تاراپتار قازاقستان رەسپۋبليكاسى مەن رەسەي فەدەراتسياسى اراسىنداعى ساۋدا-ەكونوميكالىق, ينۆەستيتسيالىق, ونەركاسىپتىك, ترانزيتتىك-كولىك, تۋريستىك, مادەني-گۋمانيتارلىق سالالارداعى شەكارا ماڭى ىنتىماقتاستىعىنىڭ وزەكتى ماسەلەلەرىن تالقىلادى.
ءوزارا ساۋدا قارقىنىن ارتتىرۋ ءۇشىن شەكارا ماڭى ساۋداسى ورتالىعىن قۇرۋ پەرسپەكتيۆالارى تالقىلاندى.
بيىل قر مەن رف اراسىنداعى ءوزارا ساۋدا ديناميكاسى بەلسەندى قالپىنا كەلتىرىلۋدە. 2021 جىلعى قاڭتار-مامىردا تاۋار اينالىمى 26,2%-عا ءوسىپ, $8,6 ملرد قۇرادى. قازاقستاننىڭ رەسەيگە ەكسپورتى 40%-دان استامعا ۇلعايدى. ءبىرىنشى كەزەكتەگى مىندەت – تاۋار اينالىمىنىڭ كورسەتكىشتەرىن 2019 جىلعى دەڭگەيگە قاراعاندا $20 ملرد دەيىن جەتكىزۋ.
شەكارا ماڭىنداعى ساۋدانىڭ قازاقستاننىڭ رەسەيمەن ءوزارا ساۋداسىندا ۇلەسى زور, وسىعان بايلانىستى تاراپتار ونى ودان ءارى دامىتۋ ءۇشىن شارالار بەلگىلەدى.
استراحان وبلىسىنىڭ كەمە جاساۋ كاسىپورىندارىنىڭ تاجىريبەسىن ەسكەرە وتىرىپ, ا. مامين ونەركاسىپتىك كووپەراتسيا جوبالارىن دامىتۋ پەرسپەكتيۆاسىمەن كەمە جاساۋ سالاسىنداعى ىنتىماقتاستىقتى كەڭەيتۋ مۇمكىندىگىن اتاپ ءوتتى.
شەكارا ماڭى بايلانىستارىن دامىتۋداعى پەرسپەكتيۆالى باعىت تۋريزم سالاسىنداعى ىنتىماقتاستىق بولىپ وتىر. اقتاۋ جانە استراحان قالالارى اراسىندا كاسپي تەڭىزى بويىنشا تەڭىز كرۋيزىن ىسكە قوسۋ مۇمكىندىگى قاراستىرىلدى. بۇل شەكارا ماڭىنداعى وڭىرلەردىڭ ساۋدا-ەكونوميكالىق الەۋەتىن دامىتۋعا دا ىقپال ەتەتىن بولادى.
