TOKYO2020 • 26 شىلدە، 2021

ءۇشىنشى جارىس كۇنى: ءۇشىنشى قولا

103 رەت كورسەتىلدى

وليمپيادانىڭ ءۇشىنشى جارىس كۇنىندە دە تىم ءۇمىتسىز ەمەس ەدىك. العاشقى ەكى كۇندە ەكى قولا مەدال العان قازاقستاندىقتار قورجىنىنا بۇگىن دە كەم دەگەندە ەكى مەدال تۇسەدى دەپ بولجاعان ەدىك.

چينشانلودان – التىن، جانساي سماعۇلوۆتان قولا مەدال كۇتكەنبىز. «تۇيە سۇراساڭ، بيە بەرەدى»، دەمەكشى قورجىنىمىزعا قولا مەدال ءتۇستى. قولا مەدالدىڭ يەسى – ءزۇلفيا چينشانلو.

سەگىز جىل كۇتكەن جۇلدە

اۋىر اتلەتيكادان 55 كيلودا باق سىناعان ءزۇلفيا جۇلقا كوتەرۋدە ءبىرىنشى مۇمكىندىگىندە 90 كيلونى باعىندىرا الدى. ال ەكىنشى مۇمكىندىگىندە 93 كي­لوعا تاپسىرىس بەرىپ، ونى دا باسى­نان اسىرعان. الايدا تورەشىلەر العا­شىندا ەسەپتەگەنىمەن، كەيىننەن اقىل­داسا كەلە ەسەپكە المادى. ال ءۇشىنشى مۇمكىندىگىندە جەرلەسىمىز تاعى دا 93 كيلونى كوتەرگەنىمەن، ءۇش تورەشى دە قىزىل تۇيمەنى باستى. وسىلايشا، سوڭ­عى ورىنداردىڭ قاتارىندا تۇرعان ءزۇل­فيانىڭ جۇلدەگەر قاتارىنان كورىنۋىنەن كۇدەر ۇزە باستادىق. سويتسەك، بەكەر ەكەن.

ءزۇلفيا سەرپە كوتەرۋدە باستاپقىدا 123 كي­لوعا تاپسىرىس بەرىپ، ونى ەكىنشى مۇم­كىندىگىندە باسىنان اسىردى. ءسويتىپ ول ءۇشىنشى مۇمكىندىگىن پايدالانباي-اق، ءۇشىنشى ورىنعا تابان تىرەدى.

2012 جىلعى لوندون وليمپياداسىندا چەمپيون اتانعان چين­شانلو، كەيىننەن دوپينگ داۋىنا ىلىگىپ وليمپيادا مە­دالىنسىز قالىپ ەدى. ودان قالسا، ريو وليمپياداسىنا قاتىسۋ قۇقىعىنان ايىرىلدى. وسىنداي قيىندىقتارعا قاراماستان، ءزۇلفيا ساعى سىنباي اراعا سەگىز جىل سالىپ وليم­پيادانىڭ جۇل­دەگەرى اتانىپ وتىر. وسى­لايشا، توكيو وليمپياداسىنا سىنعا تۇسكەن ەكى زىلتە­مىرشىمىز دە قولا مە­دالعا يە بولدى.

بۇل سالماقتا التىن مەدالدى وليم­پيادا رەكوردىن تىركەگەن فيليپ­پين وكىلى حيديلين دياس (224 كگ) ەن­شىلەسە، كۇمىستى قىتايلىق لياو كيۋن (223 كگ) يەلەندى.

