ەندى ەسە جىبەرۋگە بولمايدى

جانسەل 2018 جىلى ازيا ويىندارىندا كۇمىس مەدال جەڭىپ الدى. ال رۋسلان بولسا، الەمدىك رەيتينگتە ۇزدىك 10 مىقتى سپورتشىنىڭ قا­تا­رىندا.

جانسەلدىڭ ازان شاقىرىپ قويعان اتى ‒ جانساۋلە. بىراق قۇجاتتا جانسەل دەپ قاتتالعان. قىزمەت بابىمەن اكە-شەشەسى تۇركياعا كوشكەن كەزدە جان­سەل نەبارى التى جاستا بولاتىن. سپورت­تىڭ قىر-سىرىنا ۇيرەنۋدى دە انادولى جەرىندە باستادى.

جانسەل الدىمەن ۆولەيبولعا قا­تىستى. سەبەبى اناسى تۇركيادا ۆولەيبول كومانداسىنىڭ دارىگەرى بولىپ قىزمەت اتقاراتىن. ۋاقىت وتە كەلە جەرلەسىمىز تۇركيا چەمپيونا­تىندا جۇلدەگەرلەر قاتارىنان كو­رىنىپ، ەۋروداعى تۋرنيرلەردە باق سى­نايدى. الايدا كوماندالىق سپورت تۇرىندە وليمپياداعا قاتىسۋ قيىن بولعاندىقتان، جانسەل تاەكۆوندوعا بەت بۇرعان. نەگە تاەكۆوندو؟ سەبەبى ونىڭ بالا كەزدەگى ارمانى وليمپيادادا ونەر كورسەتۋ-تۇعىن. سول ارمانىن ورىنداۋ ءۇشىن وسىنداي قادامعا بارعان.

2014 جىلى قازاقستاننىڭ سپورت باسشىلارى حابارلاسىپ، ەلگە كەلىپ قۇراما اتىنان حالىقارالىق ارەناعا شىعۋ جونىندە ۇسىنىس جاساعاندا، جانسەل بىردەن كەلىسكەن. وتانىن، جەرىن اڭساعان قازاق قىزىنا ءوز ەلىنىڭ تۋى استىندا ونەر كورسەتۋدەن ارتىق باقىت بار ما؟! مۇنداي مۇمكىندىكتىڭ بولا بەرمەيتىنىن بىلگەن كەيىپكەرىمىز، قۇجاتىن دايىنداپ، 2016 جىلدان باستاپ قازاقستاننىڭ اتىنان حالىقارالىق جارىستارعا شىعا باستادى.

ناتيجە دە كوپ كۇتتىرگەن جوق. ول بىردەن 2016 جىلى ريو وليم­پياداسىنىڭ ىرىكتەۋ سىنىنا قاتىسىپ، وندا كۇمىس جۇلدەگە قول جەتكىزدى. ءسويتىپ وليمپياداعا قاتىسۋ مۇمكىندىگىنە يە بولدى. وسىلايشا، ارمانى ورىندالىپ، قازاقستاننىڭ تۋى استىندا وليمپياداعا قاتىستى. ريودان كەلگەننەن كەيىن جانسەل 2017 جىلى جازعى ۋنيۆەرسيادا مەن جازعى ازيا ويىندارىندا كۇمىس مەدال ەنشىلەدى.

...مىنە، جانسەل ءۇشىن توكيو دوداسى – ەكىنشى وليمپيادا. ريو وليم­پياداسىندا تاجىريبەسىنىڭ ازدىعىنان ءبىرىنشى اينالىمدا جەڭىلسە، كۇن­شىعىس ەلىندە ول شەبەرلىگىنىڭ شىڭ­دالعانىن، تاجىريبەسىنىڭ تولىسقانىن كور­سەتپەكشى. 67 كيلودان جوعارى سال­ماقتا سىنعا تۇسەتىن جانسەلدىڭ العاشقى قارسىلاسى وزبەكستان وكىلى سۆەتلانا وسيپوۆا بولماق. جانسەل- جانساۋلەنىڭ جۇلدىزى جارقىن بولىپ، قازاق ەلىنىڭ ءانۇرانىن شىرقاتسىن دەپ تىلەيىك.