وبلىستاعى الپاۋىت كومپانيا – «ولجا اگرو» حولدينگى جوباعا قاتىسۋشىلاردىڭ ارقايسىنىڭ الدىنا 100 باس ءىرى قارادان سالىپ بەرىپ وتىر. اگروحولدينگ مۇنىڭ سىرتىندا, وتباسىلىق شاعىن فەرمالارعا جىلى قورا-جاي, جايلى جايىلىم بەرىپ, ۆەتەرينارلىق كومەك كورسەتەدى. «ولجا اگرو» ءار وتباسى قىسقى مال ازىعىن دايارلاپ الۋ ءۇشىن جالعا تەحنيكا بەرۋ, ولاردى كاسىپكە وقىتۋ, شارۋاشىلىققا, قۇقىقتىق سالاعا قاتىستى تۇراقتى تۇردە كەڭەس بەرىپ وتىرۋ سياقتى مىندەتتەردى دە ءوز موينىنا العان.
– شىنتۋايتىنا كەلگەندە, ءبىز ءوز كاسىبىمىزدىڭ ءبىر بولشەگىن اۋتسورسينگكە بەرىپ وتىرمىز. بۇل بارىمىزگە دە ءتيىمدى. جاڭا جوبا وڭىردەگى كاسىپكەرلىك پەن مال شارۋاشىلىعىن دامىتۋعا كۇشتى سەرپىن بەرەتىنىنە سەنىمدىمىن. ونىڭ ۇستىنە جالپى وڭىرلىك ءونىمنىڭ كولەمى وسەدى, جەرگىلىكتى بيۋدجەتتەرگە سالىق ءتۇسىمى ەسەلەنەدى, جاڭا جۇمىس ورىندارى پايدا بولادى, ەكسپورت الەۋەتى ارتادى, اۋىلدىڭ ينفراقۇرىلىمى داميدى. كەلىسىمشارتقا وتىرعان كاسىپكەرلەر بىزبەن جىل سايىن العان ءتولىنىڭ ءبىر بولىگى ەسەبىنەن 7 جىل ىشىندە ەسەپ ايىرىسادى. جەتى جىل وتكەن سوڭ شارۋاشىلىقتاعى بۇكىل قورا-جاي مەن مال باسى كاسىپكەردىڭ ءوز يەلىگىنە وتەدى. تاراپتاردىڭ تابىسىنا قاتىستى بارلىق تسيفرلاردى ەسەپتەپ, پىسىقتاپ قويدىق. بۇل جەردە ەشكىم ۇتىلمايدى, – دەدى اگروحولدينگ باسشىسى ايداربەك قوجانازاروۆ.
قاناتقاقتى جوباعا بۋدەنوۆ اۋىلىندا تۇراتىن سەرگەي شتوما دا قاتىسىپ جاتىر. بۇگىندە «بۋدەنوۆسكوە» دەپ اتالاتىن جەكە شارۋا قوجالىعىن اشىپ, ايەلى مەن بالا-شاعاسىن ءبىر فەرمانىڭ اينالاسىنا ۇيىستىرعان فەرمەر اتالمىش جوبانىڭ اۋىل تۇرعىندارىنا بەرەرى مول ەكەنىن ايتادى.
– بۇل – اۋىلدى دامىتۋعا پايداسى تيەتىن, كەرەك جوبا. وسىنىڭ ارقاسىندا اۋىل تۇرعىندارى اراسىنداعى جۇمىسسىزدىقتى ازايتىپ, جالپى وبلىستاعى ەت جانە ءسۇت ءونىمىنىڭ كولەمىن ۇلعايتۋعا مۇمكىندىك تۋادى. ەڭ باستىسى اۋىلدى تاستاپ كەتىپ جاتقانداردىڭ لەگى تولاستايدى. ەكىنشىدەن, اۋىل تۇرعىندارى از تابىس تابادى دەگەن تاپتاۋرىن تۇسىنىكتىڭ جويىلۋىنا ىقپال ەتەدى. بىزگە قويىلىپ وتىرعان تالاپ ونشا قيىن ەمەس. ەڭ الدىمەن, مالدى قىرىپ الماي, دۇرىستاپ باعۋ كەرەك. كەلەسى جىلدان باستاپ ءتولدى وتكىزە باستايمىز, – دەدى س.شتوما.
