كەلگەن قوقىستىڭ پاكەتى ارنايى ماشينادا اشىلادى. سودان كەيىن ءتورت ادامدىق كابينادا وڭدەۋگە جارامسىز ءىرى قالدىقتار قولمەن الىنىپ تاستالادى. ودان ارى بارابان سەپاراتوردا ۇساق، ءىرى قالدىقتار ەلەكتەن وتەدى، بالليستيكالىق سەپاراتوردا قالدىقتار تويتارىلادى، ماگنيت سەپاراتوردا قارا مەتالدار الىنىپ تاستالادى، قۇيىن توك سەپاراتورىندا اليۋميني مەتالداردى سۇرىپتايدى، وپتيكا سەپاراتورىندا قالدىقتار ساۋلە ارقىلى جەكە-جەكە (مىسالى، قاعاز، پلاستيك، تسەللوفان) بولىنەدى دە، سوڭعى كەزەڭ – نىعىزداۋعا جىبەرىلەدى. بۇل بولىمدە سۇرىپتاۋدان وتكەن قالدىقتار جينالىپ، بۋنكەرگە ساقتاۋعا قويىلادى. قويما تولعاندا قالدىقتار نىعىزدالىپ، پاكەتتەلەدى دە باسقا وبلىستاعى وڭدەيتىن زاۋىتتارعا جونەلتىلەدى.

– اۆتومات جابدىقتاردى باسقارۋعا شامامەن 30 ادام جۇمىسقا الىنادى. ودان بولەك ءتورت-بەس ادام كۇزەتشى رەتىندە جۇمىسپەن قامتىلۋى مۇمكىن. ايتا كەتەيىك، ءبىز گرەكياعا ەكى رەت باردىق. ءبىرىنشى رەت وسى اتالعان جاب­دىقتاردى تاڭدادىق. ەكىنشى رەت ولارمەن جۇمىس ىستەۋدى ۇيرەنىپ قايتتىق، – دەدى ق.ماحامبەتوۆ.

ونىڭ سوزىنشە، بۇل اۆتوماتتاندىرىلعان Sabo برەندىنىڭ جابدىقتارى گرەكيادان 1،35 ملرد تەڭگەگە ساتىپ الىنعان. قازىر قالاعا وپتيكالىق جانە بالليستيكالىق سەپاراتورلار جەتكىزىلدى. تىزبەكتى جانە تاسپالى كونۆەيەرلەر، الدىن الا سۇرىپتاۋ كابيناسى مەن بارابان سەپاراتورى كەلەسى پارتيامەن الدىرىلادى. جابدىقتار قالا اكىمدىگىنىڭ بالانسىنا بەرىلەدى.

– وسكەمەندە تۇرعىن ءۇي اۋلالارىنا سا­رى، كوك جانە جاسىل ءتۇستى قوقىس كونتەينەرلەرى قويىلىپ جاتىر. ارقايسىسىنىڭ سىرتىندا قانداي قالدىقتاردى تاستاۋ كەرەك ەكەنى جازىلعان. سارى كونتەينەر قاعاز، پلاستيك قالدىقتارعا، كوك كونتەينەر شىنى ىدىس­تارعا، ال جاسىل كونتەينەر تاماق قالدىق­تارىنا ارنالعان. مۇنى StopMusor جوباسى اياسىندا ەرىكتىلەر دە حالىق اراسىندا ناسيحاتتاپ، ءتۇسىندىرىپ شىعادى، – دەدى StopMusor جوباسىنىڭ ۇيلەستىرۋشىسى اسىل وقاپوۆا.

