كەزدەسۋ بارىسىندا قاشاعان جانە قاراشىعاناق ءىرى مۇناي-گاز جوبالارىنىڭ جۇزەگە اسىرىلۋى جونىندەگى جوسپار قاراستىرىلدى. پرەزيدەنت قاسىم-جومارت توقاەۆقا جالعاسىپ جاتقان پاندەميا جاعدايىنا قاراماستان, قاشاعانداعى قازىرگى جوبالاردىڭ ىسكە اسىرىلۋ قارقىنى ساقتالىپ وتىرعانى تۋرالى باياندالدى.
كلاۋديو دەسكالتسيدىڭ ايتۋىنشا, مۇناي ءوندىرۋ ءىسىن ارتتىرۋ جونىندە بىرقاتار ماڭىزدى ينۆەستيتسيالىق شەشىم قابىلدانعان. كونسورتسيۋم قاشاعان كەن ورنىن تولىققاندى يگەرۋدىڭ تۇجىرىمداماسىن ازىرلەپ جاتىر. سونداي-اق گاز وڭدەۋ قۋاتىن كۇشەيتۋ جۇمىستارى جالعاسۋدا.
مەملەكەت باسشىسى ەنەرگەتيكالىق باعىتتاعى ينۆەستيتسيالىق جوبالاردى ودان ءارى جۇزەگە اسىرۋعا قازاقستاننىڭ باسا ءمان بەرەتىنىن ايتتى. وسى رەتتە, پرەزيدەنت وتاندىق ءونىم ۇلەسىنىڭ جوعارى بولۋىن قامتاماسىز ەتۋ قاجەتتىگىنە نازار اۋداردى.
بۇدان بولەك اڭگىمەلەسۋ بارىسىندا جەر قويناۋىن يگەرۋ, گەولوگيالىق بارلاۋ جۇمىستارىن جۇرگىزۋ جانە جاسىل ەنەرگەتيكا سالاسىنداعى جوبالاردى ىسكە اسىرۋ ماسەلەلەرى تالقىلاندى.