ەندىگى ءۇمىت – ەلەنادا

توكيو تاتاميىندەگى باسەكەنىڭ جوعارى ەكەنىن دزيۋشىلاردىڭ بەلدەسكەنىنەن-اق بىلۋگە بولادى. تاتاميگە شىققاننىڭ بارلىعى جەڭىس ءۇشىن بارىن سالىپ جات­قانى بايقالادى. جۇلدەدەن ءۇمىتتى جانساي سماعۇلوۆ تا ەكىنشى ىرىكتەۋ كەزە­ڭىن ادەمى-اق باستادى. 73 كيلوعا دەيىنگى سالماقتا سىنعا تۇسكەن ول ار­مەنيالىق فەرديناند كاراپەتياندى جەڭدى. بەلدەسۋدىڭ نەگىزگى ۋاقىتى تەڭ اياقتالىپ، قوسىمشا ۋاقىتتا جانساي «ۆازاري» ۇپايىن ەنشىلەدى. كادىمگىدەي قۋانىپ قالدىق. جۇلدە السا، ناق وسى سماعۇلوۆ الادى دەستىك. سەبەبى، بۇدان جەڭىلگەن ارميان دزيۋدوشىسى اتاعى دارداي ەۋروپا چەمپيونى. ايتكەنمەن سماعۇلوۆ ءۇشىنشى اينالىمدا كانادالىق ارتۋر مارگەليدوننان ايلاسىن اسىرا المادى. مارگەليدون Grand Slam، Grand Prix تۋرنيرلەرىندە ۇنەمى ۇزدىك ۇشتىكتەن كورىنىپ جۇرگەن اككى سپورتشى. مۇندا دا بەلدەسۋدىڭ نەگىزگى ۋاقىتى تەڭ اياقتالىپ، جەڭىمپازدار قوسىمشا ۋاقىتتا انىقتالدى. ءبىرىنشى بولىپ «ۆازاري» ۇپايىن العان كانادا وكىلى كەلەسى اينالىمعا ءوتتى.

ەسەسىنە قىزدار اراسىندا تەننيستەن جالعىز ءوزى قالعان ەلەنا رىباكينا جارادى. قازاقستاندىق تەننيسشى ەكىنشى اينالىمدا شۆەتسيا وكىلى رەبەككا پە­تەرسونمەن كەزدەسىپ، ەكى سەتكە سوزىلعان ماتچتا 6:2، 6:3 ەسەبىمەن جەڭىسكە جەت­تى. كەزدەسۋ 1 ساعات 14 مينۋتقا سو­زىل­دى. بۇعان دەيىن زا­رينا دياس، ياروسلاۆا شۆەدوۆا جانە يۋليا پۋتينتسەۆا كۇننىڭ ىستىعىنا، جاراقاتىنا بايلانىستى جارىستى جالعاستىرۋدان باس تارتقان بولاتىن. ەندى بار ءۇمىت – رىباكينادا.

ال وليمپياداعا ستەند اتۋ ءۇشىن كەل­گەن مەرگەن قىزدار ەلگە ەرتە قايتا­تىن­داردىڭ ءتىزىمىن تولىقتىردى. ەكى كۇنگە سوزىلعان باسەكەدەن كەيىن اسەم ورىنباي مەن زويا كراۆچەنكو باستاعان مەرگەندەر كەلەسى كەزەڭگە وتە المادى.

«سكيت» جاتتىعۋى بويىنشا سىنعا تۇسكەن ولار بەس راۋند بويى ىرىكتەۋ كەزەڭىن وتكىزدى. ىرىكتەۋ ناتيجەسى بويىنشا التى سپورتشى عانا كەلەسى اينالىمعا وتەدى. وكىنىشكە قاراي، زويا كراۆچەنكو 113 ۇپايمەن 22-ورىن السا، اسەم ورىنباي 111 ۇپايمەن 26-ساتىدا قالىپ قويدى.

 

بيبوسىنوۆ كەلەسى كەزەڭگە ءوتتى

بوكستان ەرلەر اراسىندا باسەكە قىزا ءتۇستى. 52 كيلو سالماقتا رينگكە شىق­قان ساكەن بيبوسىنوۆ پۋەر­تو-ريكو وكىلى يانكەل ريۆەرا في­گەروامەن جۇدىرىقتاسىپ، 4:1 ەسەبى­مەن باسىم ءتۇستى. ساكەننىڭ كەلەسى قار­سى­­لاسى ەكا­تەرينبۋرگتە وتكەن الەم چەم­پيو­ناتىنىڭ قولا جۇلدەگەرى، فرانتسۋز بيلال بەنناما بولماق.

ساداق اتۋدان قازاقستان ەرلەر قۇرا­ماسى كوماندالىق سايىستا جەڭىلىس تاپقانىمەن، ولار ەندى جەكەلەي سىندا ونەر كورسەتەدى. ساداقشىلاردان جاساقتالعان ەرلەر قۇراماسى كوماندالىق سايىستا ءۇندىستان قۇراماسىنا قارسى شىعىپ، قارسىلاستارىنا 2:6 ەسەبىمەن ەسە جىبەردى. كوماندالىق باسەكەدە ەل قۇراماسى ساپىنان جارىس جولىنا سان­جار مۇساەۆ، يلفات ابدۋللين جانە دەنيس گانكين شىقتى. ساداق اتۋدان جەكەلەي جارىستىڭ كەلەسى اينالىمى 27 جانە 29 شىلدە كۇندەرى وتەدى.

سلالومدى ەسۋدەن فينالعا شىققان سپورشىلار قاتارىندا قازاقستاندىق الەكساندر كۋليكوۆ جوق. جارتىلاي فينال قورىتىندىسى بويىنشا كۋ­ليكوۆ 12-ورىن يەلەندى. فينالعا ءوتۋ ءۇشىن العاشقى وندىققا ەنۋ كەرەك ەدى. وسىلايشا، قازاق­ستاندىق سپورت­شى جارىستى اياقتادى. ايەل­دەر ارا­سىنداعى سىندا ەكاتەرينا سميرنوۆا دا ىرىكتەۋ كەزەڭىنەن وتە العان جوق. ۇس­تەل تەننيسىنەن قازاقستان كومان­دا­سىنىڭ ۇزدىگى كيريلل گەراسيمەنكو ەكىنشى اينالىمدا گەر­ما­نيالىق تيم بوللمەن كەزدەسكەن بولاتىن. تارتىستى جەكپە-جەكتىڭ العاشقى پارتياسىن كيريلل جەڭىسپەن اياقتاعان. الايدا كەيىنگى ءتورت پارتيادا نەمىس سپورتشىسىنىڭ شەبەرلىگى باسىم بولدى. ناتيجەسىندە، كەزدەسۋ 1:4 ەسەبىمەن قارسىلاستىڭ پايداسىنا شەشىلدى.

سوڭعى جاڭالىقتار

سەلكەۋسىز سەنىم

پىكىر • بۇگىن، 07:33

كوزبوياۋشىلىقتان ارىلايىق

پىكىر • بۇگىن، 07:32

قايتا تۇلەگەنىن قالايمىز

پىكىر • بۇگىن، 07:29

اۋىل تۇرلەنە تۇسەدى

پىكىر • بۇگىن، 07:28

ەل بەسىگىنە – ەرەكشە نازار

پىكىر • بۇگىن، 07:27

جاقسى باستاما

پىكىر • بۇگىن، 07:21

وزىق تەحنولوگيالى وپەراتسيالار

مەديتسينا • بۇگىن، 07:09

ماڭىزى زور مادەني جوبا

قوعام • بۇگىن، 07:07

قاراشاداعى قارا ولەڭ

قوعام • بۇگىن، 07:04

«سپارتاك» سان سوقتىرىپ كەتتى

حوككەي • بۇگىن، 07:02

كۋكۋشكين كۇشىنە ەندى

تەننيس • بۇگىن، 07:00

جاس ساراپشىلار تالداۋى

ساياسات • كەشە

كەتىگىن تاپقان كاسىپورىن

ەكونوميكا • كەشە

ايان تۋرالى بايان

رۋحانيات • كەشە

ۇقساس جاڭالىقتار