وتباسىلىق فەرمالار وسىرگەن ءتولدى لايىقتى باعامەن حولدينگتىڭ ءوزى ساتىپ الىپ وتىرادى. ياعني فەرمەرلەر ءونىمدى قايدا, كىمگە ساتامىز دەگەن ماسەلەگە باس قاتىرىپ جاتپايدى. جوبانىڭ باستى شارتتارىنىڭ ءبىرى – ءار وتباسى وزدەرىنە بەرىلگەن 100 باس سيىردان مەيلىنشە كوپ ءتول الىپ وتىرۋى ءتيىس. بۇل ماقساتقا جەتۋ ءۇشىن سەرىكتەستىك شاعىن فەرمالارعا بارلىق جاعدايدى جاساپ بەرىپ وتىر. تەك قانا تەر توگىپ, ادال ەڭبەكتەنۋ كەرەك. مۇنىڭ سىرتىندا اگروحولدينگ ءار فەرمەرگە 7 جىل بويى 350 مىڭ تەڭگە كولەمىندە ايلىق تولەپ وتىرادى.
مولودەجنىي اۋىلىنىڭ تۇرعىنى جانبولات جۇمانازاروۆ تا جۇبايى گ ۇلىم ەكەۋى وسى جوباعا قاتىسىپ, جاقىندا عانا وتباسىلىق فەرماسىن اشقان. جاستايىنان ەڭبەككە ارالاسىپ, مال شارۋاشىلىعى سالاسىندا مول تاجىريبە جيناقتاعان فەرمەر: «بۇعان دەيىن جەكە بيزنەسىم بولعان جوق. ەندى مال باسىن كوبەيتىپ كاسىپكەرلىكپەن اينالىسۋعا مۇمكىندىك تۋىپ وتىر. ءبىز وسى اۋىلداعى ەكى وتباسىعا ورتاق ءبىر فەرما اشتىق. بىزگە مال وسىرۋگە ارنالعان ۇلكەن قورا بەرىلگەن. ونى ەكى وتباسى ءبولىپ الدىق. قازىر قورانىڭ ءىشى سىرتىن سىلاۋ, اقتاۋ جۇمىستارىن جۇرگىزىپ جاتىرمىز», دەدى.
جانبولاتتىڭ وتباسىنا بەرىلگەن ۇلكەن قورانىڭ ەكىنشى جاعىن كارىموۆتەر وتباسى يەلىك ەتىپتى. ەرلى-زايىپتى توكەش پەن جاڭاگۇلدىڭ ۇيىندەگى ۇلكەن ۇل الداعى كۇزدە وتان الدىنداعى اسكەري بورىشىن وتەپ, اۋىلعا ورالماق. اكە-شەشەسىنىڭ ءجۇز شاقتى ءىرى قارا الىپ, فەرما اشقانىن ەستىگەن بەكارىس اسكەردەن ورالعان سوڭ اۋىلدا قالىپ, وسى فەرماداعى مال باسىن كوبەيتۋدى جوسپارلاپ قويىپتى.
– ءبىز اگروحولدينگ ماماندارىمەن اقىلداسا وتىرىپ, قازاقتىڭ اق باس سيىرلارىن الدىق. بۇل اسىل تۇقىمدى ءىرى قارا مول ەت بەرەدى. ءبىزدىڭ جاقتاعى قاقاعان قىستىڭ قىتىمىر ايازىنا دا مىڭق ەتپەيدى, ىستىق-سۋىققا بىردەي ءتوزىمدى بولىپ كەلەدى, – دەدى ت.كارىموۆ.
جالپى اۋماعى 180 مىڭ گەكتار القاپتى يگەرىپ وتىرعان الپاۋىت كومپانيا – «ولجا-اگرونىڭ» مەنشىگىندەگى مالدىڭ ۇزىن سانى بۇگىندە 15 مىڭنىڭ ۇستىنە شىققان. اگروحولدينگ جوباعا قاتىساتىن وتباسىلاردىڭ ارقايسىنا 100 سيىر, 4 وگىز, وعان قوسا وسىنشاما مالدى باعىپ-قاعىپ, كوبەيتۋگە قولايلى قورا-جاي بەرەدى.
«1000 وتباسىلىق فەرما» جوباسىنا بيىلشا حولدينگكە قاراستى شارۋاشىلىقتاردا جۇمىس ىستەپ جۇرگەن وتباسىلار عانا قاتىستىرىلىپ وتىر. جوباعا الداعى جىلدان باستاپ «ولجا اگرونىڭ» شارۋاشىلىق قۇرىلىمدارى ورنالاسقان 3 اۋداندا تۇراتىن ءارى مال باعۋدىڭ قىر-سىرىن جاقسى بىلەتىن كەز كەلگەن وتباسى قاتىسا الاتىن بولادى.
قوستاناي وبلىسى