«وكم وپەراتورى» كومپانياسىنىڭ دي­رەكتورى مەدەت قۇمارعاليەۆ حالىق بۇل ءىستى دۇرىس تۇسىنەدى جانە قالانىڭ ەكولوگيالىق احۋالىن جاقسارتۋعا اتسالىسۋعا دايار دەپ سەنەدى. ونىڭ ايتۋىنشا، الدىڭعى قاتارلى ەلدەر قالدىقتى سۇرىپتاپ، وڭدەۋگە الدەقاشان كىرىسىپ كەتكەن. ەكولوگيالىق احۋال الەمدە قاتتى ۋشىعىپ تۇرعاندىقتان، قورشاعان ورتانى تازا ۇستاۋ، تابيعي ءونىم تۇتىنۋ وتە وزەكتى بولىپ وتىر. ەگەر تۇرعىندار قالدىقتىڭ ءبارىن ءبىر كونتەينەرگە سالسا نەمەسە تاسىمالداۋشى جۇك ماشينالارى تاعام قالدىقتارىن وزگەسىنە قوسىپ الىپ كەلسە، جوبا قۇرىدى دەپ ايتا بەرۋگە بولادى. سوندىقتان ءار كونتەي­نەردەگى قوقىستى ءارتۇرلى جۇك كولىگى زاۋىتقا جەتكىزىپ تۇرادى.

– تۇرعىندار ماكۋلاتۋرا، پلاستيك، شىنى جانە مەتالل قالدىقتارىن بىزگە تاپسىرىپ، تابىس تابا الادى. تامىزدان باستاپ EcoQolday HOME جوباسىن جۇزەگە اسىرامىز. تۇرعىندار وسى جوبانىڭ قوسىمشاسىن سمارتفونعا جۇكتەي وتىرىپ، ساۋدا-ساتتىق تاسىلىمەن جيناعان قالدىقتارىن وتكىزە الادى. ايتا كەتەيىن، ەلىمىزدە قاعاز، شىنى قال­دىقتاردى وڭدەيتىن زاۋىتتار بار. ولار شيكى­زاتقا ءزارۋ. سوندىقتان زاۋىت جۇمىسى ناتي­جەلى بولارى انىق. ءبىز قوقىس جيناۋ، سۇرىپ­تاۋمەن اينالىسقىسى كەلەتىن بيزنەس­مەندەرگە دە قۋانا-قۋانا قولداۋ كورسەتە­تىنىمىزدى حابارلايمىز، – دەيدى م.قۇمارعاليەۆ.

سونىمەن زاۋىت قالادا جينالاتىن قال­دىقتىڭ 30 پايىزىن وڭدەيدى. وڭدەلمەيتى­نى – تا­عام قالدىقتارى. ول شامامەن ءبىر جىل كولە­مىندە قولدانىستاعى پوليگونعا تاستالادى. ال كەلەسى جىلى قوقىس ورتەيتىن زاۋىت سالىنادى.

– قولدانىستاعى پوليگون تولىپ، پايدالانۋ مەرزىمى اسىپ تۇرعانى بارىمىزگە بەلگىلى. كەلەسى جىلعا دەيىن وندا تاعام قالدىقتارى سىعىمدالىپ تاستالادى. كەلەسى جىلى ءدال وسى ماڭدا قوقىس ورتەيتىن زاۋىت سالىنادى. وڭ­دەلمەيتىن قالدىقتار سوندا ورتەلەدى. قازىر پوليگوندا جينالعان قوقىس تا سوندا ورتەلەدى. دەمەك، بولاشاقتا بىزگە قوقىس پوليگونى مۇلدە كەرەك ەمەس، – دەيدى قالا اكىمىنىڭ ورىنباسارى دەنيس فەدچەنكو.

قالادا قوقىس پوليگونى ماسەلەسىنىڭ شەشىمى بىرنەشە جىلدان بەرى تابىلماي كەلگەن. اۋلالار مەن ايالدامالارعا ءتۇرلى قوقىس جاشىكتەرى جانە كونتەينەرلەر بۇعان دەيىن دە قويىلعانىمەن، ونىڭ اقىرى تۇسىنىكسىز كۇيدە قالا بەرگەن. ەندىگى ۋاقىتتا بۇل سۇرىپتاۋ زاۋىتى اياقسىز قالماسا يگى.

 

شىعىس قازاقستان وبلىسى

 

سوڭعى جاڭالىقتار

ەڭبەكپەن ەسەيگەن ەر

قازاقستان • كەشە

بەيتانىس ساعىنىش

الەم • كەشە

جالعىزدىق ارالى

كينو • كەشە

ەلوردادا قار جاۋادى

قازاقستان • كەشە

بۇگىن ماشينا جاساۋ كۇنى

قازاقستان • كەشە

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار